استانادا كەڭەس وداعى اسكەرىنىڭ اۋعانستاننان شىعارىلعانىنا 29 جىل تولۋىنا وراي ارداگەرلەرمەن كەزدەسۋ كەشى ءوتتى. جيىندى قالالىق مەملەكەتتىك مۇراعات ۇيىمداستىردى.
جيىنعا اۋعان سوعىسىنىڭ ارداگەرلەرى, جاۋىنگەر-ينتەرناتسيوناليستەردىڭ انالارى مەن جۇبايلارى, قوعام جانە مەملەكەت قايراتكەرلەرى, تاريحشىلار مەن قورعانىس مينيسترلىگىنىڭ وكىلدەرى, ستۋدەنتتەر مەن وقۋشىلار قاتىستى. ءىس-شارانى وتكىزۋدەگى باستى ماقسات – اۋعان سوعىسىندا مەرت بولعان ساربازدار مەن جاۋىنگەرلىك ءىس-قيمىلدارعا قاتىسۋشىلاردىڭ رۋحىنا تاعزىم ەتىپ, وسكەلەڭ ۇرپاقتى ولاردىڭ ەسىمدەرىن قاستەرلەۋگە تاربيەلەۋ.
كەزدەسۋدە ۇلتتىق ءارحيۆتىڭ باس ديرەكتورى, اۋعان سوعىسى ارداگەرى جانگەلدى ماحاشوۆ ەستەلىكتەرىمەن ءبولىسىپ, ەلىمىزدە جاقسىلىق پەن بەيبىتشىلىك بولۋىن تىلەدى. سونداي-اق جيىن بارىسىندا ەلباسىنىڭ بيىلعى جولداۋىندا ايتىلعان ون مىندەتتىڭ ماڭىزدىلىعى اتاپ كورسەتىلدى.
«سوعىستىڭ زاردابى قانداي بولاتىنى ءالى كۇنگە كوز الدىمدا. سول ءبىر اۋىر جىلداردى ەسىمە الا وتىرىپ, بۇگىنگى ءبىزدىڭ بەيبىت تە تىنىش قوعامىمىزعا قاراپ شۇكىر دەيمىن. مۇنىڭ ءبارى ەلباسىنىڭ سارابدال ساياساتى مەن ەل باسقارۋداعى كورەگەندىگىنىڭ ارقاسى. سوندىقتان قازاقستاندىق ارماننىڭ ورىندالۋى جولىندا ايانباي ەڭبەك ەتۋگە ءتيىسپىز», دەدى ج.ماحاشوۆ.
كەڭەس وداعىنىڭ اسكەرى 1979 جىلعى 25 جەلتوقساندا اۋعان جەرىنە كىرگىزىلگەن بولاتىن. ون جىلعا سوزىلعان مەرزىم ىشىندە ءىس-قيمىلدارعا 22269 قازاقستاندىق قاتىستى. سولاردىڭ 924 قازا تاپسا, 1015 مۇگەدەك بولىپ ورالدى. ال 21 جاۋىنگەر ءىز-ءتۇسسىز جوعالدى. جالپى, اۋعانستانداعى سوعىسقا 620 مىڭعا جۋىق كەڭەس اسكەرى قاتىستى. قازىرگى تاڭدا ەلىمىزدە ون مىڭعا جۋىق اۋعان ارداگەرى بار. سولاردىڭ ءۇش مىڭنان استامى مۇمكىندىگى شەكتەۋلى جاندار قاتارىنا كىرەدى.
اباي اسانكەلدى ۇلى, «ەگەمەن قازاقستان»