الەم ەلدەرىنىڭ اۋىل شارۋاشىلىعىنداعى جەتىستىكتەرىن استاناعا جينادى. استانا قالاسىندا «قازاگرو-2017» جانە «قازفارم-2017» ءداستۇرلى حالىقارالىق اۋىلشارۋاشىلىق كورمەسى جۇمىسىن باستادى.
وعان الەمنىڭ 32 ەلىنەن 300-گە جۋىق اۋىلشارۋاشىلىق كومپانياسى جينالدى. بيىل سەگىزىنشى رەت ءوتىپ جاتقان ايتۋلى شارانىڭ اياسى جىلدان جىلعا كەڭەيىپ كەلەدى. اۋىل شارۋاشىلىعى مينيسترلىگى, استانا قالاسى اكىمدىگى مەن «قازاگرو» ۇلتتىق باسقارۋشى حولدينگى» اق-تىڭ رەسمي قولداۋىمەن جۇزەگە اسقان كورمەنى «ExpoGroup» حالىقارالىق كورمە كومپانياسى ۇيىمداستىرۋدا.
ءۇش كۇنگە جالعاساتىن كورمەنىڭ اۋماعى 14 000 شارشى مەتردى الىپ جاتىر. بۇل جيىن ەڭ الدىمەن ەلىمىزدىڭ مال جانە اۋىلشارۋاشىلىق ونىمدەرىن وندىرۋدە نەگىزگى قوزعاۋشى كۇش بولماق. شارانىڭ اشىلۋ سالتاناتىندا اۋىل شارۋاشىلىعى ۆيتسە-ءمينيسترى ەرلان نىسانباەۆ پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆتىڭ قۇتتىقتاۋ ءسوزىن جەتكىزىپ, كورمەگە قاتىسۋشىلارعا ساتتىلىك تىلەدى.
«اگرارلىق سالا – قازاقستانداعى جەتەكشى سالالاردىڭ ءبىرى. ول ەلىمىزدىڭ ەكونوميكالىق قاۋىپسىزدىگىن قامتاماسىز ەتۋدە ۇلكەن ءرول اتقارادى. مەملەكەت باسشىسى نۇرسۇلتان نازارباەۆتىڭ باستاماسىمەن قابىلدانعان وسى سالانى دامىتۋدىڭ 2017-2021 جىلدارعا ارنالعان باعدارلاماسى وتاندىق وندىرۋشىلەردى قولداۋدىڭ باستى قۇجاتى بولىپ وتىر. بۇل جوبا بويىنشا بۇگىنگى حالىقارالىق كورمەنىڭ وتاندىق تاۋار وندىرۋشىلەرگە بەرەرى مول دەپ سانايمىن. تاۋار اينالىمى ءورىسىنىڭ كەڭەيۋى مەن وندىرىستەر اراسىنداعى ارىپتەستىك بايلانىستىڭ دامۋى سونىڭ ايعاعى بولادى دەگەنگە سەنەمىن», دەدى ەرلان نىسانباەۆ.
ۆيتسە-ءمينيستردىڭ سوزىنشە, ەلىمىزدە اگروونەركاسىپتىك كەشەندى دامىتۋ مەملەكەتتىك باعدارلاماسى اياسىندا يمپورتتى الماستىرۋ باعىتى ايقىندالعان.
وسى باعدارلامانىڭ نەگىزگى مىندەتتەرىنىڭ ءبىرى باسەكەگە قابىلەتتى ءونىمنىڭ وتاندىق وندىرۋشىلەرىن قولداۋ بولىپ تابىلادى. وسى اسپەكتىدە «كازاگرو-2017», «KazFarm-2017» كورمەسى وتاندىق اگروبيزنەستىڭ شەتەلدەرمەن ىنتىماقتاستىقتى كەڭەيتۋگە, ساۋدا-ەكونوميكالىق قاتىناستاردى دامىتۋعا, ارىپتەستىك ورناتۋعا دايىندىعى تۋرالى قازاقستان رەسپۋبليكاسىنىڭ الەۋەتىنەن حاباردار ەتەدى. «تاياۋدا پارلامەنت ماجىلىسىندە «جول كارتاسى» تانىستىرىلدى, ول ارقىلى جاقىن اراداعى وتاندىق تەحنيكانى شىعارۋدىڭ تەحنيكالىق اگرەگاتى مەن اۋىلشارۋاشىلىق كولىكتەرى پاركىن انىقتايدى. مەملەكەتتىك قولداۋ دا قاراستىرىلاتىن بولادى. ءبىز اۋقىمدى ءىستىڭ الدىندا تۇرمىز. بۇگىندە وتاندىق ماشينا جاساۋدى دامىتۋسىز اۋىلشارۋاشىلىعىن ورىستەتۋ الەۋەتى تومەن بولماق», دەدى ە.نىسانباەۆ.
الىس-جاقىن شەتەلدەردەن جانە وتاندىق تاۋار وندىرۋشىلەردەن قۇرالعان بارلىعى 300-دەن استام كومپانيا استاناداعى «كورمە» ورتالىعىندا ءۇش كۇن بويى ءتۇرلى شارالاردى, كەلىسىمشارتتار مەن بيزنەس جوسپارلاردى, تاجىريبە الماسۋلار مەن كەلىسسوزدەردى تالقىلايتىن بولادى.
كورمەگە قاتىسۋعا ارنايى كەلگەن قاتار مەملەكەتى مۋنيتسيپاليتەت جانە قورشاعان ورتانى قورعاۋ ءمينيسترىنىڭ ورىنباسارى فالەح بين ناسەر ءال-تاني بيىل بۇل كورمەگە العاش رەت قاتىسقاندارىن, دەگەنمەن, اۋىلشارۋاشىلىق تاۋارىن ءوندىرۋ قاتار ءۇشىن جات ەمەستىگىن اڭگىمەلەدى. ء«بىز قازاقستانمەن ەكى اراداعى بۇرىننان جالعاسىپ كەلە جاتقان ءوزارا ءتيىمدى ىنتىماقتاستىقتى جەتىلدىرە تۇسەمىز. وسى كورمە بارىسىندا ءبىز ەڭ وزىق تاجىريبەلەر مەن اۋىل شارۋاشىلىعى سالاسىنداعى سوڭعى ۇلگىدەگى جاڭا تەحنولوگيالارمەن تانىساتىن بولامىز», دەدى فالەح بين ناسەر ءال-تاني.
كورمەدە اۋىل شارۋاشىلىعى مەن تاماق ونەركاسىبى سالاسىنداعى جەتىستىكتەر, سونداي-اق مال شارۋاشىلىعىنداعى يننوۆاتسيالار ۇسىنىلادى. جىل سايىنعى ءارتۇرلى ەلدەردىڭ ۇلتتىق ستەندتەرىنىڭ قاتارىن بيىل يسپانيانىڭ جانە رەسەي فەدەراتسياسىنىڭ تۇمەن وبلىسى ساۋدا-ونەركاسىپتىك پالاتاسىنىڭ ستەندتەرى تولىقتىرعان. نەگىزگى پاۆيلوندى «اۋىلشارۋاشىلىق تەحنيكاسى, جابدىق جانە ىلەسپە تاۋارلار» بلوگى العان.
مۇندا تەحنيكانىڭ ستاتسيونارلىق جانە جەكە كورسەتىلىمدەرى, سونداي-اق اۋىلشارۋاشىلىق كلاستەرلەرىنىڭ كورمەسى وتۋدە. «وسىمدىك جانە كوكونىس شارۋاشىلىقتارى» بلوگىندا كومپانيالار وسىمدىكتەر سەلەكتسياسىنىڭ ادىستەرىن, ەڭ جاڭا تەحنولوگيالارىن, سونداي-اق وسىمدىك سۇرىپتارىن ۇسىنعان. «مال شارۋاشىلىعى» بولىمىندە قازاقستاندا وسىرىلەتىن اسىل تۇقىمدى ءىرى قارا مال تۇرلەرىمەن تانىسۋعا بولادى.
اسحات رايقۇل, «ەگەمەن قازاقستان»
سۋرەتتەردى تۇسىرگەن ەرلان ومار, «ەگەمەن قازاقستان»