ميلليونداعان ادامنىڭ ءومىرى مەن تاعدىرىن جالماعان سۇراپىل سوعىسقا قاينار اۋىلىنان اتتانىپ, تۋعان ەلىنە ورالماعان نۇرقايىمباي ءداركەنباەۆ تۋرالى ءىنىسى ءىلياس قىندىبايدىڭ اڭگىمەسى ەرىكسىز قولعا قالام الدىردى.
ءىلياس باۋىرىمىزدىڭ قولىندا قۇندى قۇجاتتار ساقتالعان. وندا وتان سولداتى نۇرقايىمباي سوعىس كەزىندە قاسىنداعى بەس جاۋىنگەرمەن جاۋ تىلىنا ءوتىپ, قارۋ-جاراق تيەگەن كولوننانى وتقا وراپ, كوزىن جويىپ, ەرەن ەرلىك كورسەتەدى. سونىمەن بىرگە, نەمىس گەنەرالىن قولعا ءتۇسىرىپ, «ءتىرى ءتىلدى» ءوز شەبىنە جەتكىزگەن ن.داركەنباەۆ كەڭەس وداعىنىڭ باتىرى اتاعىنا ۇسىنىلادى. بۇل جونىندە رايىمبەك اۋدانىنان نۇرقايىمبايمەن بىرگە بولعان قىزىل شەكارا اۋىلىنداعى بەيسەن ساركەەۆ كۇنى كەشەگە دەيىن كورگەن-بىلگەن شىندىقتى جەرلەستەرىنە ايتىپ كەلگەن. كەڭەس وداعىنىڭ باتىرى اتاعىنا ۇسىنىلعانى جايلى اۋداندىق پارتيا كوميتەتىنىڭ سول كەزدەگى حاتشىسىنا ءاسكەري ءبولىم كومانديرىنەن دە حات كەلىپتى. قاھارمان قازاق كەيىن وققا ۇشىپ, قۇجاتتى ەشكىم ىزدەستىرمەگەن. «ءولى ريزا بولماي, ءتىرى بايىمايدى», دەگەن. ءىلياس قىندىباي اعاسىنىڭ جوعىن جوقتاپ, ىزىنە تۇسكەندىكتەن جاۋىنگەر جەرلەنگەن ۋكراينانىڭ حاركوۆ وبلىسى, يزيۋم اۋدانى, سۋحايا كامەنكا سەلوسىنداعى باۋىرلاستار زيراتىنا ارنايى بارىپ, مارقۇمنىڭ رۋحىنا تاعزىم ەتىپ, قايتادى.
– وتان ءۇشىن, ەل ءۇشىن وتقا تۇسكەن جاۋىنگەرلەردىڭ قاي-قايسىسى دا باتىر عوي. قىرشىن كەتكەن باۋىرىمدى كوپ جىل ىزدەستىردىم. تىم بولماسا جەرلەنگەن جەرىنە تۋعان جەردىڭ توپىراعىن جەتكىزسەم, رۋحىنا تاعزىم ەتسەم دەپ ارماندادىم. سول ارمانىم ورىندالدى. قاينار اۋىلىنان ءبىر ۋىس توپىراق اپارىپ, باۋىرلاستار زيراتىنداعى مارقۇمنىڭ قابىرىنە, زيراتتان توپىراق اكەلىپ, اۋىلداعى اتا-اناسىنىڭ ماڭگى ۇيقىداعى بەيىتى ۇستىنە سەپتىم, – دەيدى اڭگىمە يەسى.
ۋكرايندىقتار رەسەي فەدەراتسياسى قورعانىس مينيسترلىگىنىڭ ورتالىق مۇراجايىنان العان قۇجاتتاردى, باسقا دا مالىمەتتەردى قوسىپ, سونداعى ولكەلىك مۇراجايعا تاپسىرىپتى. باۋىرلاستار زيراتىنداعى قازاقستاندىق باتىر جاۋىنگەر رۋحىنا تاعزىم ەتىپ, سونداعى كەڭەس وداعىنىڭ جەتى باتىرىنىڭ جانىنداعى قازاق جىگىتىنىڭ باسىنا دا بەلگى قويىپتى. حاركوۆ وبلىستىق گازەتى مەن تەلەۆيدەنيەسىندە بۇل جايلى جان-جاقتى جازىلىپ, ايتىلىپتى دا.
ەرلىك – ەلگە مۇرا, ەر ەسىمى – ەل ەسىندە ماڭگى ساقتالادى. وسىنىڭ دالەلىندەي جاقىندا ءىلياس قىندىباي استاناداعى ارنايى ورىنداردان رۇقسات الىپ, رەسپۋبليكامىزدىڭ قيىر شەتىندەگى رايىمبەك اۋدانىنىڭ قاينار اۋىلىنداعى مادەنيەت ءۇيىنىڭ الدىنا ەسكەرتكىش تۇعىر ورناتىپتى.
ەسكەرتكىشتىڭ سالتاناتتى اشىلۋىنا اۋدان اكىمىنىڭ ورىنباسارى مادەني نۇرداۋلەتوۆ قاتىسىپ, ەڭبەك ارداگەرلەرى ساتىباي قۇنىپياەۆ, نۇرمۇحان ديقانباەۆ, قاينار اۋىلىنىڭ اكىمى وسپان يمانبەكوۆ جانە باسقالارى ءسوز سويلەپ, كەسكىلەسكەن ۇرىستا باتىرلىقتىڭ, ەرلىكتىڭ ەرەن ۇلگىسىن كورسەتكەن جەرلەستەرىنە دەگەن جۇرەكجاردى لەبىزدەرىن ورتاعا سالدى.
سول كۇنى قىندىباەۆتار اۋلەتى باباسىنا ارناپ اس بەردى. وسىلايشا باتىر رۋحى جەرلەستەرىمەن قاۋىشىپ, ەلىنە تاستۇعىر بولىپ ورالدى. ەندى قاينارلىقتار باتىر بابالارىنىڭ ونەگەسىن ومىرلەرىنە ۇلگى ەتەتىن بولادى.
كۇمىسجان بايجان.
الماتى وبلىسى, رايىمبەك اۋدانى.