ونىڭ ىشىندە ءداندى داقىلدار 2,9 ميلليون گەكتار القاپتى قۇراسا, مايلى داقىلدار كولەمى – 712,2 مىڭ گەكتار. وبلىستىق اۋىل شارۋاشىلىعى باسقارماسىنىڭ ماماندارى بەرگەن مالىمەتتەرگە قاراعاندا, استىق ءوندىرىسىن ارتاراپتاندىرۋعا باسا ماڭىز بەرىلىپ, مايلى داقىلدار 200 مىڭ, بۇرشاق تۇقىمداس داقىلدار 53 مىڭ گەكتارعا كوبەيگەن. بيىل قانت قىزىلشاسى دا وسىرىلەدى. قاجەتتى 65 مىڭ توننا ديزەل وتىنىمەن قامتاماسىز ەتىلگەن. استىق تاناپتارىن ارالاپ شىققان وبلىس باسشىسى قۇمار اقساقالوۆ جاۋاپتى ناۋقاندى ءوز دەڭگەيىندە اتقارۋعا بارلىق جاعدايدىڭ جاسالعانىن, سۋ تاسقىنى ەشقانداي كەدەرگى كەلتىرمەيتىنىن اتاپ كورسەتتى. «كوكونىستەردى كوبىرەك وسىرۋگە باسا كوڭىل ءبولىپ وتىرمىز. وڭتۇستىك جاقتاردان تاسىمالداماي, ءوز مۇمكىندىگىمىزدى ءتيىمدى پايدالانۋىمىز كەرەك. ازىق-ت ۇلىكتىڭ جەتكىلىكتى قورىن قالىپتاستىرۋ ايرىقشا باقىلاۋدا تۇر. ول ءۇشىن اگروونەركاسىپ سالاسىن دامىتۋدىڭ تۇجىرىمداماسىن جاساۋعا تاپسىرما بەرىلدى. رەنتابەلدى داقىلدار وسىرۋمەن شۇعىلدانۋعا بەتبۇرىس جاسايتىن بولامىز»,– دەدى قۇمار ىرگەباي ۇلى. بۇگىنگى كۇنى كوكتەمگى دالا جۇمىستارىنا 30 مىڭعا جۋىق اۋىل شارۋاشىلىق تەحنيكالارى جۇمىلدىرىلىپ, قىرداعى قاربالاس كەڭ ءورىس العان. شالعايداعى ءۋاليحانوۆ اۋدانى مەملەكەتتىك قولداۋدىڭ ارقاسىندا جىلدا بىتىك استىق ءوسىرىپ كەلەدى. بيىلعى قۇلشىنىستارى ءتىپتى جوعارى. القاپتاردا ىلعال ساقتاۋ, توپىراقتى وڭدەۋ شارالارى تىڭعىلىقتى جۇرگىزىلىپ, ەندى 265 مىڭ گەكتار جەرگە ءدان سىڭىرۋگە قىزۋ كىرىسىپ كەتكەن. سول سياقتى, قىزىلجار اۋدانىنىڭ اگرارشىلارى زاماناۋي تەحنولوگيالاردى وندىرىسكە ەنگىزۋ, تەحنيكالاردى جاڭارتۋ ەسەبىنەن مول ءونىم نەگىزىن قالاپ ءجۇر. بىلتىرعى جىلدىڭ قورىتىندىسى بويىنشا, مايلى داقىلدار كولەمى جونىنەن ءتورتىنشى ورىنعا تابان تىرەسە, بيىل العا ءبىرتابان جىلجىعانى بايقالادى. ال مايلى داقىلدار ىشىندە راپس, زىعىر, كۇنباعىسقا ەداۋىر باسىمدىق بەرىلگەن. – ۇستىمىزدەگى جىلى 198 مىڭ گەكتار القاپقا جازدىق داقىلدار ورنالاستىرۋ جوسپارلانعان. مايلى داقىلدار ءۇش مىڭ گەكتارعا ۇلعايتىلدى. «زەنچەنكو جانە ك» كومانديتتىك سەرىكتەستىگى العاش رەت قازاقستاندىق جاڭا ەليتالى سورتتار ءوسىرۋ تاجىريبەسىن ەنگىزبەكشى. «ەسىل» نەسيەلىك سەرىكتەستىگى قۇرامىنا ەنەتىن شارۋاشىلىقتارعا مينەرالدى تىڭايتقىشتار مەن پەستيتسيدتەر, جانار-جاعارماي ماتەريالدارىن ساتىپ الۋعا جەڭىلدىكتەر قاراستىرىلعان. 32 قاتىسۋشىعا 519 ميلليون تەڭگە نەسيە بەرىلدى, – دەدى سويلەسكەنىمىزدە قىزىلجار اۋداندىق اۋىل شارۋاشىلىعى ءبولىمىنىڭ باسشىسى ءومىرباي وماروۆ. سينوپتيكتەردىڭ بولجاۋىنشا, كوكتەمنىڭ سوڭعى ايى قۇبىلمالى بولاتىن ءتۇرى بار. وسىنى ەسكەرگەن سولتۇستىكقازاقستاندىق اگرارشىلاردىڭ بار كۇش-جىگەرى مەن جيناقتالعان مول تاجىريبەسى القاپتارعا ءدان ءسىڭىرۋ جۇمىستارىن ءوز مەرزىمىندە اياقتاپ شىعۋعا باعىتتالعان.
ءومىر ەسقالي, «ەگەمەن قازاقستان» سولتۇستىك قازاقستان وبلىسى