باۋىرجان بايبەك «سايران» اۆتوۆوكزالىنىڭ عيماراتىن جوندەۋدى جانە ونى جەرگىلىكتى ماڭىزى بار تاريحي ەسكەرتكىشتەر تىزىمىنە ەنگىزۋدى تاپسىردى.
كۇندەلىكتى جۇمىس اپارى بارىسىندا الماتى اكىمى باۋىرجان بايبەك حالىقارالىق «سايران» اۆتوۆوكزالىنىڭ عيماراتى مەن ونىڭ اينالاسىن جانە «ساياحات» اۆتوبەكەتىن ارالاپ كوردى. مەگاپوليس باسشىسى «سايران» اۆتوۆوكزالىنىڭ كوپتەن بەرى حالىقارالىق دەڭگەيگە ساي ەمەستىگىن, سوندىقتان قايتا جوندەپ, مەنەدجمەنت مودەلىن قاراستىرۋ قاجەتتىگىن اتاپ ءوتتى.
الماتىدا ء«تۋريزمدى دامىتۋدىڭ 100 قادامى» جول كارتاسى اياسىندا قالا سەرۆيسى مەن ونىڭ ينفراقۇرىلىمىن جاقسارتۋ بويىنشا جۇمىس ودان ءارى جالعاسۋدا. وسىدان بىرنەشە كۇن بۇرىن عانا «قتج» ۇك» اق-مەن بىرگە «الماتى-1» جانە «الماتى-2» ۆوكزالدارىن رەكونسترۋكتسيالاۋ مەن قىزمەت ساپاسىن جاقسارتۋ بارىسىندا بىرىككەن جوسپار قابىلدانعان ەدى. دەگەنمەن, مەگاپوليستىڭ اۆتوموبيل ۆوكزالدارىنىڭ جاعدايلارى قاناعاتتانعىسىز بولعاندىقتان جاڭارتۋدى قاجەت ەتەدى.
بۇگىنگى كۇنى «سايراننىڭ» ۆوكزال الدى اينالاسىندا بىرقاتار قۇرىلىستار بار, كەڭەستىك مودەرنيزم ستيلىندە سالىنعان ىشكى ارلەۋدىڭ ەلەمەنتتەرى مەن عيماراتتىڭ سىرتقى كەلبەتى بۇرىنعى بەينەسىنەن ءبىرشاما ايرىلعان, سونىڭ سالدارىنان ارحيتەكتۋرالىق بىرەگەيلىگىن جويۋ قاۋپى بار.