«ءان قۇدىرەتى جايلى اريستوتەل: «مۋزىكا ادام جانىنا ەتيكالىق تۇرعىدان بەلگىلى دارەجەدە اسەر ەتە الادى. سوندىقتان, ونى جاستار تاربيەسىنە ارنالعان پاندەردىڭ قاتارىنا قوسۋ قاجەت», – دەسە, سيۋن-تسزى: «مۋزىكا حالىقتىڭ ساناسىن تەرەڭ باۋراپ, ونىڭ مىنەز-قۇلقى مەن ادەت-عۇرپىن وڭاي وزگەرتەدى», – دەگەن ەكەن.
الايدا, ۇلتتىق قۇندىلىقتارىمىزدى ۇلىقتاۋ كەمشىندەۋ سوعىپ, باتىس مادەنيەتىنە ەلىكتەپ-سولىقتاۋشىلىق باسىمداپ تۇرعان, ءارى كوكەيلەرىن اقشا تەسكەن پەندەلەر كوبەيگەن قازىرگى قوعامىمىزدا ءان ونەرى دە ساۋداعا سالىنىپ, حالقىمىزدىڭ نازارىنا مارجان تۋىندىلاردىڭ ورنىنا ارزان تۋىندىلاردى ءجيى ۇسىنۋ تەرىس ادەتكە اينالىپ بارادى. اسىرەسە, كەيبىر وتاندىق تەلەارنالارىمىز وڭاي تابىستىڭ كوزى وسى ەكەن دەپ, ابايشا ايتقاندا, «باقىرعان قۇر ايعاي» انسىماقتاردى تىكەلەي دە, جاناما دا جارنامالاۋدىڭ جولىنا ءتۇسىپ العان. ولار وسىلايشا ءوز بەدەلدەرىنە نۇقسان كەلتىرىپ قانا قويماي, جۇرتشىلىقتىڭ مادەني تالعامىن تومەندەتىپ, شىن جۇلدىز بەن جاساندى جۇلدىزدى ايىرا المايتىنداي كۇيگە ۇشىراتىپ تۇر. بۇدان قولىندا قوماقتى قاراجاتى, توقپاعى مىقتى سۇيەۋشىسى جوق جاس دارىندار زارداپ شەگىپ, قيانات كورەتىندىگى انىق.
تاعى ءبىر ويلانارلىق جايت – ءتىپتى, تانىمال انشىلەر شىرقاپ جۇرگەن, اۋەنى ءاپ-ادەمى اندەردىڭ كەيبىرىنىڭ ولەڭى ولەڭ ەمەس, قاسيەتتى پوەزياعا ءۇش قايناسا سورپاسى قوسىلمايتىن, ۇيقاس ءۇشىن انا ءتىلىمىزدىڭ بەلىنەن باسىپ, بەلومىرتقاسىن ءۇزىپ, شىرىلداتىپ جاتاتىن شالا ساۋاتتى ولەڭسىماقتار ەكەندىگى. مىنە, وسىنداي, وسەر ەلگە جاراسپاس كەلەڭسىز كورىنىستەردى تىيۋ ماقساتىندا ءتومەندەگىدەي شارالاردى قابىلداپ, تاباندىلىقپەن ىسكە اسىرۋ قاجەت دەپ پرەمەر-ءمينيستردىڭ ورىنباسارى يمانعالي تاسماعامبەتوۆكە تومەندەگى تالاپتاردى ورىنداۋدى ءوتىنگەن ساۋال جولدادىق:
بىرىنشىدەن, «مادەنيەت تۋرالى» قازاقستان رەسپۋبليكاسى زاڭىنىڭ 7-بابىنىڭ 21-تارماعىنا سايكەس ءمادەنيەت جانە سپورت مينيسترلىگىنىڭ جانىنان ءان ونەرى بويىنشا كوركەمدىك كەڭەس قۇرۋ جانە ول تۋرالى ەرەجەنى جاساپ, بەكىتۋ قاجەت. ونىڭ قۇرامىنا ەلىمىزگە بەلگىلى ونەر قايراتكەرلەرى, كومپوزيتورلار مەن اقىندار ەنگىزىلۋگە ءتيىستى.
اتالعان كوركەمدىك كەڭەسكە كوپشىلىك ساحنالاردا ورىندالاتىن جانە تەلەارنالار مەن راديو ارقىلى تاراتىلاتىن اندەردىڭ اۋەندەرى مەن ولەڭدەرىنىڭ كاسىبي دەڭگەيىن باعالاۋ مىندەتى جۇكتەلگەنى ءجون. سونداي-اق, ول عاسىرلار سىنىنا سىر بەرمەي, ساف التىنداي ساقتالعان حالىق اندەرى مەن ايگىلى كومپوزيتورلاردىڭ جۇرتقا تانىمال اندەرىن بۇرمالاپ ورىنداۋعا جول بەرمەۋ جايىن دا ۇدايى نازاردا ۇستاسا, قۇبا-قۇپ.
ەكىنشىدەن, اقپارات جانە كوممۋنيكاتسيالار مينيسترلىگى رەسپۋبليكالىق دەڭگەيدە تەلەۆيدەنيە مەن راديو ارقىلى مەملەكەتتىك اقپاراتتىق ساياساتتى جۇرگىزۋ جونىندەگى مەملەكەتتىك تاپسىرما اياسىندا حالىق اندەرىن, اتاقتى حالىق كومپوزيتورلارىنىڭ اسىل مۇرالارىن جانە وسى زامانعى بەلگىلى كومپوزيتورلاردىڭ شىعارمالارىن ناسيحاتتاۋ قاجەتتىگىن ەسكەرگەنى ءجون.
ۇشىنشىدەن, مادەنيەت جانە سپورت مينيسترلىگى مەن اقپارات جانە كوممۋنيكاتسيالار مينيسترلىگى بىرلەسە وتىرىپ, ءداستۇرلى اندەردى ورىندايتىن دارىندى انشىلەردىڭ استانا مەن الماتى قالالارىنىڭ جانە وبلىس ورتالىقتارىنىڭ ۇلكەن ساحنالارىندا جەكە كونتسەرتتەرىن ۇيىمداستىرۋ جانە ولارعا بارىنشا اقپاراتتىق قولداۋ كورسەتۋ ماسەلەلەرىن وڭىنان شەشسە, دۇرىس بولار ەدى.
تورتىنشىدەن, مادەنيەت جانە سپورت مينيسترلىگى ەلىمىزدە قازاق كۇرەسىن قايتادان وركەندەتۋدىڭ تاماشا ونەگەسىن ۇلگى ەتىپ ۇستانا وتىرىپ, ونەرگە جاناشىر ازاماتتاردىڭ ءجاردەمىمەن ءداستۇرلى اندەردى ورىنداۋشىلاردىڭ وڭىرلىك جانە رەسپۋبليكالىق بايقاۋلارىن وتكىزۋدى قولعا السا, نۇر ۇستىنە نۇر.
بەسىنشىدەن, مادەنيەت جانە سپورت مينيسترلىگى مەن سولتۇستىك قازاقستان وبلىسىنىڭ اكىمدىگى بىرلەسىپ, ەكى جىلدا ءبىر رەت وتكىزىپ جۇرگەن «ماعجان كوكتەمى» رەسپۋبليكالىق ونەر فەستيۆالىندە ۇلى اقىن ماعجان جۇماباەۆتىڭ ولەڭدەرىنە شىعارىلعان اندەر بايقاۋىنىڭ جەڭىمپازى مەن ءجۇلدەگەرلەرى اتانعان كومپوزيتورلاردىڭ شىعارمالارىن اتالعان ونەر سايىسىندا عانا جۇرتشىلىق نازارىنا ۇسىنۋمەن شەكتەلمەي, ولاردى ەلىمىزدىڭ باسقا ساحنالارىندا دا ورىنداۋدى, سونداي-اق رەسپۋبليكالىق تەلەۆيدەنيە مەن راديو ارقىلى ناسيحاتتاۋدى جولعا قويسا, ۇتىلمايتىنىمىز انىق.
التىنشىدان, انگە سۇرانىپ تۇرعان تاماشا ولەڭدەرگە مۋزىكا شىعارتۋ ارقىلى اندەردىڭ ءماتىندەرىنىڭ ساپاسىن ارتتىرۋ ءارى ۇزدىك پوەزيالىق تۋىندىلاردى كەڭىنەن دارىپتەۋ ماقساتىندا مادەنيەت جانە سپورت مينيسترلىگى قازاقستان كومپوزيتورلار وداعىمەن جانە قازاقستان جازۋشىلار وداعىمەن بىرلەسە وتىرىپ, بەلگىلى كومپوزيتورلار مەن اقىنداردىڭ اراسىندا تىعىز شىعارماشىلىق بايلانىس ورناتۋعا ۇيىتقى بولسا, قۇبا-قۇپ.
جانە, جەتىنشىدەن, قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى ءبىرتالايىنىڭ اۆتورلارىنىڭ ەسىمدەرى ۇمىتىلىپ, حالىق اندەرى دەپ اتالىپ كەتسە دە, قازىرگى زاماندا دا بىرەگەيلىگىن ايعاقتاپ وتىرعان, ماڭگى وشپەس اسىل قازىنامىز – قازاق حالقىنىڭ ءداستۇرلى ءان ونەرىن ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىنە ەنگىزۋ ماسەلەسىن قاراستىرسا, يگى.
«ءاننىڭ دە ەستىسى بار, ەسەرى بار» دەپ اباي ايتقانداي, ەسەر اندەردىڭ ەفير ارقىلى ەرتەلى-كەش حالقىمىزدىڭ ساناسىن جاۋلاپ, ۇلتتىق ءدىلى مەن رۋحىنا تەرىس اسەرىن تيگىزۋىن تىيۋ ماقساتىندا ءان ونەرى سالاسىندا ءتارتىپ ورناتىپ, تالعام مەن تالاپتى كۇشەيتىپ, شىن دارىندارعا جول اشىپ, جان-جاقتى قولداۋ كورسەتەتىن كەز جەتتى.
كارىباي مۇسىرمان,
ءماجىلىس دەپۋتاتى