قازاقستان رەسپۋبليكاسى ەكونوميكالىق ىنتىماقتاستىق جانە دامۋ ۇيىمىنىڭ كوميتەتتەرىندەگى بايقاۋشى مارتەبەسىن الۋعا ءوتىنىشىنىڭ تۇساۋكەسەرىن وتكىزدى
كەشە پاريجگە جۇمىس ساپارىنىڭ اياسىندا قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ ەكونوميكالىق ىنتىماقتاستىق جانە دامۋ ۇيىمى (ەىدۇ) كەڭەسىنىڭ وتىرىسىنا قاتىستى, دەپ حابارلادى قازاقستان پرەمەر-ءمينيسترىنىڭ ءباسپاسوز قىزمەتى.
ەىدۇ كەڭەسىنىڭ وتىرىسىندا ءسوز سويلەگەن كارىم ءماسىموۆ قازاقستان رەسپۋبليكاسىنىڭ ۇيىم كوميتەتتەرىندەگى بايقاۋشى ءمارتەبەسىن الۋعا ءوتىنىشىنىڭ تۇساۋكەسەرىن وتكىزدى.
كارىم ءماسىموۆ ءوزىنىڭ سوزىندە ەلىمىزدىڭ ەىدۇ ستاندارتتارىن ەنگىزۋگە جانە ۇيىم كوميتەتتەرىمەن ءارى قاراي ىنتىماقتاسۋعا دەگەن تالپىنىسىن جەتكىزدى.
«جارتى عاسىر بۇرىن, ەىدۇ قۇرىلعان كەزدە, قازاقستاننىڭ ۋاقىت وتە كەلە اتالعان ۇيىمعا ءوتىنىش بەرەتىنىن ەشكىم بىلگەن جوق. ءتىپتى 20 جىل بۇرىن دا, ءبىزدىڭ ەلىمىز تاۋەلسىزدىك العان كەزدە, مۇنداي شامشىلدىق سەنىمسىز كورىنەر ەدى», – دەپ اتاپ كورسەتتى ك.ءماسىموۆ.
قازاقستان پرەمەر-ءمينيسترى «سوڭعى 20 جىلدىڭ جەڭىل بولماعانىن», بىراق بۇگىندە پرەزيدەنت ن.نازارباەۆتىڭ جەتەكشىلىگىمەن ۇلكەن جەتىستىكتەرگە قول جەتكىزىلگەنىن كولدەنەڭ تارتتى.
«ءبىزدىڭ بۇدان بىلاي جاڭا يدەيالار مەن ينۆەستيتسيالارعا ەكونوميكامىز اشىق. ازاماتتارىمىزدىڭ باي الەۋەتىن بارىنشا پايدالانۋ ءۇشىن زاماناۋي ينفراقۇرىلىمدى جانە جوعارى بىلىكتى ءبىلىمى بار ارتاراپتاندىرىلعان جانە يننوۆاتسيالىق ەكونوميكا قۇرىلىسىنا ينۆەستيتسيا سالۋدامىز», – دەدى قازاقستان پرەمەر-ءمينيسترى ءوز سوزىندە.
«بۇگىنگى تاڭدا ءبىزدىڭ جەكەمەنشىك سەكتورىمىزدا شاعىن جانە ورتا بيزنەستىڭ 700 000-عا جۋىق كاسىپورنى 2,5 ملن. ادامدى جۇمىسپەن قامتىپ وتىر. تمد ەلدەرىنىڭ ىشىنەن تەك رەسەي عانا جان باسىنا شاققاندا ەڭ كوپ سىرتقى ينۆەستيتسيا تارتا العان. سونداي-اق ەلىمىزگە تارتىلعان 136 ملرد. دوللار ينۆەستيتسيانىڭ جارتىسى سوڭعى ءتورت جىلدىڭ ۇلەسىنە تيەدى, بۇل ماڭىزدى ءجايت», – دەپ اتاپ كورسەتتى كارىم ءماسىموۆ.
سوڭعى جيىرما جىلدا قازاقستان ەكونوميكالىق ءوسىمىن ساقتادى, ىشكى جالپى ءونىمدى جان باسىنا شاققاندا 12 ەسەگە ارتتىردى – 700 اقش دوللارىنان 9 000 اقش دوللارىنا دەيىن جەتكىزدى. سوڭعى 10 جىلدا ەلىمىز ەكونوميكاسى تەز دامىعان الەم ەلدەرىنىڭ وندىعىنا كىردى جانە قازىر ءدۇنيەجۇزىلىك بانكتىڭ جىكتەلىمى بويىنشا ءبىز تابىسى ورتاشا دەڭگەيدەگى ەل بولىپ تابىلامىز.
«ءبىزدىڭ ەكونوميكامىز الەمدەگى تەز دامۋشى ەكونوميكالاردىڭ ءبىرى بولىپ تابىلادى, ونىڭ ورتاشا ءوسىمى جىلىنا 8% قۇرايدى», – دەدى قازاقستان پرەمەر-ءمينيسترى ءوز سوزىندە.
كارىم ءماسىموۆ ۇيىمعا قاتىسۋشى ەلدەردىڭ وكىلدەرىن قازاقستان ۇكىمەتىنىڭ ەىدۇ-مەن ىنتىماقتاستىعى تۋرالى حاباردار ەتتى. ءبىلىم بەرۋدى جاڭعىرتۋدىڭ مەملەكەتتىك ساياساتىندا ساراپشىلاردىڭ ۇسىنىس-كەڭەستەرى ەسكەرىلدى. قازىر قازاقستاندا قولعا الىنىپ وتىرعان ينۆەستورلارعا ارنالعان «ءبىر تەرەزە» قاعيداسى دا ەىدۇ-نىڭ ۇزدىك تاجىريبەسىنە نەگىزدەلگەن.
قازىرگى تاڭدا ەىدۇ-مەن سەرىكتەستىكتە جەكەمەنشىك سەكتوردىڭ, ۇلتتىق ەكونوميكانىڭ باسەكەگە قابىلەتتىلىگىن دامىتۋ, مەملەكەتتىك ورگانداردىڭ اشىقتىعىن جانە ەسەپ بەرۋشىلىگىن ارتتىرۋ, سىبايلاس جەمقورلىقتى جانە ونىڭ سەبەپتەرىن ەڭسەرۋ ءجونىندەگى جۇمىستار جالعاسۋدا.
ماڭىزدىسى سول, قازاقستان رەسپۋبليكاسى ەىدۇ-نىڭ باسەكەگە قابىلەتتىلىگىنىڭ ەۋرازيالىق باعدارلاماسىنا مۇشە بولىپ تابىلادى.
«جارتى عاسىر بۇرىن, ەىدۇ قۇرىلعان كەزدە, قازاقستاننىڭ تاۋەلسىز ەل بولاتىنىن ەشكىم بىلگەن جوق. جۇيەلى تۇردە جاڭعىرتۋ ءۇردىسىن جۇرگىزگەن قازاقستاننىڭ ەكونوميكاسى جەدەل دامىعان الەمنىڭ ۇزدىك ون ەلىنىڭ قاتارىنان كورىنەتىنىن دە ەشكىم بىلگەن جوق. ءبىز قازاقستان وكىلى ەكونوميكالىق ىنتىماقتاستىق جانە دامۋ ۇيىمىنىڭ بايقاۋشىلارى قاتارىنا قوسىلاتىن كۇندى اسىعا كۇتەمىز», – دەدى كارىم ءماسىموۆ.
ءسوز رەتى كەلگەندە, ەىدۇ-نىڭ الەمنىڭ ۇلىبريتانيا, اقش, كانادا, شۆەيتساريا جانە ت.ب. ەڭ دامىعان 34 مەملەكەتىنىڭ باسىن قوسىپ وتىرعان ۇيىم ەكەنىن, الەمدىك ىشكى جالپى ءونىمنىڭ 60%-ى ۇيىمعا مۇشە مەملەكەتتەردىڭ ۇلەسىنە تيەتىنىن ايتا كەتەيىك.