"بابادان قالعان مۇرانى مۇراجاي ساقتاپ تۇرادى". وبلىس مەكتەپ وقۋشىلارىنىڭ تۇڭعىش فورۋمى وسىلاي اتالدى.
شارا "رۋحاني جاڭعىرۋ" باعدارلاماسىنىڭ "تاربيە جانە ءبىلىم" جوباسى اياسىندا ۇيىمداستىرىلدى. جيىن «مۇراجاي– ارمان شىراعى, ءبىلىمنىڭ كاۋسار بۇلاعى» اتتى ەكسپوزيتسيا جانە وقىتۋ-تاربيە باعىتىندا قولدانىلاتىن جادىگەرلەر كورمەسىمەن اشىلدى. ءبىلىم وشاقتارىنداعى مۋزەيلەردە ساقتاۋلى تۇرعان ەكسپوناتتار كوپشىلىك نازارىنا ۇسىنىلدى. ءوڭىرىمىزدىڭ تۇكپىر-تۇكپىرىنەن كەلگەن ۇل-قىزدار تاريحي ماڭىزى ەرەكشە جادىگەرلەر جايلى جان-جاقتى ماعلۇماتتار بەردى. ەسىل اۋدانى اياعان شاجىمباەۆ اتىنداعى №3 ياۆلەنكا ورتا مەكتەبىنىڭ شاكىرتتەرى قۇندى دۇنيەلەردى مۇعالىمدەرىمەن بىرگە دايىنداپتى. اق ساماۋىر, شوقپار مەن ات ابزەلدەرىن اۋدان تۇرعىندارىنان جيناستىرىپتى. كيىز ءۇيدىڭ جابدىقتارى دا اسەمدىگىمەن كوز تارتادى.
بۇدان كەيىن فورۋم «قازاقستان–ماڭگىلىك ەل!» حورەگرافيالىق-كومپوزيتسيالىق شاراسىنا جالعاسىپ, رۋحتى كوتەرەتىن شىعارماشىلىق كورىنىستەر قويىلدى. "رۋحاني جاڭعىرۋ" باعدارلاماسى اياسىندا اتقارىلعان جۇمىستار قورىتىندىلاندى. مەكتەپ وقۋشىلارىنىڭ بويىنا ۇلتتىق قۇندىلىقتارىمىزدى, وتانشىلدىق قاسيەتتەردى ۇيالاتۋدا مەكتەپتەردە جۇمىس ىستەيتىن مۇراجايلاردىڭ ء رولى ايرىقشا. بۇل جونىندە ءبىلىم باسقارماسىنىڭ باسشىسى گۇلميرا كارىموۆا بايانداپ بەردى.
بىلتىر 30 مىڭ ۇل-قىز ەكسكۋرسياعا شىعىپ, ەلىمىزدىڭ تاريحي جەرلەرىن ارالاپ قايتىپتى.
«كيەلى جەرلەر كارتاسىنا وڭىردەن 19 نىسان ەنىپ وتىر. ولاردىڭ التاۋى رەسپۋبليكالىق ماڭىزعا يە. وقۋشىلاردىڭ قاتىسۋىمەن وبلىس ومىرىنە قاتىستى كوپتەگەن قۇجاتتار تابىلدى. جاز ايلارىندا ارحەولوگيالىق ەسكەرتكىشتەرگە بارىپ قازبا ىستەرىمەن دە اينالىسادى. «تۋعان جەرگە تاعزىم» اكتسياسى شەڭبەرىندە 126 شارا ءوتتى. قازىر ءبىلىم وشاقتارىندا 220 مۇراجاي ورنالاسقان», دەيدى»رۋحاني جاڭعىرۋ» وڭىرلىك جوبالىق كەڭسەنىڭ مەڭگەرۋشىسى جانار تالاسپاەۆا.
ءومىر ەسقالي, «ەگەمەن قازاقستان»