نۇرسۇلتان نازارباەۆ «Nasdaq» كومپانياسىنىڭ پرەزيدەنتى ادينا فريدمانمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋ مەملەكەت باسشىسىنىڭ اقش-تاعى رەسمي ساپارى اياسىندا ءوتتى.
كەزدەسۋ بارىسىندا مەملەكەت باسشىسى كومپانيانىڭ قازاقستاندا جۇمىس جۇرگىزۋ جونىندەگى شەشىمىن قۇپتايتىنىن ايتتى.
– سىزدەردىڭ قازاقستاندا, «استانا» حالىقارالىق قارجى ورتالىعىندا جۇمىس ىستەۋ جونىندەگى شەشىمدەرىڭىزدى قولدايمىز. ءبىز كونستيتۋتسياعا جانە ەلىمىزدىڭ بىرقاتار زاڭىنا وزگەرىستەر ەنگىزدىك. وندا اعىلشىن قۇقىعى ەنگىزىلگەن جانە قاتىسۋشىلاردىڭ بارلىعىنا جەڭىلدىكتەر قاراستىرىلعان. جۇمىس ىستەيتىندەر ءۇشىن بارلىق قولايلى جاعدايدى جاسايمىز, – دەدى قازاقستان پرەزيدەنتى.
نۇرسۇلتان نازارباەۆ «Nasdaq» كومپانياسىنىڭ بۇل شەشىمى ونىڭ سەرىكتەستەرى مەن باسقا دا شەتەلدىك كومپانيالاردى «استانا» حالىقارالىق قارجى ورتالىعىمەن ىنتىماقتاستىقتى دامىتۋعا جەتەلەيتىنىن اتاپ ءوتتى.
ا.فريدمان قازاقستاننىڭ حالىقارالىق قارجى ورتالىعىن قۇرۋ جولىندا اتقارعان جۇمىستارىنان العان اسەرى جونىندە ايتتى.
– ءبىز «استانا» حالىقارالىق قارجى ورتالىعىن دامىتۋ جونىندەگى جوسپارلارعا وتە ءتانتى بولدىق. قارجى ورتالىعىنىڭ جۇمىسىنا قاتىستى بارلىق ماسەلەنىڭ جان-جاقتى قاراستىرىلعانىن اتاپ وتكىمىز كەلەدى. بۇل جۇمىستىڭ تىڭعىلىقتى اتقارىلعانىنا ريزامىز, – دەدى «Nasdaq» كومپانياسىنىڭ باسشىسى.
سونىمەن قاتار ا.فريدمان «استانا» حالىقارالىق قارجى ورتالىعىمەن ىنتىماقتاستىقتى باستاۋعا جانە قازاقستان بيرجاسىنىڭ جۇمىسىنا قاجەتتى وزىق تەحنولوگيالارمەن قامتاماسىز ەتۋگە ءازىر ەكەنىن ايتتى.
كەلىسسوز بارىسىندا تاراپتار بىرلەسە جۇمىس ىستەۋدىڭ جانە قازاقستاندا قولايلى ينۆەستيتسيالىق احۋال قالىپتاستىرۋ ءۇشىن ۇزاق مەرزىمدى بايلانىستاردى ورناتۋدىڭ ماڭىزدىلىعىن اتاپ ءوتتى.
سوڭىندا مەملەكەت باسشىسى نۇرسۇلتان نازارباەۆ ا.فريدماندى بيىلعى شىلدە ايىندا بولاتىن «استانا» حالىقارالىق قارجى ورتالىعىنىڭ رەسمي تۇردە اشىلۋ راسىمىنە قاتىسۋعا شاقىردى.