قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ ەۋروپا كەڭەسىنىڭ باس حاتشىسى تۋربورن ياگلاندپەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
پالاتا توراعاسى قالىپتاسقان بايلانىس تۋرالى ايتا كەلىپ, قازاقستان 2009-2011 جىلدارعا ارنالعان «ەۋروپاعا جول» باعدارلاماسىن جۇزەگە اسىرىپ جاتقانىن تىلگە تيەك ەتتى. وندا مەملەكەتىمىزدىڭ ىشكى رەفورمالارىن جۇزەگە اسىرۋدىڭ ارقاسىندا ەۋروپالىق ستاندارتتارعا جاقىنداتۋ ءجونىندەگى ستراتەگيالىق جوسپارى ايقىندالعان.
و.مۇحامەدجانوۆ ءوز سوزىندە مەيماننىڭ ساپارى ەل تاۋەلسىزدىگىنىڭ 20 جىلدىعى قارساڭىنا ءسايكەس كەلىپ وتىرعانىن, وسى كەزەڭ ىشىندە قازاقستان حالىقارالىق دەڭگەيدە مەملەكەت باسشىسى ن.نازارباەۆتىڭ باسشىلىعىمەن ايتارلىقتاي تابىسقا جەتكەنىن ايتتى. 1991 جىلى 29 تامىز كۇنى ەلباسى نۇرسۇلتان نازارباەۆ «سەمەي يادرولىق سىناق پوليگونىن جابۋ تۋرالى» تاريحي جارلىققا قول قويدى. بۇل ءالەمدەگى ءىرى سىناق ايماقتارىنىڭ ءبىرى بولاتىن. 2010 جىلى ءساۋىر ايىندا ۆاشينگتون قالاسىندا يادرولىق قاۋىپسىزدىك ءجونىندەگى جاھاندىق سامميتتە پرەزيدەنت ن.نازارباەۆ يادرولىق قارۋسىز الەم دەكلاراتسياسىن ءازىرلەۋ قاجەت ەكەنى, ماگاتە شەڭبەرىندە يادرولىق وتىننىڭ حالىقارالىق بانكىن قازاقستان اۋماعىندا ورنالاستىرۋعا ءازىر ەكەنى ءجونىندە ۇسىنىس جاسادى. بۇۇ باس اسسامبلەياسىنىڭ 66-شى سەسسياسىندا سويلەگەن سوزىندە پرەزيدەنت وسى باستاماسىن تاعى دا جاريا ەتتى, دەدى ءماجىلىس توراعاسى.
ءماجىلىس توراعاسى مەيمانعا مەملەكەت ساياساتى تۋرالى جان-جاقتى ايتا كەلىپ, قازاقستان 2010 جىلى تمد ەلدەرىنىڭ اراسىندا ءبىرىنشى بولىپ ەقىۇ-عا توراعالىق ەتكەنىن, بيىل قازاقستان يسلام ىنتىماقتاستىعى ۇيىمىنا جەتەكشىلىك ەتۋ جونىندەگى ماڭىزدى مىندەتتى ءوز قولىنا العانىن ءمالىمدەدى. كەزدەسۋ بارىسىندا ءتاۋەلسىز قازاقستاننىڭ باستى جەتىستىكتەرىنىڭ ءبىرى ۇلتتارارالىق جانە دىندەرارالىق كەلىسىمگە نەگىزدەلگەن ىشكى تۇراقتىلىق ەكەنى ايتىلدى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن استانادا الەمدىك جانە ءداستۇرلى دىندەر كوشباسشىلارىنىڭ ءۇش رەت سەزى بولىپ وتكەنى, 2012 جىلى ءتورتىنشى سەزى وتەتىنى مالىمدەلدى. ەلىمىزدىڭ باسقا تابىستارى دا اتالدى.
مەيمان ءوز كەزەگىندە: «قازاقستان – ءبىز ءۇشىن ماڭىزدى مەملەكەت. ءبىز قازاقستاندى تۇراقتىلىقتىڭ مەكەنى, يادرولىق قارۋسىزدانۋ جانە الەمدى قاۋىپسىزدىكپەن قامتاماسىز ەتۋ باستاماشىسى دەپ بىلەمىز», – دەدى. كەزدەسۋ سوڭىندا تاراپتار قازاقستان مەن ەۋروپا كەڭەسى اراسىنداعى ءوزارا ساياسي ىنتىماقتاستىق بايلانىس الداعى ۋاقىتتا دا جوعارى دەڭگەيدە دامي بەرەتىنىنە سەنىم ءبىلدىردى.