سەنىڭ بار بولعانىڭ ءۇشىن راحمەت! سەنىڭ جوقتىعىڭا دا ءتوزىپ باعارمىن. مەنى جالعىز قالدىرعىڭ كەلىپ ەدى, قولىڭنان كەلمەدى. سەبەبى ءبىز ەكى جانعا سالىنعان ءبىر جانبىز عوي.
گيۆي سيحارۋليدزە, گرۋزين جازۋشىسى
سەن مەنەن ايىرىلۋ ءۇشىن سەبەپ ىزدەدىڭ. ويتكەنى وعان شىن سەبەپ جوق بولاتىن. جوعالتىپ الۋىم مۇمكىن بولعاندىقتان, مەن سەنى جوعالتقىم كەلمەيدى. سەن مەنىڭ ۇلكەن ماحابباتىما سەلت ەتپەدىڭ. بىراق مەن سەنى سۇيگەنىم ءۇشىن-اق باقىتتىمىن. مەنى تاعدىر تالكەگىنە تاستاپ كەتكەنىڭ ءۇشىن باقىتسىز بولعانىڭدى قالامايمىن. مەن لايىقتى ادامدى ءسۇيدىم. ءوزىڭنىڭ لايىقسىز قىلىقتارىڭ ءوزىڭدى مازالاپ تولعاندىرسىن. سەن – تىعىرىقتان شىعار جولسىڭ. سەن مەنىڭ ءومىرىمنىڭ جارقىن كۇندەرىن الىپ قويدىڭ, بىراق مەنەن ءوزىڭدى تارتىپ الا المادىڭ. مەن سەنى ءوز جۇرەگىمنىڭ تەرەڭ تۇبىنە جاسىردىم, سول جەردەن بۇكىل جان-تانىمە جايىپ تاراتتىم.
سەنى ءومىر بويى ىزدەپ, تاپتىم. قازىر سەنسىز دە كۇن كەشە الامىن, بىراق ءومىر سۇرە المايمىن. سەنىمەن بىرگە جاۋرادىم, بىراق ماعان جىلى بولدى. كۇن سەنسىز دە جارقىرايدى, بىراق جىلىتپايدى. ءبىلىپ قوي, مەن سەنى ەشقاشان ساعىنبايمىن, ويتكەنى سەنى ەشقاشان ۇمىتپايمىن.
قازاق تىلىنە اۋدارىپ دايىنداعان
قورعانبەك امانجول,
«ەگەمەن قازاقستان»