رەسەي فەدەراتسياسىنا جۇمىس ساپارى اياسىندا قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بۇكىل رەسەي جانە ماسكەۋ پاتريارحى كيريللمەن كەزدەستى.
كەزدەسۋ بارىسىندا نۇرلان ەرمەكباەۆ بۇكىل رەسەي جانە ماسكەۋ پاتريارحىن قازاقستان رەسپۋبليكاسى مەن رەسەي حالىقتارىنىڭ اراسىنداعى بەيبىتشىلىك, دوستىق پەن ىنتىماقتاستىقتى نىعايتۋ جولىنداعى ەڭبەگى ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ تابىستاعان ءبىرىنشى دارەجەلى «دوستىق وردەنى» مەملەكەتتىك ناگراداسىنا يە بولۋىمەن قۇتتىقتادى.
«بۇگىنگى كۇنى بارلىق كونفەسسيالاردىڭ ءوزارا تۇسىنىستىك پەن اشىق ديالوگ نەگىزىندەگى ىنتىماقتاستىعى ءبىزدىڭ باستى جەتىستىكتەرىمىزدىڭ ءبىرى بولىپ تابىلادى جانە مۇنى قازاقستاننىڭ ايتۋلى تابىسى دەپ ايتۋعا بولادى. ارينە, وسىنداي قارىم-قاتىناستاردى ورناتۋ وڭايعا تۇسپەدى, كونفەسسياارالىق ءتيىمدى ديالوگقا قول جەتكىزۋدە ەكى جەتەكشى ءدىن – يسلام حانافي مازحابى جانە پراۆوسلاۆيە ەرەكشە ءرول اتقارادى», دەپ ءوز كوزقاراسىن ءبىلدىردى ن.ەرمەكباەۆ.
مينيستر قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگى بارلىق ءدىني بىرلەستىكتەرمەن كونسترۋكتيۆتى ديالوگ ورناتقانىن جانە ونىڭ ىشىندە ورىس پراۆوسلاۆيە شىركەۋىنە جانە ونىڭ جۇمىسىنا, قولداۋ تانىتاتىنىن اتاپ ءوتتى.
ء«بىز زاڭنامانى جەتىلدىرۋ, ازاماتتىق قوعامدى دامىتۋ, ءدىني بىرلەستىكتەرمەن تىعىز قارىم-قاتىناس ورناتۋ ارقىلى مەملەكەتتىك ساياساتتى جۇزەگە اسىرامىز», دەدى مينيستر.
نۇرلان ەرمەكباەۆ قازىرگى زاماناۋي تالاپتارعا سايكەس كونفەسسياارالىق جانە دىنارالىق ديالوگتىڭ دامۋى, ادام مەن قوعامنىڭ ءداستۇرلى مورالدىق-ادامگەرشىلىك قۇندىلىقتارىنىڭ ساقتالۋى, مەملەكەتتىك ساياسات قاعيدالارىن قۇرمەتتەۋ تۇرعىسىندا اتقارىپ وتىرعان ورىس پراۆوسلاۆيە شىركەۋىنىڭ جۇمىسىن جوعارى باعالادى. سونداي-اق مينيستر ورىس پراۆوسلاۆيە شىركەۋىنىڭ وكىلدەرىنە استانادا وتكەن دىنارالىق فورۋمداردىڭ جۇمىسىنا ۇنەمى قولداۋ كورسەتىپ, بەلسەندى قاتىسقانى ءۇشىن العىسىن ءبىلدىردى.
«ەگەمەن-اقپارات»