ۇلىبريتانيا مەن اقش رەسەيدى ايىپتادى
ۇلىبريتانيانىڭ ۇلتتىق كومپيۋتەر قاۋىپسىزدىگى ورتالىعى جانە اقش-تىڭ ىشكى قاۋىپسىزدىك مينيسترلىگى مەن فەدەرالدى تەرگەۋ بيۋروسى رەسەي بيلىگىنىڭ تاپسىرماسىمەن حاكەرلەر ەكى مەملەكەتتىڭ ينتەرنەت ينفراقۇرىلىمىنىڭ نەگىزگى وبەكتىلەرىن بۇزباقشى بولدى دەپ بىرلەسكەن مالىمدەمە جاساپ, جاھاندىق حاكەرلىك كامپانيا جۇرگىزىلىپ جاتقانىن ايتتى. «حاكەرلەر جەلىلىك جابدىقتاردى باقىلاۋ قىزمەتىن ءوز قولىنا الماقشى. بولاشاقتا بۇل كيبەرشابۋىل جاساۋعا اكەلۋى مۇمكىن», دەلىنگەن مالىمدەمەدە.
اق ۇيدە وتكەن ءباسپاسوز كونفەرەنتسياسىندا كيبەرقاۋىپسىزدىك ماسەلەسى بويىنشا كوورديناتور روب دجويس اقش پەن ونى قولداۋشى مەملەكەتتەر حاكەرلىك كامپانيانى رەسەيدىڭ جۇرگىزىپ وتىرعانىنا سەنىمدى ەكەنىن جەتكىزدى. ونىڭ ايتۋىنشا, حاكەرلەر جەلىلەر ارقىلى وتكەن اقپاراتتى باقىلاپ وتىرعان. سونىمەن قاتار جەلىلىك قورعانىس پەن حاكەرلىك شابۋىلدى انىقتايتىن جۇيەلەردى دە بۇزباقشى بولعان. «سوڭعى ايلاردا ءارتۇرلى ۇيىمدار وندىرىستىك شپيوناج جۇرگىزەتىن, بيزنەس-اقپاراتتاردى نەمەسە كليەنتتەر تۋرالى مالىمەتتەردى جينايتىن كيبەرشابۋىلعا تاپ بولدى. ءبىز مۇنداي كيبەربەلسەندىلىك كەزىندە ونى ۇيىمداستىرعان كرەملگە بولسىن, باسقاسىنا بولسىن, جاۋاپ قايتاراتىن بولامىز», دەدى ر.دجويس.
ال ۇلىبريتانيانىڭ كيبەرقاۋىپسىزدىك ۇلتتىق ورتالىعىنىڭ باسشىسى سياران مارتين بۇل مالىمدەمەنىڭ جاريالانۋى ماڭىزدى وقيعا ەكەنىن اتاپ ءوتتى. «بۇعان دەيىن اقش پەن ۇلىبريتانيا كيبەرشابۋىلدارعا قارسى تۇرۋ تۋرالى بىرلەسكەن مالىمدەمە جاساپ كورمەگەن ەدى. ۇلىبريتانيا امەريكامەن بىرىگىپ, رەسەيدىڭ كيبەرشابۋىلدارىن اشكەرەلەپ, جاۋاپقا تارتاتىن بولادى», دەدى ول. مالىمدەمەدە ايتىلعانداي, جاھاندىق حاكەرلىك كامپانيا ينفراقۇرىلىم, مەملەكەتتىك مەكەمەلەر مەن ءىرى فيرمالارعا قىزمەت كورسەتەتىن ينتەرنەت-پروۆايدەرلەرگە قارسى ارەكەت ەتكەن.
ەۋرووداق يرانعا قارسى جاڭا سانكتسيا سالمايتىن بولدى
ەۋرووداقتىڭ سىرتقى ىستەر مينيسترلەرى ليۋكسەمبۋرگتە وتكەن كەزدەسۋدە يراندى سيرياداعى جاعدايعا ارالاسىپ, ادام قۇقىقتارىن بۇزا وتىرىپ اسكەري دايىندىق جۇرگىزۋگە كومەكتەستى دەپ ايىپتادى. دەگەنمەن ەۋرووداق يرانعا قارسى شەكتەۋ شارالارىن قاتاڭداتۋ تۋرالى شەشىم شىعارا المادى. بريۋسسەل ۋنيۆەرسيتەتى پروفەسسورلارىنىڭ ايتۋىنشا, گەرمانيا, فرانتسيا مەن ۇلىبريتانيانىڭ ىسكەر توپتارى يرانمەن جاسالعان ءتيىمدى كەلىسىمشارتتاردى بۇزعىسى كەلمەگەندىكتەن وسىنداي جولعا بارىپ وتىر.
«يران بۇۇ-نىڭ, ەۋروپارلامەنتتىڭ سىني بايانداماسىنا قاراماستان, ءوزىنىڭ مىندەتتەرىن ورىندامادى. ەۋرووداق يرانمەن بايلانىستى ۇزگىسى كەلمەيدى. سەبەبى ەۋروپالىقتار امەريكالىقتارعا قاراعاندا ەكونوميكالىق فاكتورلارعا تاۋەلدى», دەدى ولار.
ەندى 12 مامىردا ۆاشينگتون لوندون, بەرلين, پاريجبەن اقىلداسا وتىرىپ, يراننىڭ يادرولىق باعدارلاماسى بويىنشا بىرلەسكەن ارەكەتتەر جوسپارىنا قاتىساتىنىن نەمەسە قاتىسپايتىنىن جاريالاۋى كەرەك. ال دونالد ترامپ بۇل جوسپارعا يسلام رەسپۋبليكاسىنىڭ بالليستيكالىق راكەتالارى تۋرالى ەرەجە ەنگىزۋدى تالاپ ەتىپ وتىر.
قىتايدا ارداگەرلەر ءىسى مينيسترلىگى قۇرىلدى
دۇيسەنبى كۇنى قىتايدا ارداگەرلەر ءىسى مينيسترلىگى رەسمي تۇردە ءوز جۇمىسىن باستادى. بۇل مينيسترلىك مەملەكەتتىك ورگاندار مەن پارتيانىڭ ءىرى رەفورمالارى اياسىندا قۇرىلدى. جاڭادان قۇرىلعان مينيسترلىك ارداگەرلەردى قورعاۋ جانە باسقارۋدىڭ ورتالىقتاندىرىلعان جۇيەسىن قۇرۋ, جەتىلدىرۋ جۇمىستارىمەن اينالىساتىن بولادى.
مينيسترلىكتى تانىستىرۋ راسىمىندە بەلگىلى بولعانداي, بۇل ورگان ازاماتتىق ومىردەگى ارداگەرلەر ءرولىن كوتەرۋ ماقساتىندا عانا ەمەس, سونداي-اق جاستاردى اسكەر جانە قورعانىس سالاسىنا تارتۋ ءۇشىن قۇرىلعان. قىتاي بيلىگى جاڭا مينيسترلىك ارداگەرلەردىڭ زاڭدى قۇقىعى مەن قىزىعۋشىلىعىن قولداپ, قىزمەت كورسەتىپ, اسكەري قىزمەتتىڭ قوعامداعى ورنىن ارتتىرادى دەگەن سەنىمدە.
Google Play Store قوسىمشالارى بالالاردى زاڭسىز اڭدۋى مۇمكىن
Proceedings on Privacy Enhancing Technologies جۋرنالىندا «بالالار تۋرالى كىم ويلايدى؟» اتتى زەرتتەۋ ماقالا جاريالاندى. وندا Google Play Store دۇكەنىندەگى بالالارعا ارنالعان تەگىن قوسىمشالار تۋرالى ءىرى زەرتتەۋ ناتيجەسى تۋرالى ايتىلعان. اۆتورلاردىڭ جازۋىنشا, اتالعان دۇكەندەگى بالالارعا ارنالعان كوپتەگەن قوسىمشالار بالالاردىڭ قۇپيالىلىعى تۋرالى زاڭعا قايشى جۇمىس ىستەيدى.
جەتى زەرتتەۋشى بالالارعا ارنالعان 6 مىڭ قوسىمشانى زەرتتەپ, ولاردىڭ كوپشىلىگى اتا-انانىڭ رۇقساتىنسىز 13 جاسقا تولماعان بالالار تۋرالى جەكە مالىمەتتەردى جيناعانىن انىقتادى. بەركليدەگى كاليفورنيا ۋنيۆەرسيتەتى عالىمدارىنىڭ ايتۋىنشا, قوسىمشالاردا بالالاردى اڭديتىن باعدارلاما ەنگىزىلىپتى. بىراق مۇنداي باعدارلامانىڭ بالالارعا ارنالعان قوسىمشالاردا قولدانىلۋىنا تىيىم سالىنعان.
ماقالادا ايتىلعانداي, كوپتەگەن قوسىمشا ارقىلى قۇپيا مالىمەتتەر الىنىپ وتىرعان. ءتىپتى, بالانىڭ جۇرگەن جەرى, تەلەفونىنداعى بايلانىس نومىرلەرى سەكىلدى مالىمەتتەر دە بىردەن جينالعان.
Google ازىرگە عالىمداردىڭ زەرتتەۋى تۋرالى پىكىر بىلدىرمەدى.
دايىنداعان گۇلنۇر قۋانىشبەكقىزى,
«ەگەمەن قازاقستان»