جىلۋ ماۋسىمى جىل بويى نازاردا
قار جاۋىپ, كۇن سۋىتقان سايىن قالا تۇرعىندارىن بيىلعى قىس قالاي بولار ەكەن, ءۇيىمىز جىلى, ىستىق سۋىمىز ۇزىلمەي, اپاتتى جاعدايلار ورىن الماي ما دەگەن سۇراقتار مازالايتىنى ءسوزسىز. وبلىس اكىمدىگىنىڭ بيىلعى جىلعى 28 ساۋىردەگى قاۋلىسىمەن تۇرعىن ءۇي-كوممۋنالدىق شارۋاشىلىق باسقارماسىنىڭ قىس ماۋسىمىنا دايىندىق ءجونىندەگى ءىس-شارالارى بەكىتىلىپ, ارنايى جۇمىس توبى قۇرىلعان بولاتىن. قىس شاناسى جاز سايلاندى ما, كۇن ءتارتىبىندە تۇرعان جىلۋ ماۋسىمى قازىر قالاي جۇرگىزىلۋدە؟
«ەگەمەن قازاقستاننىڭ» پاۆلودار وبلىسىنداعى ءتىلشىسى فاريدا بىقاي وبلىستىق ەنەرگەتيكا جانە كوممۋنالدىق شارۋاشىلىق باسقارماسى باستىعىنىڭ ورىنباسارى سەرىك كوشىمباەۆقا:
– ءسىز بۇعان نە دەيسىز؟
– جالپى, قىس ايلارىنا دايىندىق بارىسىندا وبلىستاعى جىلۋ بەرەتىن ستانسالارعا كۇردەلى جانە اعىمدىق ءجوندەۋلەر جۇرگىزىلدى. ولاردىڭ قاتارىندا 6 ەنەرگيا بلوگى, 14 جىلۋ قازاندىعى, 4 تۋربينا جانە 2 تۋربوگەنەراتور بار. بيىلعى جىلدىڭ قازان ايىنان باستاپ بارلىق جىلۋ ەلەكتر ستانسالارى جىلۋ بەرۋ ماۋسىمىنىڭ جۇمىس كەستەسىنە كوشتى. بۇل ۇدەرىس ماۋسىم بويى نازاردا بولادى. بارلىق ستانسالاردا كومىر جانە مازۋت قورى جەتكىلىكتى.
ءبىزدىڭ باسقارما تاراپىنان وبلىستاعى بارلىق نىسانداردىڭ جىلۋ ماۋسىمىندا ۇزدىكسىز جۇمىس ىستەۋى, ياعني ەنەرگيا كوزدەرى, ستانسالاردىڭ جاعدايى, كومىر جانە مازۋتتىڭ ەسەبى بويىنشا كەستەسى, جىلۋمەن, ەلەكترمەن, سۋمەن جابدىقتاۋ جانە سۋ جەلىلەرىندەگى اپاتتى جايلاردىڭ ورىن العان-الماعان جايلارى كۇندەلىكتى مونيتورينگ ارقىلى باقىلانادى. جىلۋ بەرۋ ماۋسىمىنا وراي وبلىستاعى 2258 تۇرعىن ءۇي, 621 مەكتەپ, 410 دەنساۋلىق ساقتاۋ ورىندارى جانە باسقا دا 257 الەۋمەتتىك نىساندار دايىندىق جولىنا قويىلعان بولاتىن.
قازىرگى كەزدە ولاردىڭ بارلىعىندا جىلۋ جۇيەلەرى قالىپتى جۇمىس ىستەپ تۇر. اي سايىن قالا شاعىن اۋداندارىندا تۇرعىندارمەن جيىندار وتكىزىلىپ, ولارعا كورسەتىلگەن كوممۋنالدىق قىزمەتتەر ءۇشىن دەر كەزىندە اقى تولەۋ قاجەتتىگى جانە تۇرعىندار اراسىندا بار بەرەشەكتى وتەۋ ماسەلەسى بويىنشا ءتۇسىندىرۋ جۇمىستارى جۇرگىزىلەدى. وسىنداي ءىس-شارالار ناتيجەسىندە كوممۋنالدىق قىزمەتتەرگە بەرەشەك 40%-عا تومەندەپ وتىر.
پاۆلودار وبلىسى.