كەشە ءسىم-ءنىڭ رەسمي وكىلى – حالىقارالىق اقپارات كوميتەتى توراعاسىنىڭ ورىنباسارى التاي ابيبۋللاەۆ ءداستۇرلى اپتالىق بريفينگ وتكىزىپ, سىرتقى ساياساتتا جۇرگىزىلەتىن شارالارمەن تانىستىردى.
رەسمي وكىل وسى كۇندەرى قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ باستاعان پارلامەنتتىك دەلەگاتسيانىڭ بەرندە ءوتىپ جاتقان پارلامەنتارالىق وداق اسسامبلەياسىنىڭ 125-ءشى وتىرىسىنا قاتىسىپ جاتقاندىعىن حابارلادى. وسى شارانىڭ اياسىندا يادرولىق قارۋسىزدانۋ تاقىرىبىنا ارنالعان قىزۋ پىكىر الماسۋ ءوتىپ, وندا نەگىزگى باياندامامەن قازاقستان رەسپۋبليكاسىنىڭ مەملەكەتتىك حاتشىسى ق.ساۋداباەۆ ءسوز سويلەگەنىن جەتكىزدى.
ال 17-18 قازان ارالىعىندا ەلىمىزگە قازاقستان-كولۋمبيا قارىم-قاتىناستارى تاريحىندا تۇڭعىش رەت كولۋمبيالىق دەلەگاتسيا جۇمىس ساپارىمەن كەلىپ, مەملەكەتتىك مەكەمەلەردىڭ باسشىلارىمەن جانە ەلىمىزدىڭ ىسكەر توپتارىنىڭ وكىلدەرىمەن كەزدەسۋدى جوسپارلاپ وتىرعانىن جۋرناليستەرگە بايان ەتكەن رەسمي وكىل سىرتقى ساياساتتاعى وزگە دە ماڭىزدى شارالاردى حابارلادى.
ماسەلەن, 19 قازاندا سانكت-پەتەربۋرگتە قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆتىڭ قاتىسۋىمەن ەۋرازيالىق ەكونوميكالىق قوعامداستىقتىڭ مەملەكەتارالىق كەڭەسىنىڭ 31-ءشى جانە كەدەن وداعىنىڭ جوعارى ورگانى – ەۋرازيالىق ەكونوميكالىق قوعامداستىقتىڭ مەملەكەتارالىق كەڭەسىنىڭ وتىرىستارى وتەدى, دەدى ا.ابيبۋللاەۆ. وعان ەۋرازەق-قا مۇشە مەملەكەتتەردىڭ ۇكىمەت باسشىلارى قاتىسىپ, ەكونوميكالىق قوعامداستىقتىڭ وزەكتى ماسەلەلەرى مەن دامۋ باسىمدىقتارىن تالقىلايدى.
ال 19-20 قازان كۇندەرى ەلباسى نۇرسۇلتان نازارباەۆتىڭ شاقىرۋىمەن ازەربايجان پرەزيدەنتى يلحام اليەۆتىڭ ەلىمىزگە رەسمي ساپارى بولىپ, ونىڭ اياسىندا ەكى مەملەكەت باسشىلارىنىڭ قاتىسۋىمەن ەكەۋارا جانە كەڭەيتىلگەن قۇرامدا كەلىسسوزدەر وتەدى. ولاردىڭ قورىتىندىسى بويىنشا قازاقستان مەن ازەربايجان پرەزيدەنتتەرى اراسىندا, سونداي-اق بىرقاتار ۇكىمەتارالىق كەلىسىمدەرگە قول قويۋ جوسپارلانعان, دەدى رەسمي وكىل.
الداعى اپتادا ەڭ باستى سىرتقى ساياسي ءىس-شارا – بۇل 20-21 قازاندا الماتىدا وتەتىن ءتۇركىتىلدەس مەملەكەتتەر ىنتىماقتاستىعى كەڭەسىنىڭ العاشقى ءسامميتى, دەگەن رەسمي وكىل سامميت الدىندا 20 قازاندا الماتىدا سىرتقى ىستەر ءمينيسترى ەرجان قازىحانوۆتىڭ قاتىسۋىمەن تۇركىتىلدەس مەملەكەتتەر سىرتقى ىستەر مينيسترلەرى كەڭەسىنىڭ وتىرىسى وتەتىنىن مالىمدەدى.
21 قازان كۇنى تۇركىتىلدەس مەملەكەتتەر ىنتىماقتاستىعى كەڭەسىنىڭ العاشقى ءسامميتى اياسىندا قازاقستانعا جۇمىس ساپارىمەن تۇرىك رەسپۋبليكاسىنىڭ پرەمەر-ءمينيسترى رەدجەپ تايىپ ەردوعان كەلەدى.
تۇركيا ۇكىمەت باسشىسىنىڭ قاتىسۋىمەن الماتى ماڭىندا قازاق-تۇرىك ليتسەيىنىڭ اشىلۋى جوسپارلانسا, 18-19 قازاندا يزمير قالاسىندا (تۇرىك رەسپۋبليكاسى) ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) ارنايى جۇمىس توبىنىڭ (اجت) جانە اعا لاۋازىمدى تۇلعالار كوميتەتىنىڭ (التك) كەزەكتى ماجىلىستەرى وتەتىن بولادى.
انار تولەۋحانقىزى.