مۇنداعى قوقىس جاشىكتەرىنىڭ ەرەكشەلىكتەرى بار. مىسالى, كەيبىرى كۇننەن قۋات الىپ, قوقىسقا لىق تولعان كەزدە ارنايى باسقارۋ تەتىگىنە حابار بەرەدى. قالدىققا تولعان 100 ليترلىك كونتەينەردىڭ دورباسى كۇنىنە بىرنەشە مارتە اۋىستىرىلادى ەكەن. كورمە الاڭىندا مۇنداي جاشىكتەردىڭ 4 ءتۇرى قويىلعان. بارلىعى 3 بولىكتەن تۇرادى. ال وعان تاڭنان كەشكە دەيىن ارنايى جۇمىسشىلار جاۋاپ بەرەدى. «مەن كۇندەلىكتى ساعات 08:30-دا جۇمىس ورنىمدا بولامىن. كيىمىمدى اۋىستىرىپ العان سوڭ, جۇمىسقا كىرىسەمىز. قوقىس جاشىگى ءۇش بولىككە ءبولىنىپ, ءۇش تىلدە جازىلىپ-كورسەتىلگەن. قاعاز, پلاستيك جانە ءتۇرلى قوقىستار», دەيدى تازالىققا جاۋاپتى جۇمىسشى رۋسلان اسىلبەكوۆ.
كورمە اۋماعىنداعى تازالىقتى ساقتاۋ ءۇشىن ارنايى قالدىق باسقارۋ جۇيەسى قۇرىلعان. ياعني, قوقىس كونتەينەرىنەن باستاپ جۇك كولىگىنە دەيىن ءبىر تەتىكپەن باسقارىلادى. باس وپەراتسيالىق ورتالىقتا ورنالاسقان پۋلتكە حابار جەتكەن سوڭ, جينالعان قالدىقتار ءتيىستى ورىندارعا جەتكىزىلىپ, قاتتالادى. ولاردىڭ كەيبىرى قايتا وڭدەۋگە جىبەرىلەدى. سەرۆيستىك قامتاماسىز ەتۋ دەپارتامەنتىنىڭ ديرەكتورى دياس ازبەرگەنوۆتىڭ ايتۋىنشا, كورمە الاڭىنان شىعارىلاتىن قوقىستار قاتتالعان سوڭ, قالالىق پوليگونگا جىبەرىلەدى. ال قاعاز جانە پلاستيك قوقىستار قايتا وڭدەۋگە باعىتتالادى. «قالاشىقتا تازالىق تولىق ساقتالعان. وسىلايشا, تازالىق مادەنيەتىن قالىپتاستىرۋدامىز. كورمە اۋماعىنا 1600-دەن استام قوقىس جاشىگى مەن قاتتاما كونتەينەرى قويىلعان. كۇنىنە بىرنەشە مىڭداعان ادام كىرىپ-شىعاتىن شاعىن اۋماقتىڭ تازالىعى, ءتىپتى ەرىكتىلەردىڭ دە نازارىندا», دەيدى ول.