قازاقستان پارلامەنتى سەناتىنىڭ توراعاسى قاسىم-جومارت توقاەۆ باستاعان جوعارعى پالاتانىڭ دەلەگاتسياسى سانكت-پەتەربۋرگتە وتكەن تمد-عا قاتىسۋشى مەملەكەتتەر پارلامەنتارالىق اسسامبلەياسىنىڭ قىرىق بەسىنشى وتىرىسىنا قاتىستى, دەپ حابارلادى سەناتتىڭ ءباسپاسوز قىزمەتى.
بۇعان دەيىن حابارلانعانىنداي, 24 قاراشا كۇنى كەشكىسىن كورنەكتى قوعام جانە مەملەكەت قايراتكەرى, ۇلت-ازاتتىق جانە الاش قوزعالىسىنىڭ جەتەكشىسى, الاشوردا اۆتونوميالىق ۇكىمەتىنىڭ توراعاسى, پۋبليتسيست, عالىم, اۋدارماشى, سەمەي وبلىسىنىڭ اتىنان I مەملەكەتتىك دۋما دەپۋتاتى ءاليحان بوكەيحانوۆ ءمۇسىنىنىڭ اشىلۋ سالتاناتى بولعان ەدى. وندا قازاقستان پارلامەنتى ءماجىلىسىنىڭ توراعاسى نۇرلان نىعماتۋلين قۇتتىقتاۋ ءسوز سويلەدى:
– ەكى ەل پرەزيدەنتتەرى نۇرسۇلتان نازارباەۆ پەن ۆلاديمير ءپۋتيننىڭ سىندارلى جانە باتىل ساياساتى بۇگىنگى كۇنى قازاقستان مەن رەسەيدىڭ ەۋرازيالىق كەڭىستىكتە ينتەگراتسيانىڭ قوزعاۋشى كۇشىنە اينالۋىنا جول اشتى. قازاقستان تاۋەلسىزدىگىنىڭ 25 جىلدىعى قارساڭىندا وسى ەسكەرتكىشتىڭ اشىلۋىنىڭ ماڭىزى ەرەكشە. وسى ۋاقىتتار ءىشىندە ءبىزدىڭ ەلدەرىمىز تمد كەڭىستىگىندە ستراتەگيالىق جانە وداقتاس ارىپتەستىكتىڭ جارقىن ۇلگىسىن كورسەتىپ كەلەدى, – دەپ اتاپ ءوتتى ءماجىلىس توراعاسى.
ءمۇسىن تاۆريا سارايىنىڭ اتريۋمىندا ورنالاسادى. قولا ءمۇسىننىڭ بيىكتىگى 2 مەتردەن اسادى. ءمۇسىن قازاقستان پارلامەنتىنىڭ دەپۋتاتتارى جيناعان قارجىعا جاسالدى.
ايتا كەتەيىك, وسى جىلى ءاليحان نۇرمۇحامەد ۇلىنىڭ تۋعانىنا 150 جىل تولىپ وتىر. ءا.بوكەيحانوۆ ومبى تەحنيكالىق ۋچيليششەسىن اياقتاعان سوڭ, سانكت-پەتەربۋرگتەگى ورمان ينستيتۋتىنا وقۋعا تۇسكەن.
ال كەشەگى وتكەن وتىرىس بارىسىندا باستى نازار تمد ەلدەرىندەگى ءبىلىم بەرۋدى دامىتۋ ماسەلەلەرىنە اۋدارىلدى. شاراعا قاتىسۋشىلار «ينكليۋزيۆتى ءبىلىم بەرۋ تۋرالى», «ەرەسەكتەرگە ءبىلىم بەرۋ تۋرالى», «ارالىق سوتتار جانە ارالىق تالقىلاۋعا تورەلىك تۋرالى», «پارلامەنتتىك تەرگەۋ تۋرالى», «جەرگىلىكتى بيلىك ورگاندارىنىڭ شەكارالىق ىنتىماقتاستىققا قاتىسۋ ءتارتىبى تۋرالى», «ساقتاندىرۋ مەديتسيناسى تۋرالى», «ەلەكتروندىق قۇجاتتاردى ترانسشەكارالىق اقپاراتتىق الماسۋ تۋرالى», «ەلەكتروندىق ۇكىمەت تۋرالى», «الەۋمەتتىك-مادەني قىزمەت تۋرالى», «ۇكىمەتتىك ەمەس ۇيىمدار تۋرالى», «ءىرى سپورتتىق شارالاردا قاۋىپسىزدىكتى قامتاماسىز ەتۋ تۋرالى», «جول ءجۇرىسى قاۋىپسىزدىگى تۋرالى», «اۆاريالىق-قۇتقارۋ قىزمەتى جانە قۇتقارۋشىلار مارتەبەسى تۋرالى» ۇلگى رەتىندەگى زاڭدار قابىلدادى.
تمد پاا قارۋلى قاقتىعىستار كەزەڭىندە جانە باسقا زورلىق-زومبىلىق جاعدايلارىندا مەديتسينالىق قىزمەتكەرلەردى جانە دەنساۋلىق ساقتاۋ نىساندارىن قورعاۋ جونىندەگى ۇسىنىمداردى جانە ۇيىمداردى تەرروريستىك جانە ەكسترەميستىك سيپاتقا جاتقىزۋ ماسەلەلەرى بويىنشا تمد-عا قاتىسۋشى مەملەكەتتەردىڭ ۇلتتىق زاڭنامالارىن جەتىلدىرۋ جانە ۇيلەستىرۋ جونىندەگى ۇسىنىمداردى قابىلدادى.
تمد-عا قاتىسۋشى مەملەكەتتەرگە ارنالعان ۇلگى رەتىندەگى كىتاپحانا كودەكسى مەن «ينتەرنەتتى رەتتەۋدىڭ نەگىزدەرى تۋرالى» زاڭ جاڭا ماتىندە بەكىتىلدى. ودان باسقا, وتىرىستا «مەملەكەتتىك شەكارا تۋرالى» ۇلگى رەتىندەگى تۇسىندىرمە قارالدى.
تاۆريا سارايىندا سونداي-اق, ەكى مەملەكەت پارلامەنتتەرى پالاتا توراعالارىنىڭ ورىنباسارلارى سەرگەي گروموۆ پەن يلياس ۋماحانوۆتىڭ توراعالىق ەتۋىمەن قازاقستان پارلامەنتىنىڭ سەناتى مەن رەسەيدىڭ فەدەراتسيا كەڭەسى اراسىنداعى پارلامەنتتىك ىنتىماقتاستىق كوميتەتىنىڭ كەزەكتى وتىرىسى بولدى. وتىرىسقا قازاقستان جاعىنان سەرگەي پلوتنيكوۆ, سەرىك بەكتۇرعانوۆ, سەرىك جاقسىبەكوۆ, جەڭىس نۇرعاليەۆ جانە ۆلاديمير رەدكوكاشين دە قاتىستى.