ساتباەۆ ەسكەرتكىشى بوي كوتەردى. قاراعاندىعا كەلۋشىلەردى بۇدان بىلاي قاراي اكادەميك قانىش ساتباەۆ ءمۇسىنى قارسى الىپ تۇراتىن بولدى.
تەمىر جول ۆوكزالى مەن اۆتوبەكەت الدىنداعى قايتادان اسەمدەلىپ, ساندەندىرىلگەن الاڭ ورتاسىنا قويىلعان عۇلاما عالىم ەسكەرتكىشى اسقاق كورىنۋىمەن ايرىقشالانادى. وڭ قولىنا قازاقستاننىڭ گەولوگيالىق كارتاسىن قىسا ۇستاعان ۇلى گەولوگتىڭ جىگەرلى ءجۇزى, جارقىن بەينەسى ەل كەلەشەگىنە سەنىمدىلىكتى اڭعارتادى. بۇل – بيىل حالقىمىزدىڭ كورنەكتى تۇلعالارىنا ارنالىپ ورناتىلعان وبلىس ورتالىعىنداعى ءۇشىنشى ەسكەرتكىش. ايماق تاريحى قازىر قالانىڭ ءار تۇسىنان سىر شەرتەدى.
ايقىن نەسىپباي. قاراعاندى.
حاميت اقىننىڭ ولەڭدەرى وقىلدى. سوعىستان كەيىنگى جىلدارى ادۋىندى جىرلارىمەن تانىلعان حاميت ەرعاليەۆتىڭ جالىندى پوەزياسى حالىق جادىنان وشپەك ەمەس. بيىل وقىرمان جۇرەگىنە جول تاپقان اقىننىڭ تۋعانىنا 95 جىل تولدى. وسىناۋ مەرەيلى داتاعا وراي وتكەن اپتادا «جىر مۇنارا – حاميت اقىن» اتتى كوركەمسوز وقۋ شەبەرلەرىنىڭ بايقاۋى ءوتتى. سونىمەن قاتار, وسى تاقىرىپتا كورمە دە ۇيىمداستىرىلدى. كورمەگە اقىننىڭ شىعارمالارى, تاريحي فوتو سۋرەتتەرى مەن كيىمدەرى, ءوزى ۇستاعان جەكە دومبىراسى, جازۋ ماشينكاسى مەن ماراپاتتارى قويىلدى. ال اقىننىڭ ولەڭدەرىنەن كوركەمسوز وقۋعا بەرەكە ورتا مەكتەبىنىڭ وقۋشىلارى قاتىستى. ونەرپازدار ونەر كورسەتتى.
جولداسبەك شوپەعۇل. اتىراۋ.
تانىمال ونەرپاز وڭىرگە كەلدى. وتكەن اپتادا ەلىمىزدىڭ حالىق ءارتىسى, مەملەكەتتىك سىيلىقتىڭ لاۋرەاتى, پيانيست ءجانيا اۋباكىروۆا وبلىس ورتالىعىنداعى ەستاي اتىنداعى مادەنيەت سارايىندا جەكە كونتسەرتىن وتكىزدى. وڭىرگە ارناعان بۇل ونەر ساپارىن ول ەل تاۋەلسىزدىگىنىڭ 20 جىلدىعىنا ارنادى. ۇلى كومپوزيتورلاردىڭ عاجايىپ كلاسسيكالىق تۋىندىلارىن ورىنداپ, وبلىس جۇرتشىلىعىنا رۋحاني ءلاززات, قۇدىرەتتى سىرلى اۋەندەر سىيلادى. تىلسىم اۋەندى مۋزىكانى تىڭداۋ ءۇشىن بيىك تالعام, تەرەڭ تۇسىنىك قاجەت, دەيدى ءجانيا اۋباكىروۆا. كەرەكۋدەن كەيىن مۋزىكانتتى فرانتسيا, پولشا كۇتىپ وتىرعان كورىنەدى. فرانتسيا دەمەكشى, تانىمال ونەرپاز وسى ەلدىڭ ونەر جانە ادەبيەت وردەنىنىڭ يەگەرى.
فاريدا بىقاي. پاۆلودار.
قازاقستان كينولارىمەن قاۋىشتى. وڭتۇستىكتە قازاقستان كينەماتوگرافيستەر وداعى جانە ش.ايمانوۆ اتىنداعى “قازاقفيلم” اق-تىڭ ۇيىمداستىرۋىمەن قازاق كينو ءوندىرىسىنىڭ بۇگىنگى دامۋ بارىسىنا ارنالعان كەزدەسۋ وتكىزىلدى. وعان بەلگىلى كينواكتەرلار قاتىستى. قازاق كينولارى تەلەارنالاردا ءجيى كورسەتىلە بەرمەيدى. ناسيحاتتالۋى دا كەمشىن. بەلگىلى كينواكتەر نۇرجۇمان ىقتىمباەۆ پەن كينورەجيسسەر ءارى اكتەر بولات قالىمبەتوۆ باستاعان توپ ش.قالداياقوۆ اتىنداعى وبلىستىق فيلارمونيادا كورەرمەندەرمەن جۇزدەستى. اپتا بويى كينوتەا-ترلاردا قازاقستاندىق فيلمدەر كورسەتىلدى. جۇرتشىلىقتىڭ ىستىق ىقىلاسىنا يە بولعان بۇل جۇزدەسۋلەر ەل تاۋەلسىزدىگىنىڭ 20 جىلدىعىنا ارنالدى.
باقتيار تايجان. وڭتۇستىك قازاقستان وبلىسى.
ءبىلىم جۇيەسىندەگى وزىق جوبا. نورۆەگيالىق «RKK» قورىنىڭ باستاۋىمەن ءبىلىم جۇيەسىندەگى وزىق جوبا ەلىمىزدە بىرنەشە جىلدان بەرى جۇزەگە اسىرىلىپ كەلەدى. جۋىردا قوردىڭ وكىلدەرى قىزىلجار وڭىرىندە بولىپ, ءوز تاجىريبەلەرىمەن ءبولىستى. 2011-2013 جىلدارعا ارنالعان سەرىكتەستىك جوباسى اياسىندا كاسىپتىك-تەحنيكالىق ءبىلىم بەرۋ سالاسىنىڭ پروبلەمالارى جان-جاقتى ءسوز ەتىلدى. شەتەلدىك مەيمانداردى پەتروپاۆل قۇرىلىس-ەكونوميكالىق كوللەدجىندەگى يگى ىستەر ەرەكشە قىزىقتىردى. ۇزدىكتەر ساناتىنداعى وقۋ ورنىندا 1700-دەن استام وقۋشى 17 ماماندىق بويىنشا ءبىلىم الادى. وسىندا وتكىزىلگەن اشىق ساباقتار مەن سەمينارلاردا جاڭا وقىتۋ جۇيەسىنىڭ ارتىقشىلىقتارى وزگەلەر تاراپىنان قولداۋ تاپتى. قوردىڭ باسقارۋشى ديرەكتورى ۋلە يمسلاند وزىق تەحنولوگياعا نەگىزدەلگەن باعدارلامانىڭ زاماناۋي تالاپتارعا تولىققاندى جاۋاپ بەرەتىنىن اتاپ ءوتتى.
ءومىر ەسقالي. سولتۇستىك قازاقستان وبلىسى.
جۇرتشىلىقپەن تىكەلەي تىلدەستى. جاقىندا قالانىڭ كاسىپوداق ۇيىمدارىنىڭ باسشىلارى جەرگىلىكتى «سپەكتر» گازەتى ارقىلى قالا جۇرتشىلىعىمەن تىكەلەي ەفير ارقىلى تىلدەستى. وندا قالا تۇرعىندارىنىڭ ەڭبەك قۇقى مەن ەڭبەك داۋى, ەلىمىزدەگى كاسىپوداق قوزعالىسىنىڭ قازىرگى جاي-كۇيى تۋرالى ماسەلەلەر جان-جاقتى قوزعالدى. وسىنداي ماڭىزدى تىكەلەي تىلدەسۋدىڭ تولىق نۇسقاسى اتالعان قالالىق باسىلىمدا جاريالاناتىن بولادى. جاسىراتىنى جوق, كەيىنگى كەزدە بەدەلى ءتۇسىپ كەتكەن ۇيىمنىڭ ءوز جۇمىسىن شيراتا تۇسۋىنە مۇنداي شارالاردىڭ سەپتىگى ءتيىپ جاتسا, كانەكي!
داۋلەت سەيسەن ۇلى. سەمەي.
كاسىپكەرلىكتى دامىتۋ – وركەندەۋ نەگىزى. «نۇر وتان» حدپ وبلىستىق فيليالىندا وتكىزىلگەن «شاعىن جانە ورتا بيزنەس قىزمەتىنە نەگىزسىز ارالاسۋ فاكتىلەرىن بولدىرماۋ بويىنشا ءوزارا ارەكەت جاساۋ تۋرالى» دوڭگەلەك ۇستەلگە قارجى پوليتسياسى مەن قازاقستاننىڭ «اتامەكەن» وداعى ۇلتتىق ەكونوميكالىق پالاتاسى زتب, قازاقستان كاسىپكەرلەرى, وبلىستىق ساۋدا-ونەركاسىپ پالاتاسى جانە قالالىق كاسىپكەرلەردىڭ قۇقىقتارىن قورعاۋ پالاتاسىنىڭ وكىلدەرى قاتىستى. دوڭگەلەك ۇستەلدە اقتوبە وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ باستىعى قايرات بيجانوۆ, «اتامەكەن وداعى» وبلىستىق فيليالىنىڭ ديرەكتورى اسقار سادىقوۆ جانە ت.ب. كاسىپكەرلىكتى دامىتۋدىڭ وزەكتى ماسەلەلەرىن ورتاعا سالدى.
ساتىبالدى ءساۋىرباي. اقتوبە.