15 ءساۋىر كۇنى كەشكى 18 ساعات 59 مينۋت شاماسىندا وسكەمەن قالاسىنىڭ ىشكى ىستەر ءبولىمىنىڭ جەدەل باسقارۋ ورتالىعىنىڭ «102» جەلىسىنە ەۋروپالىق ناسىلدەگى بەلگىسىز بىرەۋلەر كوشەدە كەلە جاتقان ايەلدىڭ ىشىندە قۇندى زاتتارى بار سومكەسىن ۇرلاپ, بەلگىسىز باعىتقا جاسىرىنىپ ۇلگەرگەنى تۋرالى حابارلاما كەلىپ تۇسەدى.
ۇلتتىق ۇلاننىڭ اسكەري جاساق باستىعى, كىشى سەرجانت ازات ۋليانوۆ باستاعان, دانيار ەلگوندەنوۆ, ايبەك سامادياروۆ, رۋسلان كايزەر قوستاعان ءتارتىپ ساقشىلارى جاقىن ماڭداعى اۋلالاردى جەدەل ىزدەستىرۋ شارالارى بارىسىندا ەكى كۇدىكتى ازاماتتى ءىزىن سۋىتپاي قولعا تۇسىرەدى. تەكسەرۋ بارىسىندا كۇدىكتىلەر بۇعان دەيىن قر قىلمىستىق كودەكسىنىڭ 120 بابىنىڭ 1-ءشى ءبولىمى جانە اتالعان كودەكستىڭ 190 بابىنىڭ 2-ءشى ءبولىمى بويىنشا سوتتالعان بولىپ شىقتى. «اراعا كوپ ۋاقىت سالماي كەشكى ساعات 20:04 شاماسىندا ەرتىس پوليتسيا بولىمشەسىنىڭ كەزەكشى بولىمىنە تاعى دا قوڭىراۋ شالىنادى.
جابىرلەنۋشى ازامات ك. كەشكى ساعات 20:00 شاماسىندا «ۆولنا» سۋپەرماركەتىندە بەلگىسىز بىرەۋ 20 مىڭ تەڭگە اقشاسىن ۇرلاپ كەتكەنىن ايتىپ ارىزدانادى. كىشى سەرجانت ازات ۋليانوۆ باستاعان اسكەري جاساق وقيعا بولعان اۋداندا دەرەۋ ىزدەستىرۋ جۇمىستارىن باستاپ كەتەدى. ماڭداعى اۋلالاردى جەدەل تەكسەرۋ بارىسىندا الدىن-الا بەرىلگەن سيپاتتاماعا سايكەس كەلەتىن كۇدىكتى قولعا تۇسەدى. ۇستالعان ازاماتتى تەكسەرۋ بارىسىندا ونىڭ دا بۇعان دەيىن قر قىلمىستىق كودەكسىنىڭ 187 بابىنىڭ 1 ءبولىمى جانە 188 بابىنىڭ 2 ءبولىمى بويىنشا سوتتالعانى انىقتالادى. ۇلتتىق ۇلاننىڭ «شىعىس» وڭىرلىك قولباسشىلىعىنا قاراستى 5518 اسكەري ءبولىمىنىڭ ءتارتىپ ساقشىلارى ءبىر تۇندە بىرنەشە ۇرىنى ءىزىن سۋىتپاي قۇرىقتاپ, ۇرلانعان م ۇلىكتەر يەلەرىنە قايتارىلدى. ۇرلىققا قاتىسى بار دەگەن كۇدىكپەن ۇستالعان ازاماتتار سول ءتۇنى وسكەمەندەگى ەرتىس پوليتسيا بولىمشەسىنە جەتكىزىلدى», - دەيدى «شىعىس» وڭىرلىك قولباسشىلىعىنىڭ ءباسپاسوز قىزمەتىنىڭ باسشىسى باعدات امانگەلدى.
ازامات قاسىم,
«ەگەمەن قازاقستان»
وسكەمەن