استانادا جاڭاجىل كۇندەرى 40-قا جۋىق جول-كولىك اپاتى بولدى, دەپ حابارلايدى ەلوردالىق ءىىد ءباسپاسوز قىزمەتى.
جاڭا جىل تويلاۋ مەرزىمىندە اۋىر قىلمىس جاسالمادى. ەلوردادا 1 500-دەن استام پوليتسيا قىزمەتكەرى, 200-دەن استام قىزمەتتىك اۆتوكولىك قوعامدىق ءتارتىپتى كۇزەتتى. كوشەلەردە پاترۋلدىك قىزمەت كۇشەيتىلىپ, پوليتسيانىڭ ۋچاسكەلىك ينسپەكتورلارى بەلگىلەنگەن اكىمشىلىك اۋماق بويىنشا ءوز قىزمەتتەرىن اتقاردى.
حالىق كوپ سەرۋەندەيتىن ورىندارداعى قاۋىپسىزدىكتى قامتاماسىز ەتۋ ءۇشىن تاۋلىك بويى كەزەكشىلىك ۇيىمداستىرىلدى. پوليتسيا بولىمشەلەرىندە وقيعا ورىندارىنا ۋاقىتىلى جەتۋ ءۇشىن قوسىمشا تەرگەۋ-جەدەل توپتارى قۇرىلدى. جاڭا جىل كۇندەرى پوليتسياعا نەگىزىنەن سپيرتتىك ىشىمدىكتەردى كوپ پايدالانعاننان جانە وتباسىلىق تۇسىنىسپەۋشىلىكتەردەن بولعان كەلىسپەۋشىلىكتەر تۋرالى قوڭىراۋلار كەلىپ تۇسكەن. ونداي حابارلامالار سانى 180-گە جەتكەن. ايتىلعان ورىندارعا قوسىمشا قۇرىلعان توپتار بارىپ, اكىمشىلىك جانە الدىن الۋ شارالارىن قولداندى.
40-قا جۋىق جول-كولىك وقيعالارى تىركەلىپ, سالدارىنان 5 ادام ءتۇرلى دەنە جاراقاتىن الدى. 31 جەلتوقسان جانە 4 قاڭتار ارالىعىندا قالالىق ىشكى ىستەر دەپارتامەنتىنىڭ جەكە قۇرامى كۇشەيتىلگەن تۇردە قىزمەت ەتەدى.