قازاقستانداعى ادام قۇقىقتارى جونىندەگى ۋاكىل اسقار شاكىروۆ يسلام ىنتىماقتاستىعى ۇيىمىنىڭ (يىۇ) ادام قۇقىقتارى جونىندەگى تاۋەلسىز تۇراقتى كوميسسياسىنىڭ 13-سەسسياسىنا قاتىستى, دەپ حابارلادى ادام قۇقىقتارى جونىندەگى ۋاكىل اپپاراتىنىڭ ءباسپاسوز قىزمەتى.
وتىرىستىڭ كۇن ءتارتىبى مۇسىلمان الەمىندەگى ايەلدەر مەن بالالاردىڭ قۇقىقتارىن دامىتۋ, سونداي-اق زاماناۋي سىن-قاتەرلەر جاعدايىندا يىۇ-نىڭ يسلامداعى بالا قۇقىقتارى تۋرالى پاكتىسىن جەتىلدىرۋ ماسەلەلەرىن قامتيدى.
قاتىسۋشى مەملەكەتتەردىڭ بالانىڭ شىعۋ تەگىنە جانە دىنىنە قاراماستان, كەمسىتۋشىلىكتىڭ بارلىق تۇرىنەن قورعاۋ جونىندە شارالاردى قابىلداۋ, سونداي-اق جاھاندىق جانە وڭىرارالىق قارۋلى جانجالدار مەن قاقتىعىستار جاعدايىندا بالالاردى قورعاۋ نورمالارىن كۇشەيتۋ قاجەتتىلىگى تۋرالى ورتاق پىكىر ايتىلدى.
اشىق تالقىلاۋ بارىسىندا قازاقستان ومبۋدسمەنى ارىپتەستەرىنە زاڭنامالىق بازانى جانە قۇقىق قولدانۋ تاجىريبەسىن جەتىلدىرۋ, مەملەكەتتىك ورگانداردىڭ ۇكىمەتتىك ەمەس جانە حالىقارالىق ۇيىمدارمەن ءوزارا ارەكەتتەستىگى, سونداي-اق ۇلتتىق زاڭنامالاردا ءتيىستى حالىقارالىق نورمالار مەن ستاندارتتاردى ەنگىزۋ مانماتىنىندە قازاقستانداعى بالالاردىڭ قۇقىقتارىن كوتەرمەلەۋ بويىنشا قابىلدانعان شارالار تۋرالى حاباردار ەتتى.
بىرقاتار قۇقىق قورعاۋ باعىتتارىندا, اتاپ ايتقاندا, گەندەرلىك تەڭدىكتى قامتاماسىز ەتۋگە جانە بالالاردى زورلىق-زومبىلىقتان قورعاۋ ماسەلەلەرىندە قازاقستاندىق تاجىريبەنى تاراتۋ ءۇشىن ۇسىنىلعانى اتاپ ايتىلدى.
وسىعان بايلانىستى سەسسيادا قارالعان قۇجات جوباسىنا بىرقاتار ناقتى ۇسىنىستار بەرىلدى.