2017 جىلدان باستاپ قۇقىق قورعاۋ ورگاندارى قىزمەتكەرلەرىنىڭ كۇزەتتە ءجۇرۋ كەزىندەگى ەرەجەلەرى ءوزگەرەدى. بۇل تۋرالى ورتالىق كوممۋنيكاتسيالار قىزمەتىندە وتكەن باسپاسوز كونفەرەنتسياسىندا ىشكى ءىستەر مينيسترلىگى اكىمشىلىك پوليتسيا كوميتەتى توراعاسىنىڭ ءبىرىنشى ورىنباسارى الىبەك كەڭەسباەۆ ءمالىم ەتتى.
ونىڭ ايتۋىنشا, ىشكى ىستەر مينيسترلىگى ىشكى ىستەر ورگاندارىنىڭ جول ءجۇرىسىن قاداعالاۋ كەزىندە اۆتوپاترۋلدەۋ ادىسىنە تولىقتاي كوشۋىنە, سونداي-اق, جالپى, جول ءجۇرىسى قاعيدالارى بۇزۋشىلىقتارىنىڭ ۇشتەن ءبىرىن انىقتاۋعا مۇمكىندىك بەرەتىن فوتو جانە بەينەتىركەۋدىڭ بارلىق جەرلەردە ەنگىزىلۋىنە بايلانىستى 2017 جىلدىڭ 1 قاڭتارىنان باستاپ پوليتسيا قىزمەتكەرلەرىنىڭ تاياقشالاردى قولدانبايتىنى تۋرالى شەشىم قابىلدادى.
«كولىك قۇرالدارىن توقتاتۋ پاترۋلدىك اۆتوكولىكتە ورنالاستىرىلعان ارنايى دىبىس جانە جارىق سيگنالدارى, داۋىس زورايتقىش جابدىقتار ارقىلى جۇزەگە اسىرىلاتىن بولادى. كەي جاعدايلاردا (جكو, تج, كەپتەلەك جاعدايلارىندا) كولىك قۇرالدارى قول قيمىلىمەن جانە ءبىر مەزگىلدە ىسقىرۋ ارقىلى توقتاتىلاتىن بولادى», – دەپ اتاپ ءوتتى ءا. كەڭەسباەۆ.
سونداي-اق, ول كەيبىر اكىمشىلىك قۇقىق بۇزۋشىلىقتارعا سالىناتىن ايىپپۇلداردىڭ مولشەرى ازايۋى مۇمكىن ەكەنىن جەتكىزدى.
«جول ەرەجەسىن ورەسكەل بۇزۋ مەن جول-كولىك وقيعاسىنىڭ باستى سەبەپتەرى بولىپ تابىلاتىن اكىمشىلىك قۇقىق بۇزۋشىلىققا قاتىستى ايىپپۇل مولشەرى ازايمايدى. بۇگىنگى تاڭدا ادىلەت مينيسترلىگى جانىنان قۇرىلعان جۇمىس توبى اكىمشىلىك زاڭناما نورمالارىن جەتىلدىرۋ جونىندە جۇمىس ىستەپ جاتىر. سول جۇمىس توبىنىڭ اياسىندا جول-كولىك وقيعاسىنا اكەلمەيتىن كەيبىر اكىمشىلىك قۇقىق بۇزۋشىلىقتارعا سالىناتىن ايىپپۇلداردىڭ مولشەرىن ازايتۋ ماسەلەسى قاراستىرىلۋى مۇمكىن», – دەپ ءمالىم ەتتى كوميتەت توراعاسىنىڭ ورىنباسارى.
ايتا كەتەيىك, جاڭا ەرەجەلەر اقش, باتىس ەۋروپا ەلدەرى جانە وزگە دە شەت مەملەكەتتەردىڭ وزىق تاجىريبەلەرىن ەسكەرە وتىرىپ ەنگىزىلگەن.
ايدار ورىسباەۆ,
«ەگەمەن قازاقستان»