قورعانىس سالاسىنا قاجەتتى قۇرىلعىلار وتاندىق كاسىپورىنداردا شىعارىلاتىندىقتان زاماناۋي قۇرالداردى شەكاراشىلار كۇندەلىكتى قىزمەتىندە پايدالانىپ ءجۇر.
ۇقك شەكارا قىزمەتى «سولتۇستىك» وڭىرلىك باسقارماسى باستىعىنىڭ ۋاقىتشا مىندەتىن اتقارۋشى جانىبەك تولەباەۆتىڭ ايتۋىنشا بىلتىر شەكارادان ەسىرتكى زاتتارىن جاسىرىن جولمەن الىپ ءوتۋدىڭ 126 وقيعاسى تىركەلگەن. 8,4 كيلو ەسىرتكى تاركىلەنىپ, قارۋ-جاراقتاردى زاڭسىز اسىرۋدىڭ 164 فاكتىسى اشكەرەلەنگەن. قۇرىلىم شىعىس قازاقستان, پاۆلودار, قوستاناي, سولتۇستىك قازاقستان وبلىستارىن قامتيدى. وتكەن جىلى اسكەريلەر رەسەيمەن شەكتەسەتىن مەكلەكەتتىك شەكارا بويىندا 3600-دەن استام زاڭ بۇزۋشىلىقتى انىقتاعان. بۇل كورسەتكىش 2016 جىلمەن سالىستىرعاندا 26 پايىزعا كوپ.
دەسەك تە شەكارالىق ايماقتاردا شەشىمىن تاباتىن ماسەلەلەر جوق ەمەس. بۇگىندە شەكاراشىلار سىرتتان ەل اۋماعىنا كىرەتىن جۇك ۆاگوندارىن تەكسەرۋگە قاۋقارسىز. ماسەلەن بۋلاەۆو, مامليۋتكا تەمىرجول ستانسالارىندا جۇك ۆاگوندارىن سكانەرلەۋدەن وتكىزەتىن كەشەندى قۇرالدار جوق. ونى ساتىپ الۋعا قاراجات قولبايلاۋ. ەڭ ارزانى ءبىر ميلليارد تەڭگە تۇرادى. سونىڭ سالدارىنان كۇنىنە 170 جۇك كولىگى تەكسەرۋسىز وتەدى. شەكاراشىلار جۇمىس ىستەيتىن اكىمشىلىك عيماراتتار ەسكىرگەن. وتكىزۋ بەكەتتەرىندە ءتيىستى ينفراقۇرىلىمدار جەتىسپەيدى. قىس مەزگىلىندە, جاۋىندى-شاشىندى كۇندەرى جولدارمەن ءجۇرۋ قيىن. ءتۇيىندى ماسەلەلەردى شەشۋدىڭ ءىس-جوسپارى ءتۇزىلىپ, ءتيىستى ورىندارعا جولدانعانمەن, قاجەتتى قاراجاتى كوزى ناقتىلانباعان.
وزەكتى ماسەلەلەردىڭ ءبىرى – جىل وتكەن سايىن ەل شەبىن كۇزەتەتىندەردىڭ كەمىپ بارا جاتقانى. كادر جەتىسپەۋشىلىگىنەن كەدەن بەكەتتەرىندە قىزمەت كورسەتۋدىڭ ساپاسى تومەندەپ كەتكەن. كولىك جۇرگىزۋشىلەر مەن جۇك تاسۋشىلار شەكارا پۋنكتتەرىندە ۇزاق تۇرىپ قالىپ, التىن ۋاقىتتارىن بوسقا جوعالتىپ جاتاتىن جايتتار ءجيى كەزدەسەدى. كەرىسىنشە, شەكاراشىلاردىڭ جۇمىس جۇكتەمەسى ەكى ەسە كوبەيگەنىنە قاراماستان جالاقى مولشەرى سول كۇيىندە قالعاندىقتان قىزمەتكە كەلۋشىلەر از.
اسكەري وقۋ ورىندارىنا قويىلاتىن باستى تالاپ قازاقستاننىڭ قارۋلى كۇشتەرىن جوعارى بىلىكتى اسكەري قىزمەتكەرلەرمەن جاساقتاۋدى قامتاماسىز ەتۋ بولىپ تابىلادى. ۇلتتىق ۇلان پەتروپاۆل اسكەري ينستيتۋتىندا اسكەري ءبىلىم بەرۋ جۇيەسىن جەتىلدىرۋدىڭ, وفيتسەر ماماندارىن دايارلاۋدىڭ ناقتى شارالارى جۇرگىزىلىپ كەلەدى. بۇل تالاپتار مەن مىندەتتەر بىرقىدىرۋ شەشىلگەنىمەن, قولبايلاۋ كەدەرگىلەر دە جوق ەمەس. سولاردىڭ بىرى–قۇرىلىس نىساندارىن سالۋعا ارنالعان جوبانىڭ ءالى كۇنگە دەيىن قارجىلىق جاعىنان قولداۋ تاپپاي كەلە جاتقانى. ولاردىڭ ىشىندە وفيتسەرلەرگە ارنالعان تۇرعىن ءۇي كەشەنى دە بار. كىتاپحانادا 140 مىڭ كىتاپتار مەن وقۋلىق قۇرالدارى بار بولعانىمەن جارتىسىنان استامى قازىرگى تالاپتارعا سايكەس كەلمەيدى. كۋرسانتتار س. مۇقانوۆ اتىنداعى ورتالىق كىتاپحانادا دايىندالۋعا ءماجبۇر.
باسپانامەن قامتۋ, وقۋ عيماراتتارىن جوندەۋ, كادر, وقۋلىق تاپشىلىعى سەكىلدى ماسەلەلەر شەشىمىن تاپسا, اسكەري قۇرىلىمداردىڭ جۇمىسى جاندانا تۇسەرى انىق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى