«استانا» ۆەلوكومانداسى ءۇشىن بيىلعى جىل جەڭىلىسى مەن جەڭىسى قاتار ءورىلدى دەپ ايتۋعا بولادى. جىلدىڭ العاشقى جارتىسى شىم-شىتىرىق وقيعالارعا تولى بولدى. كومانداعا كوز ءتيدى مە, الدە ءسوز ءتيدى مە, ايتەۋىر كوپ جارىستا جولى بولا قويعان جوق. الايدا, كەيىننەن گراند-تۋردىڭ كەزەڭدەرىن جەڭىپ, ماڭدايدان اششى تەردى ءبىر ءسۇرتتى. كوماندانى جەڭىسكە باستاپ جۇرگەن كوماندا باسشىسى الەكساندر ۆينوكۋروۆ قاۋىرت شارۋادان قولى قالت ەتكەن ساتتە «ەگەمەن قازاقستانعا» ماۋسىمدى قورىتىندىلاپ, سۇحبات بەرگەن ەدى.
– 2017 جىلدى «استانا» ۆەلوكومانداسى جاڭارتىلعان كۇيدە باستادى. ۆەلوسيپەدتەر, كوماندانىڭ جەيدەسى جانە شاباندوزدار ءتىزىمى دە وزگەردى. جالپى, كوماندا الدىنا قويعان ماقساتتارعا جەتە الدى ما؟
– راسىمەن دە, ءبىز 2017 جىلدى ءتىپتى جاڭاشا باستادىق. ۆەلوسيپەدتەن باستاپ ۇستىمىزگە كيەتىن جەيدەلەرگە دەيىن جاڭارتتىق. شاباندوزدار قۇرامىن دا وزگەرتتىك. الايدا, جىلدىڭ باسى ءبىز ءۇشىن ساتسىزدىكپەن ءورىلدى. تاجىريبەلى شاباندوزىمىز ميكەلە سكارپونيدىڭ قازاسى كوماندا مۇشەلەرىنە قاتتى اسەر ەتتى. جارىستاردا شاباندوزدارىمىز ءجيى جاراقات الىپ, تاس جولداردا وماقاسا قۇلاي بەردى. بىراق, جىلدىڭ ەكىنشى جارتىسىندا بارلىعى ءوز ورنىنا كەلىپ, كومانداعا ساتتىلىك جولداس بولا باستادى. كولۋمبيالىق جاس شاباندوزىمىز ميگەل انحەل لوپەستىڭ تىنىسى اشىلدى. ياكوب فۋلسانگ ءبىزدىڭ كوماندا ساپىنداعى العاشقى جەڭىسىنە قول جەتكىزدى. ال وسى جەڭىستەردىڭ ىشىندە كەۋدە كەرىپ ماقتانىش ەتەتىن ايتۋلى ءبىر جەتىستىك بار. ول – الەكسەي لۋتسەنكونىڭ گراند-تۋردا كەزەڭدى جەڭگەنى. ءىرى دودالاردى جوعارعى دەڭگەيدىڭ شاباندوزدارى عانا جەڭەتىنىن بىلەسىزدەر, دەمەك ءبىزدىڭ ەلدە سونداي ءبىر شاباندوز پايدا بولدى دەگەن ءسوز.
– كوماندا ساپىنداعى شاباندوزدار جايلى ءسوز بولعاندا قازاقستاندىق جىگىتتەردىڭ كوبەيگەنى قۋانتادى. ۇجىمنىڭ ۇشتەن ءبىرى وتاندىق ۆەلوسپورتتىڭ تۇلەكتەرى ەكەنى بەلگىلى. ولاردىڭ ىشىندە قايسىسىنان زور ءۇمىت كۇتەسىز؟
– الەمدىك ۆەلوسپورتتا اتاق-ابىرويى جوعارى جارىستارعا قاتىساتىن «استانا» كومانداسىنىڭ ساپىندا وسال شاباندوز بولماۋى ءتيىس. دەمەك, ەلىمىزدەگى ۆەلوسپورتتىڭ دەڭگەيى كوتەرىلدى دەپ ايتا الامىز. وتە تىڭعىلىقتى تەكسەرىستەن كەيىن, سىننان وتكەن سپورتشىلاردى عانا ىرىكتەپ, كومانداعا قوسامىز. مىسالعا, كوماندامىز قۇرىلعالى بەرى 268 رەت جەڭىسكە جەتتىك. سونىڭ 25 پايىزى (68 جەڭىس) قازاقستاندىق شاباندوزداردىڭ ەنشىسىندە. ال قازىر كومانداداعى جاستار جايلى ايتاتىن بولساق الەكسەي لۋتسەنكودان زور ءۇمىت كۇتەمىز. ول ءوزىنىڭ تالانتتى شاباندوز ەكەندىگىن بيىل دالەلدەپ بەردى. ودان بولەك وزگە دە جىگىتتەردى ايتا كەتۋگە بولادى. مىسالى, جاندوس بيجىگىتوۆ پەن باحتيار قوجاتاەۆ كۇن ساناپ شەبەرلىكتەرىن ارتتىرىپ كەلەدى. ولاردىڭ جەكە ناتيجەلەرى دە كۇشەيدى. ءبىز ۆەلوسپورتتىڭ ەڭ الدىمەن كوماندالىق سپورت ەكەنىن ۇمىتپاۋىمىز كەرەك. مۇندا ءبىر شاباندوزعا قالعان كوماندالاستارى كومەكتەسەدى. سول سەكىلدى وتاندىق سپورتشىلار اراسىنان تاماشا «گرەگوريلەر» ءوسىپ شىقتى. تاۋلى كەزەڭدە دە, جازىقتى دالادا دا, كەدىر-ءبۇدىرلى جولداردى دا ءبىر دەممەن ءجۇرىپ وتەتىن جىگىتتەردى دايىنداپ الدىق. ەندى ولار جاقىن ارادا قازاقستان ۇلتتىق قۇراماسىنىڭ ساپىندا جەمىستى ونەر كورسەتىپ, ناتيجە بەرە باستاۋى ءتيىس.
– ميكەلە سكارپونيدىڭ قازاسى, كاتالدو, كانگەرت, فۋلسانگ سەكىلدى كوشباسشىلاردىڭ جاراقاتتارى بولماعاندا كوماندا قانداي ناتيجەلەر كورسەتەر ەدى دەپ ويلايسىز.
– ءبىزدىڭ ۇجىم گراند-تۋرلاردا جەڭىسكە ۇمتىلاتىن ازۋلى كوماندانىڭ ءبىرى. جىل سايىن «تۋر دە فرانس», «دجيررو», «ۆۋەلتا» سەكىلدى دودالاردى جەڭۋ ءۇشىن بارىمىزدى سالامىز. بيىلعى جىلدىڭ باسىندا نەگىزگى كۇشتى «دجيرروعا» سالامىز دەپ شەشتىك. كاپيتان بولىپ فابيو ارۋ ءجۇرسىن دەدىك. ونىڭ قاسىنا كومەككە كىلەڭ سايدىڭ تاسىنداي مىقتىلارىمىزدى سايلادىق. ولاردىڭ ىشىندە سكارپوني, كانگەرت, كاتالدو بولدى. الايدا, ءساۋىر ايىندا كاپيتان بولادى دەگەن ارۋىمىز اياقاستى جاراقات الدى. ونىڭ ورنىنا بىردەن ميكەلە سكارپوني ورنىقتى. ءوزىنىڭ سپورتتىق بابىنداعى تاجىريبەلى شاباندوزىمىز گراند-تۋر باستالۋعا 2-3 كۇن قالعاندا اۆتوكولىكپەن قاقتىعىسىپ, مەرت بولدى. بۇل اۋىر قازا كۇللى كومانداعا قاتتى اسەر ەتتى. ءسويتىپ جارىسقا كاپيتانسىز شىقتىق. سوسىن جارىس بارىسىندا تانەل كانگەرت جوعارعى ناتيجە كورسەتىپ كەلە جاتقان-دى. بىراق, بولمايتىن ءبىر جەردە قاقتىعىسىپ, جاراقات الدى دا, جارىستان شىعىپ قالدى. مىنە, وسىنداي ساتسىزدىكتەر سەرياسى بولماعاندا جەڭىس ءبىزدىڭ قولىمىزدا تۇر ەدى.
– بيىل «الماتى تۋرى» جارىسى ءبىرىنشى رەت ەكى كۇنگە سوزىلدى. وسى جارىستىڭ بولاشاعى جايلى ايتىپ وتسەڭىز.
– ۆەلوشاباندوزداردىڭ حالىقارالىق قاۋىمداستىعى وسى جارىستى وتكىزۋ ءۇشىن جارىستار كەستەسىنە ەنگىزۋگە دايىن. كۇنتىزبەدەن ورىن الۋدىڭ ءوزى وڭاي ەمەس. ويتكەنى جىل بويى جارىستار ءبىرىنىڭ ارتىنان ءبىرى كەزەكتەسىپ ءوتىپ جاتادى. بىراق, تۋرا سول كۇندەر كەلەسى جىلى «تۋر دە فرانستىڭ» باستالاتىن ۋاقىتىنا ءدال كەلىپ تۇر. قازاقستان ۆەلوسپورت فەدەراتسياسىنىڭ پرەزيدەنتى دارحان امان ۇلى كالەتاەۆ وسى جاقىندا UCI پرەزيدەنتىمەن كەزدەستى. مەنىڭ جالعىز ءوتىنىشىم وسى جارىستىڭ كۇندەرىن ناقتىلاپ الۋ بولاتىن. جاقىن ارادا جاۋابى دا شىعىپ قالار. جارىستى پرو-تۋر دەڭگەيىنە كوتەرتۋىمىز كەرەك. ونداي كۇنگە جەتسەك «الماتى تۋرىنا» الەمدىك تۋردىڭ دەڭگەيىندەگى 10 كوماندا قاتىسار ەدى. جارىستىڭ سىياقىسى كوتەرىلىپ, ابىرويى دا وسەدى. ەگەر ۋاقىتى وزگەرىسسىز قالاتىن بولسا, وندا قىركۇيەك ايىنىڭ سوڭىندا جارىستى تاعى دا ەكى تۋرعا ءبولىپ, «استانا-الماتى» دەپ وتكىزۋگە دە بولادى. ول ءۇشىن ورتاسىندا ءبىر كۇن دەمالىس بولۋى كەرەك. وسى ماسەلەنى جاقىن ارادا كەڭەسە كەلىپ, شەشەتىن بولامىز.
– «استانا» كومانداسىنان فابيو ارۋدىڭ كەتىپ قالعانى قىزىق بولدى. ەندى كەلەسى جىلى كومانداعا كىمدەر الىنادى؟
– 2018 جىلعى قۇرامىمىز تولىقتاي جاساقتالىپ قويدى. ترانسفەرلىك ماسەلەلەردىڭ بارلىعى شەشىلدى. ەندى 8 جەلتوقسان كۇنى استانادا تانىستىرىلىم وتكىزەتىن بولامىز.
– «اstana» Pro Team الەمدىك ۆەلو-ساحناسىندا تالانتتاردىڭ ورداسىنا اينالعانداي كورىنەدى. جىل سايىن 2-3 تالانت جارق ەتىپ كورىنەدى. كولۋمبيالىق لوپەستى مەنەدجەرلەر «فەنومەن» دەپ باعالادى. وسى جاقىندا پەلو بيلباومەن كەلىسىم ۇزارتىلدى. كەلەسى جىلى وسى جىگىتتەردىڭ قايسىسىنان جوعارعى ناتيجە كۇتەسىز؟
– ءيا, راسىمەن دە ميگەل انحەل لوپەستى «فەنومەن» دەپ ايتا الامىن. ءبىز بۇل جىگىتتەن جوعارى جەتىستىكتەر كۇتەمىز. ودان بولەك, بىزدە تۇراقتى تۇردە مىقتىلار قاتارىندا جۇرەتىن ياكوب فۋلسانگ بار. سونداي-اق تاۋلى ايماقتا تاماشا جۇيتكيتىن تانەل كانگەرت, پەلو بيلباو, داريو كاتالدو, لۋيس لەون سانچەس سەكىلدى سايىپقىراندارعا سەنىم ارتامىز. ال كلاسسيكالىق جارىستارعا شىعاراتىن ميحاەل ۆالگرەن, ءوزىمىزدىڭ جىگىتتەردەن الەكسەي لۋتسەنكو, دميتري گرۋزدەۆ دايىن. الەكسەي اپتالىق جارىستاردا كاپيتان بولىپ شىعادى دەپ وتىرمىز. ودان بولەك بيىلعىداي گراند-تۋرلاردا كەزەڭدەرگە تالاسادى. دەمەك, ءبىزدى وتە قىزىقتى ماۋسىم كۇتىپ تۇر. ءبىزدىڭ كومانداعا جانكۇيەر بولىڭىزدار. العا, «استانا»!
– اڭگىمەڭىزگە راحمەت.
اڭگىمەلەسكەن ەرمۇحامەد ماۋلەن