اتىنا زاتى ساي اتالمىش «سپۋتنيك» شيپاجايى ىلە الاتاۋىنىڭ تەرىسكەي بەتكەيىندە تەڭىز دەڭگەيىنەن 1700 مەتر بيىك شىڭدا ورنالاسقان. بۇل شاتقالدىڭ تاريحي اتاۋى «موناح» شاتقالى ەكەن. بۇل شاتقال تالعار قالاسىنان 11 شاقىرىم, ال الماتى قالاسىنان 55 شاقىرىم قاشىقتىقتا ورنالاسقان. بۇل مەكەن نەگىزىنەن 1931 جىلى قۇرىلعان الماتى مەملەكەتتىك قورىعىنىڭ جەرى. ال 1961 جىلى وسى قورىقتان قاپشاعاي قورىعى ءبولىنىپ شىققان جانە مەملەكەت قاراۋىنا الىنعان. قورىقتا ءتۇرلى ەمدىك ءدارى ءشوپتەردى بىلاي قويعاندا, قوڭىر ايۋ, بارىس, سىلەۋسىن, قاسقىر, ءتۇلكى, قويان, بۇعى, اقتيىن, ەلىك, ارقار, قابان سياقتى اڭدارمەن بىرگە تاۋ قىرانى بۇركىت, لاشىن, تۇيعىن, سۇڭقار, قۇرلار, كەكىلىك, شىلدەر, ت.ب. حايۋاناتتار تىرشىلىك ەتەدى.
بۇل جەردە ەرتەدە پيونەرلەر لاگەرى بولىپتى دا, 1980 جىلى 120 ادامدىق شيپاجايلاردىڭ كەشەنى تۇرعىزىلىپ, مۇنىمەن قاتار 500-دەي پيونەرلەرگە ارنالعان شيپاجاي عيماراتتارى سالىنعان.
ماۋسىم ۋاقىتتارىندا شيپاجاي ايىنا 120-دان استام دەمالۋشىلار مەن ەمدەلۋشىلەردى قابىلداي الادى. شيپاجايعا زاعيپتەر, ءبىرىنشى, ەكىنشى جانە ءۇشىنشى توپتاعى مۇگەدەكتەر تەگىن جولدامامەن قابىلدانادى ەكەن. دەمالۋ مەن ەمدەلۋ ۇزاقتىعى 12-14 كۇن.
ءبىزدى – قاراعاندى وبلىسىنان بارعان 30 دەمالۋشىنى ءى الماتى ۆوكزالىنان شيپاجايدىڭ وكىلى قارسى الىپ, ءۇش قاباتتى شيپاجايدىڭ تاماشا دا جايلى ەكى كىسىلىك بولمەلەرىنە ورنالاستىردى. ريزا بولعانىمىز سول, ءبىز ورنالاسپاي جاتىپ-اق دارىگەردىڭ قابىلداۋى باستالىپ, بۇدان كەيىن 10 ءتۇرلى ەم الا باستادىق. «اس – ادامنىڭ ارقاۋى» دەگەندەي, ءتورت مەزگىل ءدامدى تاماقتانۋدىڭ ءوزى نەگە تۇرادى. ونىڭ ۇستىنە وتە تازا اۋاسىمەن دەمالۋ دا دەنساۋلىققا شيپالى اسەر ەتەدى.
شيپاجايدا مادەني-كوپشىلىك جۇمىستارى دا جاقسى جولعا قويىلعان. كۇندە كەشكىلىك ءان-بي, اتالى سوزدەر, اجەلەر, اتالار سايىسى دەگەن باعدارلامالار ءوتكىزىپ, جەڭىمپازداردى انىقتاپ, سىيلىقتارمەن ماراپاتتالادى. مەن ءوزىم دە بىرنەشە حالىق ءاندەرىن ورىنداپ, سىيلىقتارعا يە بولدىم.
ءبىر ايتارىم, وكىنىشكە وراي, اتالمىش شيپاجاي ءبىر كەزدەرى جەكەشەلەندىرىلگەن ەكەن. بۇل دۇرىس شارا ەمەس قوي دەپ ويلايمىز. ەگەر قورىق سياقتى مەملەكەت قاراۋىنا الىنىپ, يگىلىكتى جۇمىس ىستەتسە, نۇر ءۇستىنە نۇر جاۋار ەدى دەمەكپىز.
ايتكەن ىبىراي.
قاراعاندى وبلىسى, شاحتينسك قالاسى.