مەملەكەت باسشىسىنىڭ «تاۋەلسىزدىك ءداۋىرى» اتتى كىتابى ەگەمەن ەلىمىزدىڭ نەگىزى قالانعان كۇننەن باستاپ بۇگىنگە دەيىنگى بارلىق يگىلىكتەر مەن جەتكەن جەتىستىكتەرىمىزدى, ونىڭ قالىپتاسۋ كەزەڭدەرىنىڭ ەرەكشەلىكتەرىن قامتىعان بىرەگەي تۋىندى.
وندا بۇكىل ءداۋىردىڭ تىنىسى, ۇلتتىڭ مۇراتى, مەملەكەتتىڭ كەمەل كەلەشەگى جاتىر. ەلىمىزدىڭ بارلىق جارقىن كورىنىستەرىن بۇگە-شۇگەسىنە دەيىن وسى ەڭبەكتەن تابا الامىز. كىتاپتا ايتىلعان وزەكتى تۇجىرىمدار قازىرگى تاريحىمىزدان سىر شەرتىپ, كەلەر ۇرپاقتىڭ رۋحاني-تانىمدىق ازىعىنا اينالادى دەپ ەسەپتەيمىن. جىلدار جىلجىپ, ۋاقىت سىرعىعان سايىن ءار سالا جاڭاشا تۇرپاتتا دامىپ, تىڭ تىنىس الادى. بۇگىنگى جەتىستىكتەر تاريح پاراقتارىنا قاتتالىپ, كىتاپتا ايتىلعان ءاربىر وي كەلەشەككە كەرۋەن تارتىپ ەلدىگىمىزدىڭ بەرىك ىرگەتاسىنا اينالاتىنىنا سەنەمىن.
ء«بىزدىڭ ازاماتتارىمىز, اسىرەسە جاستارىمىز باعدارىمىزدىڭ نە ءۇشىن جانە قالاي ايقىندالعانىن, تاۋەلسىز قازاقستاننىڭ قانداي جاعدايدا ومىرگە كەلىپ, قۇرىلعانىن, ونى قالىپتاستىرۋدا قانداي ادامداردىڭ ماڭىزدى ءرول اتقارعاندىعىن, سول كەزدە قانداي وقيعالار بولعانىن بىلۋگە ءتيىس» دەپ ەلباسى ەڭبەگىندە ايتىلعانداي, كەز كەلگەن جەتىستىكتىڭ ارتىندا تۇلعالار تۇراتىنىن, ەل باسقارۋ ءىسى جەڭىل ارقالايتىن جۇك ەمەس ەكەندىگىن ءاربىر جاس جادىنا بەرىك توقىسا دەيمىن. سول ارقىلى تاۋەلسىزدىكتىڭ قادىرىن ءبىلىپ, ءبىر كەزدەرى اتا-بابالارىمىز وسى كۇندى اڭساعان بولسا, ەندىگى ۇرپاق وسى نىعمەتتى نىعايتا ءتۇسۋ مىندەتىن تەرەڭنەن تۇيسىنسە دەگەن تىلەك بار.
رۋحاني بولمىسىن ساقتاپ, ۇلتتىق-قۇندىلىقتارىن جوعالتپاي, تەرەڭنەن تامىر العان ەل ەكەنىمىزدى بۇكىل الەم بىلۋگە ءتيىس. وسىنداي ايتۋلى ماقساتتارعا جەتۋ جولىندا جاڭا زاماننىڭ تاريحىن قالىپتاستىراتىن قايسار دا ءور, ءبىلىمدى دە بىلىكتى, جوعارى مادەنيەتكە يە, رۋحاني دۇنيەسى باي جاستاردىڭ ورنى ءبىر توبە. «تالاپتىڭ وتى ارىنداپ» تۇرعان شاقتا جاستارىمىز ءوز مۇمكىندىگىن جاقسى پايدالانىپ وتكەن كۇننەن ساباق الىپ, كەمەل كەلەشەككە قاراي بەت الۋى ءتيىس. ۇلت بولاشاعى بۇگىنگى جاس ۇرپاقتىڭ قولىندا. سوندىقتان جاستارىمىزدى رۋحاني تاربيەلەۋدە ءبارىمىز تاباندىلىق تانىتۋىمىز قاجەت. وسىلاردىڭ بارلىعى ءاربىر جاسقا ۇلگى رەتىندە كورىنىس تاۋىپ, جاسامپاز جىلداردىڭ جىلناماسىنا بالانعان تۋىندىدا ەل بولۋ جولىندا كەزىككەن كەدەرگىلەردى مۇمكىندىككە, تاۋەكەلدى تابىسقا اينالدىرعان ساتتەر ناقتى دالەلدەرمەن جازىلعان.
«تاريحي ادىلەتتىلىك سالتاناتى», «تۇعىرى بەرىك مەملەكەتتىك قۇرىلىم», «باستى قۇندىلىعىمىز – بەيبىتشىلىكتى قاستەرلەي بىلدىك», «جاڭالىقتىڭ جىلى لەبى جانە قايتا تۇلەگەن ءداستۇر», «سىرتقى ساياسات: تىڭعا تۇرەن سالعانداي», «قياعا كوز تىككەن قازاقستان بارىسى», «باياندى بولسىن باس قالا!», «ساياسي تۇراقتىلىقتىڭ جەمىسى», «تاۋەلسىزدىك رۋحىمىزدى شىڭدادى», ء«بىز الەمدىك داعدارىس سىناعىنا توتەپ بەردىك», «بۇرىن-سوڭدى بولماعان زياتكەرلىك ورلەۋ» دەپ اتالعان كىتاپتىڭ ءار بولىمىنە نازار اۋدارساق, ولاردىڭ ارقايسىسى وزىنە ءتان ۇلكەن سالماقتى ارقالاپ تۇر. بولاشاعىمىزدى بايىپتاپ, باعىتىمىزدى ايقىندايتىن باستامالاردىڭ بارلىعىن وسى تاقىرىپتاردىڭ ىشىنەن تابۋعا بولادى. راسىندا دا, تالاي قيىندىقتاردى جەڭدىك. رۋحىمىزدى قايتا جاڭعىرتىپ, سالت-سانامىزدى سارالاپ, وشكەنىمىزدى جاعىپ, وتكەنىمىزدى تانىدىق. دامۋدىڭ داڭعىل جولىنا بەت بۇرىپ مەملەكەتتىك قۋاتىن نىعايتقان ەلىمىز, تاريحي جاڭارۋ جولىندا تىڭ سەرپىن الىپ ءوز بەدەلىن قالىپتاستىردى. الەمنىڭ دامىعان وزىق ەلدەرىمەن تەرەزەسىن تەڭەستىرىپ, ولارمەن ساياسي-ەكونوميكالىق, رۋحاني-مادەني تىعىز بايلانىس ورناتتى.
ەسمۇقان وباەۆ, قازاقستاننىڭ حالىق ءارتىسى