لاتىن قارپىنە كوشۋ جونىندە كوپتەن بەرى ايتىلىپ كەلە جاتىر. سوڭعى كەزدەرى بۇل ماسەلە ەل كولەمىندە قىزۋ تالقىلانىپ جاتقان جايى بار. قازىر ءبىز لاتىن قارپىنە قايتا ورالىپ جاتىرمىز دەۋگە بولادى.
مەنىڭشە, لاتىن قارپىنە كوشۋدىڭ ەشقانداي قيىندىعى جوق. كيريلل جازۋىن دا, اراب جازۋىن دا باستان وتكەرگەنبىز. قازىر لاتىن قارپىنىڭ وزگەشەلىگى, باسقا جازۋلاردان ارتىقشىلىعى, ءبىزدىڭ تابيعاتىمىزعا جاقىندىعى تۋرالى پىكىرلەر ايتىلىپ جاتىر. پىكىرلەردىڭ كوپ بولعانى دۇرىس. الايدا سالماقتى پىكىرلەردى كولدەنەڭ كوك اتتىلار ەمەس, مامان ادامدار جەتكىزسە, سوڭعى ءسوزدى سولار ايتسا دەگەن تىلەك بىلدىرگىم كەلەدى. ء«بىر ءارىپ – ءبىر دىبىس» دەگەن جوبا كوڭىلدەن شىعادى. دەگەنمەن كەيبىر عالىمدار تاراپىنان ديگراف پەن ءبىر ءارىپ – ءبىر دىبىس جۇيەسىن قاتار قولدانايىق دەپ جاتقاندار دا بار. ءوز باسىم قازاق زيالىلارى ۇستانعان جول ءبىر ءارىپ – ءبىر دىبىس جۇيەسىن تولىق قۇپتايمىن. ەندى تەزىرەك بەكىتسە ءارى قاراي جۇمىس جۇرە بەرەدى دەپ ويلايمىن.
قورىتا ايتقاندا, لاتىن قارپىنە كوشۋ قازاق قوعامى ءۇشىن اسا قاجەت دۇنيە. بۇل – الەمدىك ءۇردىس. دۇنيە ءجۇزى وسىعان بارا جاتىر. ءبىز جەكە ارال بولىپ, وزىمىزبەن ءوزىمىز قالا المايمىز. قايتا سوعان ەنە ءبىلۋىمىز, بويلاي ءبىلۋىمىز كەرەك. كەيىنگى ۇرپاقتىڭ ساناسىنا سىڭىرگەنىمىز ءجون. بىراق بۇل ىستە اسىعىستىق تانىتۋعا بولمايدى. ەلدىڭ نارازىلىعىن تۋدىراتىن, ۇلت ارازدىقتى قوزدىراتىن جاعدايلاردان بويدى اۋلاق ۇستاپ, بايىپپەن, اقىلمەن, سالقىن سابىرمەن شەشكەنىمىز ابزال.
اراپ ەسپەنبەتوۆ, فيلولوگيا عىلىمدارىنىڭ دوكتورى, پروفەسسور سەمەي