قازاقستان حالقى اسسامبلەياسىنىڭ «رۋحاني جاڭعىرۋ» باعدارلاماسىن ىسكە اسىرۋ بويىنشا وتكىزگەن رەسپۋبليكالىق سەمينار تالدىقورعان قالاسىنداعى ءتىل سارايىندا ءوتتى. سەميناردىڭ مودەراتورى وبلىس اكىمىنىڭ ورىنباسارى جاقسىلىق ومار جەتىسۋ جەرىنە كەلگەن قوناقتاردى قۇتتىقتاپ, جۇرتشىلىقتىڭ اتىنان العىس ءبىلدىردى. قازاقستان حالقى اسسامبلەياسى مەن الماتى وبلىستىق اكىمدىگىنىڭ بىرلەسە ۇيىمداستىرۋىمەن ءوتىپ وتىرعان كەڭ كولەمدى شارانىڭ ماڭىزى جوعارى. سەبەبى:
– تاجىريبە الماسىپ, ءىستىڭ ناتيجەلى, ەڭبەكتىڭ ءونىمدى بولۋى ءۇشىن وسىنداي سەميناردىڭ قاجەتتىلىگى بارلىعىمىزعا بەلگىلى. نەگىزگى ماقسات-مۇددەمىز – ەلباسىنىڭ ماقالاسىنداعى كورسەتىلگەن دۇنيەلەردى ىسكە اسىرىپ, سونى ەلدىڭ اراسىندا كەڭىنەن ناسيحاتتاۋ. سوندىقتان بۇگىنگى ماڭىزدى شارانى جەتىسۋدىڭ جۇرەگى تالدىقورعان قالاسىندا وتكىزۋگە شەشىم قابىلداعان دارحان قامزابەك ۇلى, سىزگە العىس ايتامىز, – دەدى جاقسىلىق ومار ءوز سوزىندە.
قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشى دارحان مىڭباي اتالمىش شارانىڭ كيەلى ولكەدە, جاقسى ورتادا ۇيىمداستىرىلىپ جاتقانىنا قۋانىشتى ەكەنىن ايتتى. ەلباسى ماقالاسىندا ۇسىنىلعان باسىم باعىتتارعا سايكەس رەسپۋبليكا كولەمىندە اتقارىلىپ جاتقان جۇمىستارمەن تانىستىردى. ايتۋىنشا, اسىرەسە, «تۋعان جەر» باعدارلاماسى حالىق ىشىندە ۇلكەن قولداۋعا يە بولىپ, يگى ىستەر ناتيجەسىن بەرىپ تە ۇلگەرگەن. مۇنداي قولداۋلار الداعى ۋاقىتتا دا قارقىنىن كەمىتپەيدى.
- بۇگىندە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن ماسەلەلەر قوعامدا قىزۋ تالقىلانۋدا. الدا تۇرعان نەگىزگى ماقسات – ماقالادا كورسەتىلگەن جوبالار مەن باعدارلامالاردى ءتيىمدى, ءارى ساپالى جۇزەگە اسىرۋدى ۇيىمداستىرۋ. سەميناردىڭ دىتتەگەنى دە وسى, – دەدى دارحان مىڭباي.
قحا مۇشەلەرى, مەملەكەتتىك ورگاندار مەن ەتنومادەني بىرلەستىك وكىلدەرى, «قوعامدىق كەلىسىم» مەكەمەلەرىنىڭ قىزمەتكەرلەرى قاتىسقان سەمينار بارىسىندا ماقالادا كورسەتىلگەن «قازاقستانداعى 100 جاڭا ەسىم», «قازاقستاننىڭ كيەلى جەرلەرىنىڭ گەوگرافياسى» جوباسى مەن «تۋعان جەر» باعدارلاماسىن ىسكە اسۋىنا, عىلىمي-ادىستەمەلىك قولداۋ كورسەتۋ ماقساتىندا اتقارىلىپ جاتقان شارۋالار مەن الداعى ۋاقىتتا ۇيىمداستىرىلماق جوبالار تانىستىرىلدى. «نوۆىە رەشەنيە» ءبىلىم قورىنىڭ جەتەكشىسى ۆياچەسلاۆ كيم «قازاقستانداعى مادەني مۇرا» جوباسىن ۇسىندى. ال, قحا عىلىمي-ساراپشىلىق كەڭەسىنىڭ مۇشەسى, ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى نۇربەك شاياحمەتوۆ «تۋعان جەر» باعدارلاماسىن جۇزەگە اسىرۋداعى ەتنومادەني بىرلەستىكتەردىڭ الەۋەتى» تاقىرىبىندا وي قوزعادى. استانا قالاسىنداعى وزبەك ەتنومادەني بىرلەستىگىنىڭ جەتەكشىسى, رۋحاني جاڭعىرۋ بويىنشا ۇلتتىق كوميسسيانىڭ مۇشەسى, كاسىبي مودەراتور شەرزود پۋلاتوۆ «مەدياتسيا جاڭاشا ويلاۋدى قالىپتاستىرۋ ءتاسىلى رەتىندە», جەزقازعان قالالىق ءماسليحاتىنىڭ دەپۋتاتى, ءارى قوعامدىق كەلىسىم كەڭەستەرى قىزمەتىنىڭ توراعاسى, ءبىلىم مەتسەناتى بەكزات التىنبەكوۆ «رۋحاني جاڭعىرۋ باعدارلاماسىن ىسكە اسىرۋداعى قوعامدىق كەلىسىم كەڭەستەرى قىزمەتىنىڭ جاڭاشا قاعيداتتارى» تاقىرىبىندا ءدارىس وقىدى.
ارنايى بايانداماشىلار ۇسىنعان تاقىرىپتار بويىنشا ەركىن اڭگىمە وربىتكەن سەمينارعا قاتىسۋشىلار دا ءوز تاراپىنان ۇسىنىستار مەن ويلار ايتتى. اسىرەسە, «قازاقستانداعى 100 جاڭا ەسىم» جوباسىن جۇزەگە اسىرۋ بويىنشا ەنومادەني بىرلەستىكتەر مەن وڭىرلىك «قوعامدىق كەلىسىم» مەكەمەلەرى وكىلدەرىنىڭ قاتىسۋىنداعى ديالوگ الاڭى قاتىسۋشىلار تاراپىنان قىزۋ تالقىلاندى. سەمينار اياسىندا ۇيىمداستىرىلعان ء«دىني ەكسترەميزمنىڭ الدىن الۋ», «زاماناۋي بيزنەس ۇلگى جاساۋ» اتتى ترەنينگتەر دە قاتىسۋشىلار ءۇشىن پايدالى بولعانى انىق. سەبەبى, سوڭعى اتالعان ەكى تاقىرىپ تا بۇگىنگى كۇنى ماڭىزدى ماسەلەلەر ەكەنى ايان. قاراپايىم ازاماتتاردان باستاپ بيلىك وكىلدەرىنە دەيىن بىلۋگە ءتيىس قاعيدالار مەن ۇستانىمدار ءار ءسات سايىن ەسكە سالىنىپ وتىرۋعا ءتيىس.
سەمينار شەڭبەرىندە وبلىسىمىزدا اتقارىلىپ جاتقان جۇمىستارعا دا باعا بەرىلىپ, الداعى ۋاقىتتا اتالعان تاقىرىپتار بويىنشا وزگە وڭىرلەرمەن بىرلەسە قىزمەت ەتۋ, تاجىريبە الماسۋ تۋرالى دا ۇسىنىستار ايتىلدى.
سەمينارعا كەلگەن قوناقتاردىڭ جەتىسۋ ولكەسىنە ساپارى مۇنىمەن بىتپەيدى. الدا كەربۇلاق اۋدانىنداعى ش. ءۋاليحانوۆ اتىنداعى «التىن ەمەل» مەملەكەتتىك مەموريالدىق مۋزەيىنەن باستاپ, بىرنەشە تاريحي ماڭىزى بار نىسانداردى ارالاماق.
الماس ءنۇسىپ,
«ەگەمەن قازاقستان»
الماتى وبلىسى
سۋرەتتى تۇسىرگەن جۇماباي مۇسابەك