«ەلباسىنىڭ سارابدال ساياساتىنىڭ ناتيجەسىندە ەلىمىز الەمدىك قاۋىمداستىقتا ءوزىنىڭ ايشىقتى ورنىن الىپ وتىر. 25 جىل ىشىندە قازاقستانعا, وڭىرگە عانا ەمەس, بۇكىل الەمگە ىقپال ەتەتىن شەشىمدەر قابىلداندى. پوليتسيا قىزمەتكەرلەرى دە تاۋەلسىزدىكتىڭ جەمىسىن, جەڭىسىن قورعاپ, ەلباسى – جوعارعى باس قولباسشى نۇرسۇلتان ءابىش ۇلى نازارباەۆتىڭ قازاقستاندىقتاردىڭ تىنىشتىعىن ساقتاۋ, قاۋىپسىزدىكتى, ءتارتىپتى قامتاماسىز ەتۋ جونىندەگى تاپسىرمالارىن ابىرويلى اتقارىپ كەلە جاتىر, – دەدى وبلىس اكىمى نۇرلان نوعاەۆ.
شارا بارىسىندا جۇمىستارىندا جوعارى كورسەتكىشتەرگە قول جەتكىزگەن پوليتسيا قىزمەتكەرلەرى ماراپاتتالدى. جۇبايدوللا داۋەشوۆكە پوليتسيا پولكوۆنيگى ارنايى اتاعى, اندرەي كاراباسوۆقا مەرزىمىنەن بۇرىن پوليتسيا پولكوۆنيگى ارناۋلى اتاعى, رينات يكلاسوۆ پەن راۋان قاسىمجانوۆقا مەرزىمىنەن بۇرىن پوليتسيا پودپولكوۆنيگى شەندەرى بەرىلدى. مەرەكەلىك كەشتە پوليتسيا قىزمەتكەرلەرى دە ونەرلەرىن ورتاعا سالدى.
بۇل كۇنى, سونداي-اق, اتىراۋ وبلىسى ىشكى ىستەر دەپارتامەنتى بالىق قورلارىنا قىلمىستىق قول سۇعۋشىلىققا قارسى كۇرەس جونىندەگى پوليتسيا ءبولىمىنىڭ جاڭا عيماراتى پايدالانۋعا بەرىلدى. ەندى ارنايى دايارلىق باسقارماسى دا وسى عيماراتتا جۇمىس ىستەيدى. پوليتسيا قىزمەتكەرلەرىنىڭ وقۋ جاتتىعۋى ءۇشىن بارلىق جاعداي جاسالعان جاڭا نىساندى ايماق باسشىسى ارالاپ كوردى. عيماراتتىڭ الدىنداعى جاعالاۋدا سۋ پوليتسياسىنىڭ سۋدا ءجۇزۋ قۇرىلعىلارى مەن كولىكتەرىنىڭ تۇراعى ۇيىمداستىرىلعان.
كاسىبي مەرەكەگە وراي جەرگىلىكتى پوليتسيا قىزمەتىنە 50-گە جۋىق اۆتوكولىكتىڭ كىلتى تابىس ەتىلدى.
باقىتگۇل باباش,
«ەگەمەن قازاقستان».
اتىراۋ.