2017 جىلدان باستاپ قازاقستاندا ۇكىمەتتىك ەمەس ۇيىمدارعا سىياقى بەرىلەدى. بۇل تۋرالى استانادا وتكەن VII ازاماتتىق فورۋم بارىسىندا بايانداما جاساعان پرەمەر-ءمينيستردىڭ ورىنباسارى يمانعالي تاسماعامبەتوۆ ايتتى.
سىياقى ۇيىمداردىڭ جارعىلىق ماقساتتارىنا, ينستيتۋتسيونالدى دامۋىنا, قىزمەتكەرلەردىڭ بىلىكتىلىگىن كوتەرۋگە, بىرلەستىكتىڭ ماتەريالدىق بازاسىن نىعايتۋعا جۇمسالادى.
ۇكىمەتتىڭ اتىنان بەرىلەتىن سىياقى قوعامدىق ۇسىنىستار مەن ولاردىڭ قىزمەتىن باعالاۋدى ەسكەرە وتىرىپ, الەۋمەتتىك جوبانى ءساتتى جۇزەگە اسىرعان ۇيىمدارعا بەرىلەدى. ۇمىتكەرلەردى ىرىكتەۋ قۇزىرەتتى ورگان جانىنداعى ۇەۇ-مەن ءىس-قيمىل جونىندەگى ۇيلەستىرۋ كەڭەسىندە جۇرگىزىلەدى. سىياقى الۋعا ءوتىنىم جولداعان ءاربىر ۇيىم كەڭەس مۇشەلەرى مەن تاۋەلسىز ساراپشىلاردان قۇرالعان ساراپتاۋ كوميسسياسىنىڭ باعالاۋىنان وتەدى.
2015 جىلى ۇەۇ تۋرالى زاڭنىڭ قابىلدانۋىمەن «ۇەۇ ءۇشىن گرانت» تۇسىنىگى ەنگىزىلگەن بولاتىن. گرانتتاردى بەرۋدى گرانتتىق قارجىلاندىرۋ وپەراتورى – «ازاماتتىق باستامالاردى قولداۋ ورتالىعى» كوممەرتسيالىق ەمەس اكتسيونەرلىك قوعامى جۇزەگە اسىرادى.
ايتا كەتەيىك, 2016 جىلى ۇەۇ گرانت بەرۋ ءۇشىن 208 ملن تەڭگە قارجى ءبولىندى. تامىز ايىندا وپەراتور 11 جوبا بويىنشا بايقاۋ وتكىزىپ, جەڭىمپازدار قازىرگى ۋاقىتتا جوبالارىن جۇزەگە اسىرۋدا.
جولدىباي بازار,
"ەگەمەن قازاقستان".