– ءدال قازىرگى ساتتە سىزگە «كانەلونىڭ» 16 قىركۇيەكتە گولوۆكينگە قارسى وتەتىن جەكپە-جەگىنە كومەكتەسەتىنىمدى عانا ايتا الامىن. ويتكەنى, الۆارەستىڭ جاتتىعۋ زالىنا ەندى كەلدىم. قالاي دايىندالاتىنىمىزدى, ساۋلگە قانداي كومەك كورسەتەتىنىمدى ازىرگە بىلمەيمىن. نەگىزى, Golden Boy پروموۋتەرلىگىمەن اعام ءارى مەنەدجەرىم فارحاد شاريپوۆ كەلىسىپ بەرگەن بولاتىن. ول كىسىگە الەمنىڭ ۇزدىك بوكسشىسىمەن دايىندالۋعا, تاجىريبە جيناۋىما مۇمكىندىك جاساعانى ءۇشىن العىس بىلدىرەمىن. مەنىڭشە, بۇل بوكس كەشى ورتا سالماقتاعى تاريحي جەكپە-جەكتەردىڭ ءبىرى بولادى.
مومىنوۆتىڭ ويىنشا, Golden Boy كومپانياسى ونى ادەيى تاڭداپ العان. سەبەبى, بوبىرجان قازاقستانىڭ تۋماسى جانە گولوۆكينمەن جۇدىرىقتاسۋ ءستيلى سايكەس كەلەدى.
– مەنىڭشە, ولار مەنى ادەيى تاڭداپ الدى. ويتكەنى, مەنىڭ جۇدىرىقتاسۋ ءتاسىلىم گولوۆكينگە ۇقساس. سونداي-اق, ەكەۋمىز ءبىر بوكس مەكتەبىنىڭ (قاراعاندى) تۇلەگىمىز جانە ەكەۋمىزدى دە ءبىر باپكەردەن ءتالىم العانبىز. گولوۆكينمەن ۇقساستىقتارىمىز كوپ, تەك باسقا سالماقتا جۇدىرىقتاسامىز.
بوبىرجاننىڭ ءوزى الۆارەسپەن سپاررينگ-سەرىكتەس بولعانىن تاريحي وقيعا دەپ سانايدى. سونداي-اق, ول ەگەر ءوزىن جاقسى قىرىنان كورسەتسە, Golden Boy كومپانياسىمەن كەلىسىمشارت جاساۋى مۇمكىن ەكەن.
– «كانەلوعا» سپاررينگ-سەرىكتەس بولۋ مەن ءۇشىن وتە قۋانىشتى جاڭالىق بولدى. ويتكەنى, ولار مەنى جاقسى كاسىپقوي بوكسشى رەتىندە تانىدى جانە الۆارەسكە كومەكتەسە الاتىنىما كوزدەرىن جەتكىزگەن سوڭ شاقىرىپ وتىر. Golden Boy Promotions-ءتىڭ سپاررينگ-سەرىكتەس بولۋعا شاقىرعانىنىڭ ءوزى مەن ءۇشىن تاريحي وقيعا. سونداي-اق, ولار ماعان دايىندىق بارىسىندا ءوزىمدى جاقسى قىرىمنان كورسەتە السام, كەلىسىمشارت ۇسىنۋدى ۋادە ەتىپ وتىر.
ول «كانەلونىڭ» كاسىبي بوكستاعى ەڭ ماڭىزدى جەكپە-جەگىنە, ياعني ءوز جەرلەسىنە قارسى دايىندالۋىنا بارىنشا كومەكتەسەتىنىن, ونى ورىنداۋ مىندەتىم دەپ سانايدى.
– بۇل جەردە مەن ۇلكەن جاۋاپكەرشىلىكتى سەزىنىپ وتىرمىن. موينىما قانداي جۇكتىڭ ارتىلىپ وتىرعانىن دا جاقسى بىلەمىن. مەن الۆارەسكە بارىنشا كومەكتەسۋىم كەرەك, سەبەبى بۇل مەنىڭ – مىندەتىم. ەگەر مەن دە وسىنداي ۇلكەن كەزدەسۋ وتكىزەر بولسام, سپاررينگ قارسىلاستارىمنىڭ ايانىپ قالماۋىن قالار ەدىم.
ءسوز اراسىندا مومىنوۆ الداعى ۋاقىتتا وسىنداي جاتتىعۋلارعا ءجيى بارىپ, تاجىريبە جيناقتايتىنىن ايتىپ قالدى.
– بۇل مەنىڭ سوڭعى سپاررينگ-جاتتىعۋىم ەمەس. مەنەدجەرىمنىڭ ايتۋى بويىنشا, ەگەر وسى جاتتىعۋدا ءوزىمدى جاقسى قىرىمنان كورسەتە السام, الداعى ۋاقىتتا وسىنداي دايىندىقتارعا ءجيى جىبەرىپ تۇراتىنىن ايتتى. بۇل مەن ءۇشىن ۇلكەن تاجىريبە بولاتىنى ءسوزسىز.
ايتا كەتەيىك, بوبىرجان مومىنوۆ بۇگىنگە دەيىن كاسىپقوي بوكستا ءۇش كەزدەسۋ وتكىزىپ, بارلىعىندا مەرزىمىنەن بۇرىن جەڭىسكە جەتكەن.