رۋمفىنيادا زقق ورنىعادى
وتكەن بەيسەنبىدە رۋمىنيا پرەزيدەنتى ترايان بەسەسكۋ ەلدىڭ قورعانىس جونىندەگى جوعارعى كەڭەسى ءوز اۋماعىندا اقش-تىڭ زىمىرانعا قارسى قورعانىس (زقق) قوندىرعىلارىن ورنالاستىرۋ جونىندەگى ۇسىنىسىن قابىلداعانىن جاريالادى. اقش مەملەكەتتىك حاتشىسىنىڭ كومەكشىسى فيليپپ كروۋليدىڭ ايتۋىنشا, اتالمىش قوندىرعىلار قارا تەڭىز اكۆاتورياسىندا دا ورنالاستىرىلۋى مۇمكىن. ونىڭ تۇسىندىرۋىنشە, ولار رەسەيگە ەمەس, يرانعا قارسى باعىتتالماق.
گەس-ءتى حالىق قارجىسىنا سالماق
تاجىكستاندا سالىنىپ جاتقان روگۋن سۋ ەلەكتر ستانساسى حالىقتان جيناعان اقشامەن قارجىلاندىرماق بولىپ وتىر. قاڭتاردىڭ باسىندا باستالعان شاراعا بايلانىستى ءبىر ايعا جۋىق مەرزىمدە حالىققا 700 ميلليون ساماني, ياعني 160 ميلليون دوللارداي گەس اكتسياسى ساتىلىپتى. وسىناۋ گەس سالىنىپ بىتسە, بۇل ەل ەلەكتر ەنەرگياسى تاپشىلىعىنان ءبىرجولا قۇتىلماق. قۇرىلىس كەشەگى كسرو كەزىندە باستالىپ, اياقسىز قالعان. جاقىندا ونى سالۋعا رەسەي دە ۋادە بەرىپ ەدى, ولار دا تايقىپ كەتتى. ەل باسشىلىعى ەندى حالىققا قول جايىپ وتىر. بىراق سول حالىقتا دا كۇي جوق. تالاي تاجىك ازاماتتارى كۇنكورىستىڭ قامىمەن شەتەل اسىپ كەتكەن. ولاردان قارجى سۇراۋ دا قيىن. باسقاداي امال قالماعان سوڭ ۇكىمەت سوعان بارىپ وتىر.
بۇرىنعىنى قازىرگىسى كىنالايدى
سلوۆاكيانىڭ پرەمەر-ءمينيسترى جانە “باعىت سوتسيال-دەموكراتيا” پارتيانىڭ كوسەمى روبەرت فيتسو وزىنەن بۇرىنعى پرەمەر “دەموكراتيالىق پارتيانىڭ” كوسەمى ميكۋلاشا دزۋريندانى جەمقورلىقپەن اينالىستى دەپ ايىپتادى. ايىپتاعاندا, قىلمىستارىنىڭ ءتۇرىن تۇستەپ, ناقتى فاكتىلەردى كەلتىرەدى. ال دزۋريندا ءوز اتىنا ايتىلعان ايىپتاردى مويىنداماعانمەن, الداعى پارلامەنت سايلاۋىنا قاتىسپايتىنىن مالىمدەدى. راس, ونى ايىپتاۋدان قورىققاندىقتان ەمەس, سايلاۋ ناۋقانى كەزىندە ءوز پارتياسىن جامانداۋعا جول بەرمەس ءۇشىن دەپ ءتۇسىندىردى.
شەيىتتەردىڭ جولىندا شەيىت بولعان
يراك استاناسىنىڭ شەت جاعىندا كەربالا قالاسىنا قاراي مۇحاممەد پايعامباردىڭ نەمەرەسى حۋسەيننىڭ ارۋاعىنا ءمىناجات ەتۋگە بارا جاتقانداردىڭ ماڭىندا جاسالعان لاڭكەستىك ارەكەتتەن 54 ادام قازا تاۋىپ, 120 ادام جاراقات الىپتى. ادەتتە حۋسەيننىڭ ولىمىنە ارنالعان 40 كۇندىك ازا تۇتۋدان كەيىن ارباين مەرەكەسى وتەدى. بيىل بۇل مەرەكە 15 اقپاندا بولماق. ول شاراعا قارسىلار دا بار. لاڭكەستىك ارەكەت – سونىڭ ءبىر كورىنىسى. مەرەكە كەزىندە كەربالادا جۇرت تىنىشتىعىن 25 مىڭ قۇقىق قورعاۋ قىزمەتكەرلەرى كۇزەتپەك.
ناپاقاسىن سىرتتان ىزدەيدى
شەتەل اقپارات قۇرالدارىنىڭ حابارلاۋىنا قاراعاندا, قىرعىز رەسپۋبليكاسىندا 800 مىڭداي ادام جۇمىس ىزدەپ شەت ەلدەرگە كەتكەن كورىنەدى. حالقى از قىرعىز ەلى ءۇشىن بۇل تىم كوپ. بۇرناعى جىلى قىرعىز ميگرانتتارى تۋعان ەلىنە 1,2 ميلليارد دوللار قارجى اۋدارىپتى. بۇل قىرعىزستاننىڭ ىشكى جالپى ءونىمىنىڭ 27 پايىزىن قۇرايدى ەكەن. سوعان قاراعاندا, ەلدە قالعانداردىڭ وندىرگەن ءونىمى دە, تاپقان تابىسى دا ماردىمسىز ەكەنىن اڭعارۋ قيىن ەمەس. ارينە, ەلدە جاعداي جاقسى بولسا, ەشكىم دە سىرتتان ناپاقا ىزدەمەيتىنى بەلگىلى.
جۇگەرىدەن جۇرەك اينيدى
ءبىر تاماقتى كۇندە جەي بەرسە, ادام ودان شىعادى. ال جۇعىمسىزداۋ تاماق ودان دا جامان. كحدر-دا ادامداردىڭ نەگىزگى تاماعى جۇگەرى بولىپ وتىر. مۇنى ەل كوسەمى كيم چەن ءيردىڭ ءوزى مويىنداپ, الداعى ۋاقىتتا ونى بيداي جانە كۇرىشپەن الماستىرۋدى جوسپارلاپ وتىرعاندارىن ەلدىڭ باس باسىلىمى “رودونگ سينمۋن” حابارلادى. كوپ جەردە ءتۇسىمى مول جۇگەرى – مالعا جەم-ازىق. ونى باسقا داقىلمەن الماستىرۋ دا وڭاي بولا قويماس. ونسىز دا بۇل ەلدىڭ حالقى ازىق-ت ۇلىك جەتىمسىزدىگىنەن كوپ قينالىپ, شەتتەن كومەك سۇرايدى.
پيكاسسونىڭ ءبىر سۋرەتى – 13 ميلليون دوللار
لوندوندا وتكەن يمپرەسسيونيستەر مەن مودەرنيستەردىڭ شىعارمالارى اۋكتسيونىندا پابلو پيكاسسونىڭ جانە ونىڭ جولىن قۋشىلاردىڭ كارتينالارىنا سۇرانىس كۇشتى بولدى. پيكاسسونىڭ كەزدەيسوق كورسە كەي ادامنىڭ ۇرەيىن ۇشىراتىنداي “ايەلدىڭ باسى (جاكلين)” كارتيناسى 13 ميلليون دوللارعا باعالانعان. العاشقى ۇسىنىس باعاسى 5-6 ميلليونداي ەكەن. گوللاند سۋرەتشىسى كەسا ۆان دونگەننىڭ 1910-1911 جىلداردا جازعان “سىعان قىزى” كارتيناسى 11 ميلليون 284 مىڭ دوللارعا باعالانىپتى.
ازىرلەگەن ماماديار جاقىپ.