15 قازان, جەكسەنبى كۇنى قىرعىزستاندا پرەزيدەنتتىك سايلاۋ ءوتتى. ەلدىڭ كونستيتۋتسياسى بويىنشا سايلاۋعا قانشا ادامنىڭ قاتىسقانى سونشالىقتى ءماندى ەمەس. ال ورتالىق سايلاۋ كوميسسياسىنىڭ (وسك) الدىن الا جاريالاعان مالىمەتىنە قاراعاندا, سايلاۋ ۋچاسكەلەرىنە 1 ميلليون 692 مىڭ 423 سايلاۋشى داۋىس بەرۋگە كەلگەن. بۇل سايلاۋ قۇقىعى بار ازاماتتاردىڭ 55,93 پايىزىن قۇرايدى.
سايلاۋ بۇدان بۇرىن جۇرگىزىلگەن ازاماتتاردى بيومەتريكالىق تىركەۋدىڭ ناتيجەسى ارقىلى جۇزەگە اسىرىلدى. مۇنداي سايلاۋشىلاردىڭ جالپى سانى 3 ميلليون 25 مىڭ 770 ادام بولاتىن. پرەزيدەنتتىككە العاشىندا كانديدات رەتىندە 12 ادام تىركەلگەن ەدى. ونىڭ بىرەۋى – «ونىگۋ-پروگرەسس» پارتياسىنىڭ اتىنان تۇسكەن باقىت تورەباەۆ سايلاۋعا ساناۋلى كۇن قالعاندا ءوزىنىڭ كانديداتۋراسىن ومۋربەك بابانوۆتىڭ پايداسى ءۇشىن الىپ تاستادى.
سايلاۋ بيومەتريكالىق-ەلەكتروندى تارتىپپەن جۇرگىزىلگەنىنە بايلانىستى داۋىس بەرۋ اياقتالعان كەشكى ساعات 20.00-دەن ونشاقتى مينۋت وتكەندە كىمنىڭ الدا ەكەندىگى بەلگىلى بولدى. كەشەگى كۇنگى مالىمەتكە سايكەس, سايلاۋ ۋچاسكەلەرىنە كەلگەندەردىڭ 55 پايىزعا جۋىق داۋىسىنا سوورونباي جەەنبەكوۆ يە بولعان. ەندى ول وسك-نىڭ رەسمي قورىتىندىسىنان كەيىن قىرعىز رەسپۋبليكاسىنىڭ پرەزيدەنتى دەپ جاريالانباق. تەحنيكالىق جاعىنان العاندا سايلاۋ ءادىل وتكەن. مۇنى حالىقارالىق بايقاۋشىلار دا راستاپ وتىر. بيومەتريكالىق تەحنولوگيا «1 سايلاۋشى – 1 داۋىس» ەرەجەسىنە نەگىزدەلگەن. بىراق مورالدىق-پسيحولوگيالىق جاعىنان العاندا, سايلاۋدى ءادىل ءوتتى دەپ ايتۋ ازىرگە ەرتەرەك سياقتى.
سوورونباي جەەنبەكوۆ ەلدىڭ قازىرگى پرەزيدەنتى باسقاراتىن قىرعىزستاننىڭ سوتسيال-دەموكراتيالىق پارتياسىنان كانديدات رەتىندە ۇسىنىلدى.
نازاربەك ساتتار, ارنايى «ەگەمەن قازاقستان» ءۇشىن