«بۇگىنگى بالا كىتاپ وقىمايدى» دەگەن پىكىرمەن كەلىسپەيمىن.
جوق, كىتاپ وقىمايتىن بالا بولمايدى. قىزىقتىرا المايتىن اتا-انا, مۇعالىمدەر, ۇلكەندەر دەۋىمىز كەرەك. كەشە دۇنيە ەسىگىن اشقان بالانىڭ ويىندا كىتاپ تۋرالى ەشقانداي تۇسىنىك جوق. ەگەر كىتاپتى ساتىپ اكەلىپ, «وي قانداي تاماشا, كەل وقيىق» دەپ ۋاقىت ءبولىپ بىرگە وقيتىن بولساق, كەز كەلگەن بالا قىزىعادى. بىراق مۇنى ەرتەرەك باستاۋىمىز كەرەك. ءتىپتى ءبىر جاستان باستاپ بالاعا كىتاپتىڭ سۋرەتتەرىن كورسەتىپ ەلىكتىرە باستاعان دۇرىس. سوندا عانا بالانى كىتاپ وقۋعا باۋلي الامىز. بۇگىندە قازاق تىلىندەگى بالالارعا ارنالعان قىزىقتى كىتاپتار جەتكىلىكسىز. قازىر سۋرەتتەرى ادەمى, قاعازى ساپالى كىتاپتار بارشىلىق. بىراق كوبىنىڭ ىشكى مازمۇنى ويعا قونا بەرمەيدى. ءتىلى اۋىر, وقيعالارى ءمانسىز ەكەنىن بايقاۋ قيىن ەمەس. سوسىن بىزدە بالالاردىڭ جۇرەگىن جاۋلاپ العان, اۋزىنان تۇسپەيتىن, كىتاپتاعى كەيىپكەرلەرى تۇستەرىنە كىرەتىن وتاندىق بالالار جازۋشىلارى نەكەن-ساياق. ءتىپتى بالالارعا «قانداي بالالار جازۋشىلارىن بىلەسىڭدەر؟» دەپ سۇراعاندا ءمۇدىرىپ قالادى. سوندىقتان بۇل ويلاناتىن ماسەلە. ۋاقىت وتە ەلەكتروندى كىتاپتار العا شىعىپ, قاعاز كىتاپتار جويىلادى دەگەن پىكىرلەر بولعان. ەگەر كىتاپ نارىعىن بارلاساق, مۇلدە ولاي ەمەس ەكەن. قايتا قازىر دامىعان ەلدەردە قاعاز كىتاپتاردىڭ جاڭا ء«دۇمپۋى» باستالدى دەۋگە بولادى. جاپونيا, اقش, ۇلىبريتنايا ەلدەرىندە كىتاپ ءوندىرىسى دامىپ جاتقانى تۋرالى اقپاراتتار مولىنان تارالىپ وتىر. وركەنيەت دامىعان رۋحاني قۇندىلىق جوعارىلاي بەرمەك. سوندىقتان ءار زاماندا ادامعا ەلەكتروندى كىتاپ ەمەس, قولعا ۇستاپ وقيتىن قاعاز كىتاپ كەرەك.
بۇگىنگى بالالارعا قانداي كىتاپتار جازىلعانى ابزال دەگەن تاقىرىپتا كوپ ويلانامىن. ەگەر الەمدەگى كىتاپ نارىعى تۋرالى اقپاراتتاردى بارلاپ سويلەيتىن بولساق, ايگىلى تاريحي تۇلعالاردىڭ بالالىق شاقتارى تۋرالى كوركەم تۋىندىلار مەن قيال-عاجايىپ كىتاپتار جاقسى وتۋدە ەكەن. ياعني ءبىز دە بالالارىمىزعا اباي, شوقان, ىبىرايدىڭ بالالىق كەزەڭدەرىن بەينەلەيتىن كوركەم ادەبي كىتاپتار ۇسىنايىق, اۋدارما ەمەس, ءتول تۋىندىلاردان ارمان-تىلەكتەردى ۇشتايتىن ەرتەگىلەردى ءتۇرلى تاقىرىپتا جازايىق. سونداي-اق ءارتۇرلى ىقشام اقپارات بەرەتىن ەنتسيكلوپەديالار دا جاقسى. بىراق ولار كوركەم تۋىندىنىڭ ورنىن باسا المايدى. سوندىقتان بالالارىمىزعا قيالىن شارىقتايتىن كوپ كوركەم تۋىندىلار كەرەك.
ءتۇرلى زەرتتەۋلەردى سارالاي كەلە, ءارى ءوز تاجىريبەمە سۇيەنىپ, بالاعا كىتاپ وقىتۋدىڭ بەس امالىن تۇيىندەدىم.
ياعني بالاعا كىتاپ وقىتۋدىڭ بەس امالى – كىتاپ وقىپ بەرۋدى ءبىر جاستان باستاۋ كەرەك, بالاعا كىتاپتى اندا-ساندا ەمەس, كۇندە ازدان وقىپ بەرۋدى ادەتكە اينالدىرۋ كەرەك, بالا ءوز بەتىنشە كىتاپ وقۋعا ادەتتەنگەنگە دەيىن, اتا-انا كىتاپتى بىرگە وقۋى كەرەك, جاقسى كىتاپتاردان تالعاپ, وي-ورىسىنە قاراي تاڭداپ بەرۋ كەرەك, كىتاپ سىيلاۋدى داستۇرگە اينالدىرۋ كەرەك.
ەندەشە, وقىرمان بولۋعا بۇلدىرشىندەرىڭىزبەن بىرگە اسىعىڭىزدار!
زارينا مۋساباەۆا, اۋداندىق ورتالىق بالالار كىتاپحاناسىنىڭ مەڭگەرۋشىسى
قوستاناي وبلىسى, امانكەلدى اۋدانى