تاياۋدا قاراعاندىدا وڭدەۋشى كاسىپورىن ۇيىمداستىرۋ بويىنشا وتكىزىلگەن تەندەردىڭ قورىتىندىسى جاريالاندى. جەڭىمپاز اتانعان «Recycling Company» جشس جىلىنا 50 مىڭداي ەسكى اۆتوماشينانى قابىلداپ, مەتالدارىن قايتا بالقىتۋعا جىبەرۋدى موينىنا الىپ وتىر.
قولدانىستان شىعىپ قالعان كولىك قۇرالدارىن كادەگە جاراتۋمەن شۇعىلداناتىن قازاقستانداعى تۇڭعىش زاۋىتتىڭ قۇرىلىسى الداعى جىلدىڭ ناۋرىز ايىندا باستالىپ, جارتى جىل ىشىندە اياقتالادى دەپ جوسپارلانعان. «Recycling Company» جشس زاۋىتتى يتاليالىق زاماناۋي قوندىرعىمەن جابدىقتاماقشى. بۇل قوندىرعىنىڭ كومەگىمەن ساعاتىنا 20-25, اۋىسىم سايىن 150-شاقتى جەڭىل اۆتوكولىكتى «ەتتارتقىشتان وتكىزگەندەي» ەتۋگە بولادى ەكەن. ياعني, زاۋىت جىل سايىن 50 مىڭ اۆتوماشينانى قايتا جاراتۋعا بولاتىن مەتالل شيكىزاتىنا اينالدىرا الادى.
ەسكى كولىكتەردى مەتالل سىنىقتارىنا اينالدىرماس بۇرىن, ولار مىندەتتى تۇردە تەحنيكالىق سۇيىقتىقتاردان تازارتىلىپ, سىرتقى پوشىمى تىعىزدالىپ-نىعىزدالىپ, قاراعاندى وبلىسىنداعى مەتاللۋرگيالىق زاۋىتتارعا جونەلتىلەدى.
بۇل ەسكى كولىگىنىڭ قاڭقاسىنان قۇتىلا الماي جۇرگەن ازاماتتار ءۇشىن دە, مەتالل شيكىزاتىن قولايلى باعامەن العىسى كەلەتىن كاسىپورىندار ءۇشىن دە ءتيىمدى بولماق.
قايرات ءابىلدينوۆ,
«ەگەمەن قازاقستان»
قاراعاندى