سان عاسىرلىق اقىل-ويدىڭ جەمىسىن زەردەلەۋگە دەن قويعان جاستار رەسپۋبليكالىق, ايماقتىق ءسان بايقاۋلارىندا «جۇزدەن – جۇيرىك, مىڭنان – تۇلپار» شىعىپ, قوماقتى تابىستارعا دا قول جەتكىزىپ ۇلگەردى. ينستيتۋت ۇستازدارى ساندىك-قولدانبالى ونەر بۇيىمدارىن جاساۋدى جەتە تانىستىرۋ ارقىلى بولاشاق مامانداردىڭ كاسىبي شەبەرلىگىن ارتتىرۋدى كوزدەيدى.
– ورتالىقتا جاستار كىلەم توقۋ, سىرماق سىرۋ, كيىم تىگۋ سياقتى اتا-بابامىزدان مۇرا بولىپ كەلە جاتقان بەكزات ونەرگە ماشىقتانادى. سونىمەن قاتار, مۇندا اعاش بۇيىمدارى مەن ءساندى شىمىلدىقتار, باۋ, باسقۇر, ساندىققاپ, تەگەرىش سىندى كيىز ءۇي جابدىقتارى دايىندالادى. ستۋدەنتتەرگە حالقىمىزدىڭ عاسىرلار بويى جيناقتالعان ەستەتيكالىق, مادەني مۇرالارىن تەرەڭ مەڭگەرتۋ ارقىلى ولاردىڭ تانىمدىق كوزقاراسىن قالىپتاستىرىپ, قولونەرگە قىزىعۋشىلىقتارىن وياتۋدى كوزدەيمىز. سونداي-اق, ۇلتتىق كيىم ۇلگىلەرىندەگى ەلەمەنتتەردى جاڭا ۇلگىدەگى ۇلتتىق كيىمدەرگە ەندىرىپ, تىڭ برەندتتەر قالىپتاستىرماق نيەتتەمىز, – دەدى كاسىپتىك وقىتۋ جانە ديزاين كافەدراسىنىڭ مەڭگەرۋشىسى اينۇر جاسكيلەنوۆا.
ايبيكە حاميت پەداگوگيكالىق ينستيتۋتتىڭ «كاسىپتىك وقىتۋ» ماماندىعىنىڭ 4-كۋرس ستۋدەنتى. بويجەتكەن ساباقتان تىس ۋاقىتتا ورتالىقتا ديزايندىق كيىم ۇلگىلەرىن ءپىشىپ, قۇراستىرۋعا ماشىقتانادى.
– بۇگىندە ەڭبەك نارىعىندا ديزاينەر ماماندارىنا دەگەن قاجەتتىلىك بايقالادى. سوڭعى ۋاقىتتا ۇلتتىق قولونەر بۇيىمدارىنا سۇرانىستىڭ ارتۋى بۇل سوزىمىزگە ايقىن دالەل بولماق. ەلىمىز بويىنشا ءسان ورتالىقتارى مەن شەبەرحانالار دا كوپتەپ اشىلۋدا. ماقساتىم – اتا-بابا ءداستۇرىن كەڭىنەن ناسيحاتتاۋ ارقىلى زامانداستارىمدى ءتول ونەردى باعالاۋعا, مادەني مۇرامىزدى اسپەتتەۋگە ۇندەۋ, – دەيدى ا. حاميت.
ورتالىقتا ايىنا 10-نان استام كيىم ۇلگىسى تىگىلەدى. جاس شەبەرلەر ولاردىڭ ارقايسىسىنىڭ ءبىر-بىرىنە ۇقساماۋىنا ەرەكشە نازار اۋدارادى. «كوكتەم گ ۇلى», «كەربەز سۇلۋ», «توميريس», «حانشايىم» سياقتى كوزدىڭ جاۋىن الاتىن كيىم كوللەكتسيالارىن كوپشىلىككە تانىستىرۋ ماقساتىندا جىل سايىن شىعارماشىلىق جۇمىستاردىڭ كورمەسىن ۇيىمداستىرۋ داستۇرگە اينالعان.
– مەملەكەت باسشىسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا بابادان بالاعا ميراس بولىپ كەلە جاتقان مادەني مۇرالارىمىزدى وسكەلەڭ ۇرپاققا جەتكىزۋدى ياكي تانىستىرۋدى مىندەتتەگەن بولاتىن. تاۋەلسىزدىك جىلدارىندا ءتول جادىگەرلەرىمىز بولىپ سانالاتىن ۇلتتىق كيىمدەرىمىز بەن قولونەرىمىزدى دارىپتەۋگە ايرىقشا كوڭىل بولىنە باستادى. «ەل ءىشى – ونەر كەنىشى» دەمەكشى, ايماقتاردا وسى سالانى دامىتۋعا ۇلەس قوسىپ, ونەرلەرىمەن تانىلعان شەبەرلەردىڭ قاراسى ارتتى. وسى ورايدا پەداگوگيكالىق وقۋ ورنىندا ۇمىت بولىپ بارا جاتقان ءتول دۇنيەلەرىمىزبەن قايتا قاۋىشتىرۋ ءارى جەرگىلىكتى ىسمەرلەردىڭ ءوزارا تاجىريبە الماسۋىنا ۇيىتقى بولۋ ماقساتىندا كورمەلەر, ونەر فەستيۆالدارى تۇراقتى تۇردە وتكىزىلەدى, – دەپ اتاپ ءوتتى وقۋ ورنىنىڭ اقپاراتتىق-يميدجدىك قىزمەتىنىڭ جەتەكشىسى جاندار اسان.