نەگىزگى ماماندىعى اكتەر بولسا دا, ەل ونى الدىمەن ايتىس ساحناسىنان كورىپ, اقىن رەتىندە تانىدى. اعالارمەن ايتىسسا ىنىلىگىن, ىنىلەرمەن ايتىسسا ىرىلىگىن كورسەتەتىن, اپكەلەرىن ادەمى ازىلىمەن اسپەتتەپ وتىرسا دا ادەپتىلىگىن ساقتايتىن سارى اۋىز بالاپاننىڭ ساحناداعى العاشقى قادامى ءساتتى باستالدى.
ءجۇرسىن ەرماننىڭ ءوزى كوپتەن جاسىرىپ جۇرگەن «كوجەگىمىز» دەپ القالى جۇرتتىڭ الدىنا شىعارىپ, توپقا قوسىپ, توماعاسىن سىپىردى. جاعىمدى داۋىسى, جالىندى سوزىمەن جاراسىم تاپقان جاس اقىن كوپتىڭ كوڭىلىنەن شىعىپ, كورەرمەننىڭ كوزايىمىنا اينالدى. ول كىم دەيسىز عوي؟ ول – تورەعالي تورەالى. ايتىستىڭ اۋىلىنان قانات قاعىپ, ەسترادانىڭ تورىنەن توبە كورسەتىپ جۇرگەن تورەعاليدىڭ اتاعى اسپانداماسا, الاسارعان جوق. سەبەبى, كومەيىنەن توگىلگەن ءاربىر ءان كورەرمەننىڭ كوكەيىنە بارىپ قۇيىلىپ جاتىر. تورەعاليدىڭ ءوزى ايتپاقشى, ء«ان بولسىن, باسقا بولسىن جارق ەتىپ شىققان كەز كەلگەن جاقسى دۇنيەنىڭ ارتىندا جانى قازاق, قانى قازاق ازاماتتار جۇرەدى. كورەرمەن, تىڭدارمان سەنىڭ ونەرىڭە قول سوعىپ قوشەمەتتەپ وتىرسا دا, ولار ساحنانىڭ سىرتىندا قانداي ەڭبەكتىڭ اتقارىلىپ جاتقانىن, قانشاما ماڭداي تەردىڭ توگىلگەنىن سەزىنە بەرمەيدى. سول سياقتى, مەنىڭ دە ونەر جولىمدا وزىندىك قولتاڭباسى بار ازاماتتار بار. قاينار الاگوزوۆ, ايان سەيىتوۆ سەكىلدى اقىن دوستارىممەن قۇرال مولجانوۆ سىندى سوزىمىزگە ءان جازاتىن تالانتتى باۋىرلارىمنىڭ ەڭبەگى ەرەكشە». ءيا, «جالعىز اعاش ورمان بولماس, جالعىز كىرپىش قورعان بولماس» دەگەندەي, اينالاڭدى تاسپەن ەمەس, دوسپەن قالاعانعا نە جەتسىن. بۇل رەتتە تورەعاليدىڭ باعى باسىم دەۋگە بولادى. «ەرىندەرى كەسەدەن باسقا جەرگە تيمەگەن. قادىرىمدى بىلەتىن قازاق قىزعا ۇيلەنەم», دەپ كەلەتىن ءاننىڭ دە ءسوزىن قاينار جازعانىن بىرەۋ بىلسە, بىرەۋ بىلمەس. سازى مەن سوزىنەن ساتيرالىق سارىننىڭ سامالى ەسەتىن بۇل تۋىندىنى وتكەن جىلدىڭ ولجاسى دەۋگە بولادى. تىلگە جەڭىل, جۇرەككە جىلى ۇشىراساتىن ءاندى ءبىر تىڭداعاننان-اق جاتتاپ الاسىز. ءسوز قۇرىلىمىنىڭ وڭايلىعى سونشالىق, ەكىنشى ەستىگەندە ەرىكسىز ساناڭىزدا سايراپ تۇرادى. تىركەستەرى ءتىلىڭىزدىڭ ۇشىنا وزىنەن-ءوزى ورالادى. «اللو» دەگەن ءاننىڭ ءسوزىن جازسا دا, تەلەفونىن «اللو» دەپ ارەڭ كوتەرگەن قايناردى «ىزدەمە» دەسە دە, ىزدەپ تاۋىپ الدىق. سويتسەك, ول «قازاق قىزعا ۇيلەنىپ تە» ۇلگەرىپتى. ونى ىزدەۋدەگى ماقساتىمىز – «قازاق قىزعا ۇيلەنەم» ءانىنىڭ شىعۋ تاريحىن, جازىلۋ يدەياسىن وقىرمانمەن ءبولىسۋ ەدى. «بول جانىمدا» دەگەن اقىننىڭ جانىندا بولا الماساق تا, ۇيالى تەلەفون ارقىلى سىمسىز بايلانىس ورناتىپ, ءاننىڭ قالاي شىققانىن بىلدىك. «بۇل ءان بۇگىنگى تاڭداعى قازاق قىزدارىنىڭ شەتەلدىك جىگىتتەرگە تۇرمىسقا شىعىپ جاتقانىنا جانە قازاق جىگىتتەرىنىڭ شەتەلدىڭ ارۋلارىن جار قىلىپ جاتقانىنا ىشتەي قارسىلىق ءبىلدىرىپ, ومىرگە كەلگەن دۇنيە ەدى. ەل-حالىقتىڭ اراسىندا تارالىپ, كىشكەنتاي بوبەكتەرىمىز جاتقا ايتىپ جۇرگەنىن كورگەندە, كىشكەنە بولسا دا ارمانىمىز ورىندالعانداي قۋانىپ قالامىز. بۇلدىرشىندەردىڭ بارلىعى «قازاق قىزعا ۇيلەنەم» دەپ ايتىپ جۇرەدى. سول ارقىلى ولاردىڭ ميلارىنا اقپارات جەتەدى. ءسويتىپ, ولار وسكەندە قازاق قىزىنا ۇيلەنەدى دەگەن سەنىمىمىز بار. نەگىزىنەن ءاننىڭ ءماتىنى داستارقان باسىندا دۇنيەگە كەلدى. ءبىر وتىرىستا بىرنەشە ۇلتتىڭ قىزدارى بولدى, سول جيىندا مەن ارقايسىسىنا سۋىرىپ سالىپ ولەڭ قۇرادىم. تورەعالي ونى ديكتافونعا باسىپ العان ەكەن. ءان قىلىپ شىعارۋ يدەياسى سودان تۋىندادى. ءوزىم ايتىسكەر اقىن بولعاندىقتان وسىنداي ءساتتى شۋماقتار سۋىرىپ سالىپ, اياق استىنان ايتقاندا كەلەدى», دەيدى اۆتور. د.داۋلەتوۆتىڭ «ەھ, جانىم, كۇلاينا» ءانىنىڭ ماقامىنا سالىنىپ ايتىلعان, استارىندا شىندىعى دا بار ءازىل ءان جىل بويى جۇرەكتەرگە قۋانىش سىيلاعانى جاسىرىن ەمەس. ونەرپاز ورەندەردەن كەلەر جىلى دا ومىرشەڭ تۋىندىلار كۇتەمىز.
راۋان قايدار, «ەگەمەن قازاقستان»