وتپەن ويناماس بولار
وتكەن سارسەنبىدە كورەيا حالىق-دەموكراتيالىق رەسپۋبليكاسىنىڭ قارۋلى كۇشتەرى تەڭىز ايدىنىنداعى ءوزىنىڭ وڭتۇستىك كورەيامەن اراداعى شەكاراسىنا قاراي وتىز سناريادپەن وق اتتى. قاشان دا شەكاراعا ءجىتى قاراپ وتىراتىن وڭتۇستىك كورەيا جاعى وعان اسپانعا 100 وق اتىپ, جاۋاپ بەردى. بۇل قايتارار جاۋابىمىز سەنىكىنەن كوپ بولماسا, از بولمايدى دەگەندى اڭعارتقانداي ەدى. تاعى دا ءبىر سىناپ كورگىسى كەلدى مە, پحەنيان ءوزىنىڭ ارانداتۋشىلىق ارەكەتىن جالعاستىرىپ, بەيسەنبى كۇنى تاعى دا وق اتقان. وعان سەۋلدىڭ جاۋابى جەدەل جاريالانا قويعان جوق. قالاي بولعاندا دا, وتپەن ويناماعان ءجون-اق.
اقش يراكتان كەتەدى
“ەلدەگى جاعداي تۋرالى” كونگرەسكە جولداۋىندا اقش پرەزيدەنتى باراك وباما ۇستىمىزدەگى جىلدىڭ تامىزىنىڭ اياعىنا دەيىن ءوز ەلىنىڭ اسكەرى يراكتان تولىق كەتەدى دەپ مالىمدەدى. بۇل ونىڭ سايلاۋ الدىنداعى ۋادەسىنە ساي جۇزەگە اسىپ وتىرعان شارا ەكەنى ەسكەرتىلدى.
ەندى اقش اسكەرىنىڭ ورنىنا بۇل ەلگە ەگيپەت پەن تۇركيا اسكەرى كەلەتىن بولادى. وسىعان بايلانىستى دا ءارتۇرلى پىكىر ايتىلۋدا. ءاسىرەسە, تۇرىك اسكەرىن يراكتاعى كۇرد قاۋىمى قالامايتىنى انىق. ال بۇل دەگەنىڭىز ەلدەگى كۇردەلى جاعدايدى ودان ءارى شيەلەنىستىرىپ جىبەرۋى ابدەن مۇمكىن.
وپپوزيتسيونەرلەردى دارعا استى
جۇما كۇنى يراندا ءولىم جازاسىنا كەسىلگەن 11 وپپوزيتسيونەردىڭ ەكەۋى – مۇحاممەد رەزا ءالي زاماني مەن اراش راحمانيپۋر دارعا اسىلدى. ال قالعان توعىزىنىڭ جازانى جۇمسارتۋ جونىندەگى وتىنىشتەرى قارالىپ جاتقان كورىنەدى.
بۇلاردىڭ بارلىعى بىلتىرعى ماۋسىمدا وتكەن يرانداعى پرەزيدەنت سايلاۋىنان كەيىنگى باس كوتەرۋدە قاماۋعا الىنعاندار ەكەن. سونداي-اق جىل اياعىنداعى جەلتوقسانداعى باس كوتەرۋگە قاتىسقان بەس ادامدى دا ءولىم جازاسى كۇتىپ تۇر. ارينە, باسقا جۇمساقتاۋ جازالار ءوز الدىنا.
ارداگەرلەر ستيپەنديا الادى
قىرعىزستاندا ەل پرەزيدەنتى قۇرمانبەك باكيەۆتىڭ جارلىعى بويىنشا ۇلى وتان سوعىسىنا قاتىسقان ارداگەرلەرگە ومىرلىك ستيپەنديا تاعايىندالدى. راس, ونىڭ مولشەرى كوپ تە ەمەس – ءۇش مىڭ سوم, دوللارعا شاققاندا, 68 دوللار. بۇل ەلدە سول سوعىس ارداگەرلەرى دە كوپ قالماپتى – 3 مىڭداي ەكەن. سوندا اي سايىن ولارعا 200 مىڭ دوللارداي قاراجات كەتەتىن كورىنەدى. ەڭ الدىمەن جۇرت نيەتكە ريزا.
مينيستر ءۇشىن تالاس
ۋكراينادا پرەزيدەنت سايلاۋىنىڭ ەكىنشى تۋرى (7 اقپاندا) قارساڭىندا قىزىق جاعداي قالىپتاستى. ەل پارلامەنتى ىشكى ىستەر ءمينيسترى يۋري لۋتسەنكونى قىزمەتىنەن السا, پرەمەر-مينيستر يۋليا تيموشەنكو ونى ءمينيستردىڭ ورىنباسارى ەتىپ تاعايىنداپ (ورىنباساردى تاعايىنداۋ ۇكىمەت باسشىسىنىڭ قۇزىرىندا), وعان مينيستر مىندەتىن اتقارۋدى جۇكتەدى. ءوز شەشىمىن تيموشەنكو سايلاۋدى زاڭدى تۇرعىدا وتكىزۋ ءۇشىن دەسە, پارلامەنت كەرىسىنشە, لۋتسەنكونىڭ سايلاۋ بيۋللەتەندەرىن باساتىن تيپوگرافيانى زاڭسىز باسىپ الۋعا ارەكەت جاساعانىن ايىپتايدى.
يمام حيدجابقا قارسى
فرانتسيا ۇكىمەت ورىندارى ەل زاڭنامالارىنا سۇيەنە وتىرىپ, قوعامدىق ورىنداردا ايەلدەردىڭ حيدجاب نەمەسە ءپارانجى كيۋىنە تىيىم سالاتىن شەشىم قابىلدادى. ونى ماقۇلدايتىندار دا, قارسىلار دا بار. جۇرتتى تاڭداندىرعان جاي – سول فرانتسياداعى ءبىر مەشىتتىڭ حاسەن شالگۋمي دەگەن يمامى حيدجاب كيۋگە ءۇزىلدى-كەسىلدى قارسى بولعان.
ونىڭ پىكىرىنشە, ادامنىڭ ءجۇزىن تولىق جاۋىپ تۇراتىن حيدجاب يسلامنىڭ دا, قۇراننىڭ دا تالابىندا جوق. شاشتى عانا جاباتىن ورامال جەتكىلىكتى. حيدجاب دەگەن ايەلدەر ءۇشىن تۇرمەمەن تەڭ, دەيدى يمام.
ماسكەۋدە “زاڭداعى ۇرىلار” كوپ
الەمدى شۋلاتقان “زاڭداعى ۇرى” دەپ اتالعان ياپونچيك قايتىس بولعاننان كەيىن دە ونداي قىلمىس كوسەمدەرى رەسەيدە از ەمەس ەكەن. رەسەي ىشكى ىستەر مينيسترلىگىنىڭ قىلمىستى اشۋ دەپارتامەنتىنىڭ باستىعى يسكاندار گاليموۆتىڭ ايتۋىنشا, ولاردىڭ سانى – 149.
مۇنداي قىلمىس كوسەمدەرىنىڭ ەڭ كوپ شوعىرلانعان جەرى – ماسكەۋ, وندا 42 “مىقتى” بار. قۇقىق قورعاۋ ورىندارى ولاردىڭ اتى-جوندەرىن دە, قايدا تۇراتىنىن دا بىلەدى. وزدەرىندەي ءبىر مىقتى قايتىس بولسا, ولاردىڭ ءبارى جينالىپ, قاستەرلەپ جەرلەيتىن ءداستۇرى دە بار. بىراق ولاردى ەشكىم ۇستامايدى. قىلمىستارىن دالەلدەي الماي ما, ايتەۋىر ولارعا تيىسپەيدى. تەك قانا انىقتالعان ءبىر جاي – سوڭعى كەزدە ولاردىڭ كاپيتالى كوبەيىپتى, نەگىزىنەن ولار گرۋزين ۇلتىنان كورىنەدى.
ازىرلەگەن ماماديار جاقىپ.