بۇگىندە يننوۆاتسيالىق دامۋدىڭ قارقىنى كوپ جاعدايدا تسيفرلىق جەلىلەردىڭ ينفراقۇرىلىمىنا بايلانىستى. بۇل تۋرالى بەيبىتشىلىك جانە كەلىسىم سارايىندا ءوتىپ جاتقان XI يننوۆاتسيالىق فورۋمدا اقپارات جانە كوممۋنيكاتسيا ءمينيسترى داۋرەن اباەۆ ايتتى.
"ماسەلەن, ۇيالى بايلانىس ابونەتتەرىنىڭ سانى جاعىنان ءبىز 5-ءشى ورىنعا كوتەرىلسەك, عالامتوردى پايدالانۋ بويىنشا الەم ەلدەرى ىشىندە 61-ءشى ورىنعا شىقتىق. ال سپۋتنيكتىك بايلانىس بارلىق تەرريتوريانى قامتيدى. وتكەن جىلى قازاقستان وزىق اقپاراتتىق تەxنولوگيالاردى دامىتۋ جاعىنان تمد ەلدەرىن ارتقا تاستاپ, 40-شى ورىنعا كوتەرىلدى. "ەلەكتروندى ۇكىمەتتى" دامىتۋ بويىنشا ءبىز ۇزدىك 30-دىققا كىرەمىز. الايدا ۋاقىت ءبىر جەردە تۇرمايدى. ونى ءبارىمىز جاقسى بىلەمىز. سوندىقتان ءبىزدىڭ مينيسترلىك "تسيفرلىق قازاقستان" اتتى جاڭا باعدارلانى دايارلاپ جاتىر. ونىڭ ىشىندە ەل ەكونوميكاسىن "يننوۆاتسيالىق رەلسكە" قويۋ ماسەلەسى دە بار", - دەيدى د. اباەۆ.
ونىڭ ايتۋىنشا, جاڭا باعدارلامادا شالعاي جاتقان اۋىلداردى عالامتورمەن قامتاماسىز ەتۋ شارالارى قاراستىرىلعان. بۇدان بولەك, باعدارلاما اياسىندا تىڭ يننوۆاتسيالىق جوبالار قولعا الىنادى.
"بۇگىندە يننوۆاتسيالىق ەكونوميكانى دامىتۋ ەلدىڭ باسەكەگە قابىلەتتىلىگىن, ازاماتتاردىڭ ءومىر ساپاسىن ارتتىرۋدىڭ ماڭىزدى فاكتورىنا اينالعانى بەلگىلى. وسى تۇرعىدا ەلىمىزدە "قازاقستان - 2050" ستراتەگياسى مەن "100 ناقتى قادام" ۇلت جوسپارى اياسىندا عىلىمي-تەxنيكالىق جانە يننوۆاتسيالىق جۇيەلەردى نىعايتۋعا جول سالاتىن ىرگەلى باستامالار جۇزەگە اسۋدا. ءوز كەزەگىندە اقپارات جانە كوممۋنيكاتسيالار مينيسترلىگى وسى باعىتتاعى مىندەتتەردى ىسكە اسىرۋ شەڭبەرىندە "ەلەكتروندى ۇكىمەتتى" دامىتۋ مەن "تسيفرلىق قازاقستان" باعدارلاماسىن ازىرلەۋ بويىنشا جۇمىستاردى قولعا الۋدا", - دەپ اتاپ كورسەتتى د. اباەۆ.