قوستانايدا يندۋستريالىق ايماق سالىنىپ جاتقانىن بۇرىن حابارلاعانبىز. كەلەر جىلدىڭ مامىر ايىندا وندا العاش رەت ليفت شىعارىلاتىن بولادى. ەندى وسى ايماققا رەسەيدىڭ «ۋراللتد» كومپانياسىنىڭ باسشىسى ۆالەنتين رومانوۆ «كيروۆەتس – 744 ر» تراكتورىن قۇراستىراتىن زاۋىت سالۋ جوسپارىن ايتتى.
رەسەيلىكتەردىڭ جوسپارى بويىنشا الدىمەن جىلىنا 150 تراكتور شىعارادى, ەگەر سۇرانىس ارتسا ونى 500 تراكتورعا دەيىن جەتكىزۋگە بولادى. زاۋىت قۇرىلىسى ەكى جاقتان قارجىلاندىرىلادى. وعان ءبىرىنشى كەزەكتە يندۋستريالىق ايماقتان جەر القابى ءبولىنۋى ءتيىس.
وبلىس اكىمى ارحيمەد مۇحامبەتوۆ ينۆەستوردان 1 ميلليارد تەڭگە ينۆەستيتسيا تۇسسە, جەر اۋماعىن ءبولۋ شەشىلەتىندىگىن ايتتى.
«ينۆەستيتسيا تۇسسە, جەر قازىر دە دايىن. قازىر يندۋستريالىق ايماققا ءوز كاسىپورىندارىن ورنالاستىرعىسى كەلەتىندەر سانى ارتىپ كەلەدى. ەلباسى يندۋستريالىق ايماقتى ەكونوميكالىق ەركىن ايماققا اينالدىرۋعا ۋادە ەتتى. سالىق جونىنەن ارتىقشىلىقتار جاسالادى» دەدى ارحيمەد بەگەجان ۇلى.
رەسەيلىكتەر «كيروۆەتس» تراكتورىنىڭ قوستانايدا قۇراستىرىلاتىن قۋاتى از ماركاسىن كورسەتتى. بۇل باياعى حاركوۆتە شىعارىلاتىن حتز-150 تراكتورىنىڭ جەتىلدىرىلگەن بالاماسى بولادى. باعاسى 25 ميلليون تەڭگە.
ءنازيرا جارىمبەت
«ەگەمەن قازاقستان»
قوستاناي