قىتاي كوممۋنيستىك پارتياسى ورتالىق كوميتەتىنىڭ 19-شى شاقىرىلىمىنداعى 1-ءشى پلەنۋم ءوتىپ, وندا قىتاي حالىق رەسپۋبليكاسىنىڭ توراعاسى سي تسزينپين قكپ ورتالىق كوميتەتىنىڭ باس حاتشىسى بولىپ قايتا سايلاندى. سونىمەن قاتار ول اسكەري كەڭەستىڭ توراعاسى, قىتاي حالىق-ازاتتىق ارمياسىنىڭ قولباسشىسى بولىپ سايلاندى.
پلەنۋم بارىسىندا قىتاي كوممۋنيستىك پارتياسى ورتالىق كوميتەتىنىڭ ساياسي بيۋروسى دا ەلەۋلى وزگەرىستەرگە ۇشىرادى: بۇرىنعى قۇرامنان سي تسزينپيننەن باسقا قحر مەملەكەتتىك پرەمەرى لي كەتسيان قالدى. جاڭا ساياسي بيۋرونىڭ قۇرامىنا 25 ادام ەندى. ولاردىڭ بىرەۋى عانا ايەل. سونداي-اق قكپ ورتالىق كوميتەتىنىڭ جاڭا قۇرامىنا 202 ادام سايلاندى.
ەسكە سالساق, قىتاي كوممۋنيستىك پارتياسىنىڭ XIX سەزى ءوز جۇمىسىن 18 قازان كۇنى باستاعان بولاتىن. بۇل القالى جيىنعا ارنايى شاقىرىلعان قوناقتاردى قوسا ەسەپتەگەندە 2,3 مىڭ دەلەگات قاتىستى. سەزد بارىسىندا تورالقادا ەلدىڭ قازىرگى باسشىلارىمەن بىرگە بۇرىنعى قكپ ورتالىق كوميتەتىنىڭ باس حاتشىلارى مەن قحر مەملەكەتتىك كەڭەسىنىڭ پرەمەرلەرى تسزيان تسزەمين, چجۋ جۋنتسزي, حۋ تسزينتاو, ۆەن تسزياباو جانە لي پەن قاتار وتىردى.
سەزدىڭ دەلەگاتتارى قىتاي كوممۋنيستىك پارتياسىنىڭ جارعىسىنا ەنگىزىلگەن وزگەرىستەردى بەكىتتى. ونىڭ ىشىندەگى ماڭىزدىسىنىڭ ءبىرى دەپ پارتيانىڭ باستى قۇجاتىنىڭ ماتىنىنە سي تسزينپين ەسىمىنىڭ جازىلعانىن ايتۋعا بولادى. بۇل دەگەنىڭىز, قحر-ءدىڭ قازىرگى توراعاسىن اتاقتى ماو تسزەدۋن جانە دەن سياوپينمەن قاتار قويعان تاريحي وقيعا. تاعى ءبىر اتاپ وتەتىن جايت, سي تسزينپيننەن بۇرىن پارتيا قۇجاتىنا كوزى تىرىسىندە ەسىمى جازىلعان ءبىر عانا باسشى بولدى, ول – ماو تسزەدۋن.
باستى جيىندا قىتايدىڭ سوتسياليزم يدەياسىنان باس تارتپايتىندىعى ايتىلدى. قىتاي باسشىسى سي تسزينپين سەزدە جاساعان بايانداماسىندا ەكونوميكانىڭ نەگىزگى تىرەگى ىشكى سۇرانىستى ىنتالاندىرۋ جانە جاڭا تەحنولوگيالار ەكەندىگىن اتاپ ايتتى. سەزدە الداعى از عانا جىل ىشىندە ەلدە كەدەيشىلىكتى جويىپ, 2035 جىلعا قاراي «ورتا داۋلەتتى قوعام» قۇرۋ جوسپارى جاريا ەتىلدى.
سونىمەن قاتار سي تسزينپين قىتاي 2035 جىلعا قاراي اقش-تى الەمدىك ەكونوميكاداعى ءبىرىنشى ورنىنان ىسىرۋى ابدەن مۇمكىن دەگەندى ەمەۋرىنمەن ءبىلدىردى. «قىتاي ەكونوميكاسى الەمدەگى وزىق ەلدەر اراسىنداعى كوشباسشىلىق پوزيتسياسىنا يە بولا وتىرىپ, ورتاشا جوعارى ءوسۋ ەكپىنىن ساقتاپ قالا الدى. 54 ترلن يۋاننان 80 ترلن يۋانعا دەيىن وسكەن ءىجو كورسەتكىشى بويىنشا قىتاي الەمدە ەكىنشى ورىنعا نىق تابان تىرەدى», دەپ مالىمدەدى قىتاي باسشىسى. سونداي-اق ول قىتايدىڭ الەمدىك ەكونوميكانىڭ وسۋىنە قوسقان ۇلەسى 30 پايىزدان اسقانىن دا اتاپ ءوتتى.
سەزدە جاساعان بايانداماسىندا قحر مەملەكەتتىك پرەمەرى لي كەتسيان تۋريزم ماسەلەسىنە باسا ماڭىز بەردى. اقىلى دەمالىس ءتۇرىن ەنگىزۋدى قازىردەن باستاپ, وسىعان بايلانىستى ىشكى تۋريزم جانە كولىك ينفراقۇرىلىمىنا ينۆەستيتسيا قۇيۋ جوسپارلانعانىن تىلگە تيەك ەتتى. ء«بىز كەلە جاتقان جاپپاي تۋريزم ءداۋىرىن قارسى الۋعا دايىن بولۋىمىز كەرەك», دەدى پرەمەر.
قىتايدىڭ جاڭا ونجىلدىققا ارنالعان ەكونوميكالىق ءوسۋ جوسپارىندا ورتالىق جانە باتىس پروۆينتسيالاردى كوتەرۋ جوسپارى دا ەرەكشە نازار اۋدارادى. سونىمەن قاتار قىتاي كوممۋنيستىك پارتياسى الداعى ۋاقىتتا قالالار مەن سەلولارداعى تىركەۋدى راسىمدەۋگە قويىلعان شەكتەۋلەردى جۇمسارتپاق. ەسكى تۇرعىن ءۇي قورىنداعى 6 ملن پاتەردى قايتا جاڭارتۋ دا جوسپاردا بار ەكەنى ايتىلدى.
قىتاي كپ-نىڭ XIX سەزىندە پارتيانىڭ بەس جىلداعى جۇمىسىنىڭ قورىتىندىسى قارالىپ, قىتايداعى جانە باسقا دا ەلدەردەگى قوعامدىق-ەكونوميكالىق جانە ساياسي احۋال تالقىلاندى. سونداي-اق ەلدىڭ جاقىن جىلدارداعى ستراتەگيالىق دامۋ جولى ناقتىلاندى. جالپى, قىتاي كپ-نىڭ XIX سەزى الەم ەلدەرىنىڭ زور قىزىعۋشىلىعىن تۋدىردى. اسپاناستى ەلىنىڭ القالى جيىنىنان الەمنىڭ 134 ەلىنەن كەلگەن 1818 جۋرناليسىمەن بىرگە قىتايلىق مىڭنان استام جۋرناليست اقپارات تاراتتى.
قايرات ءابىلدا, «ەگەمەن قازاقستان»