كەشە ورتالىق سايلاۋ كوميسسياسىنىڭ مۇشەلەرى پارلامەنت سەناتى دەپۋتاتتارى سايلاۋىنىڭ تولىق قورىتىندىسىن جاريا ەتىپ, ءتيىستى قاۋلى قابىلدادى.
19 تامىزعا پارلامەنت سەناتى دەپۋتاتتارىنىڭ سايلاۋىن تاعايىنداۋ تۋرالى قازاقستان رەسپۋبليكاسى پرەزيدەنتىنىڭ جارلىعىنا سايكەس وتكىزىلگەن سايلاۋ جۇمىستارىنىڭ قورىتىندىسىمەن تانىستىرعان ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ پارلامەنت سەناتى دەپۋتاتتارىنىڭ كەزەكتى سايلاۋى وتكەندىگىن اتاپ كورسەتتى. «ەلىمىزدىڭ كونستيتۋتسياسىنا جانە «سايلاۋ تۋرالى» كونستيتۋتسيالىق زاڭىنا سايكەس, پارلامەنتتىڭ جوعارعى پالاتاسىنا 16 دەپۋتات, ياعني ءار وبلىستان, استانا جانە الماتى قالالارىنان ءبىر-ءبىر دەپۋتاتتان سايلاندى. قازاقستان رەسپۋبليكاسىنىڭ ۇكىمەتى جانە جەرگىلىكتى اتقارۋشى ورگاندار ەلباسىنىڭ ۇيىمداستىرۋشىلىق, قارجىلىق, ماتەريالدىق-تەحنيكالىق قامتاماسىز ەتۋ جونىندەگى تاپسىرماسىن ۋاقىتىندا ورىندادى. ەلەكتورالدىق ناۋقان بارىسىندا سەنات دەپۋتاتتىعىنا بارلىعى 96 ۇمىتكەر ۇسىنىلدى. 2008 جىلى ۇسىنىلعان ۇمىتكەرلەر سانى 88 بولاتىن. ناتيجەسىندە, 39 ادام سەنات دەپۋتاتتىعىنا كانديدات بولىپ تىركەلدى جانە ولاردىڭ اتى-جوندەرى مەن تەگى جاسىرىن داۋىس بەرۋ بيۋللەتەندەرىنە ەنگىزىلدى. 2008 جىلى داۋىس 37 كانديداتقا بەرىلگەن بولاتىن», – دەگەن وسك ءتوراعاسى تىزىمگە ەنگىزىلگەن 3 مىڭ 283 تاڭداۋشىنىڭ 3 مىڭ 172-ءسى نەمەسە ولاردىڭ جالپى سانىنىڭ 96,6 پايىزى داۋىس بەرۋگە قاتىسقانىن ءمالىم ەتتى.
2008 جىلعى سەنات سايلاۋىندا 213 بيۋللەتەن جارامسىز دەپ تانىلسا, وسى جولى 26 سايلاۋ بيۋللەتەنى جارامسىز دەپ تانىلىپتى.
«وبلىستىق, استانا جانە الماتى قالالىق سايلاۋ كوميسسيالارىنىڭ داۋىستاردى ساناۋ ناتيجەلەرى تۋرالى حاتتامالار نەگىزىندە قازاقستان رەسپۋبليكاسى ورتالىق سايلاۋ كوميسسياسى 2011 جىلعى 19 تامىزدا پارلامەنت سەناتىنىڭ دەپۋتاتتارى بولىپ استانا قالاسىنان ۆلاديمير رەدكوكاشين, الماتى قالاسىنان اقان بيجانوۆ, اقمولا وبلىسىنان جابال ەرعاليەۆ, اقتوبە وبلىسىنان ەلەۋسىن ساعىندىقوۆ, الماتى وبلىسىنان ءلاززات تۇرلاشوۆ, اتىراۋ وبلىسىنان قايرات يششانوۆ, شىعىس قازاقستان وبلىسىنان تالعاتبەك ءابايدىلدين, جامبىل وبلىسىنان ەرتارعىن استاەۆ, باتىس قازاقستان وبلىسىنان راشيد احمەتوۆ, قاراعاندى وبلىسىنان سەرىك اقىلباي, قوستاناي وبلىسىنان جەڭىس نۇرعاليەۆ, قىزىلوردا وبلىسىنان مۇرات مۇحامەدوۆ, ماڭعىستاۋ وبلىسىنان باقتىباي شەلپەكوۆ, پاۆلودار وبلىسىنان اسحات كۇزەكوۆ, سولتۇستىك قازاقستان وبلىسىنان سامات ەسكەندىروۆ, وڭتۇستىك قازاقستان وبلىسىنان قۋانىش ايتاحانوۆ سايلانعانىن انىقتادى», – دەدى ق.تۇرعانقۇلوۆ.
وسك توراعاسى كەلتىرگەن دەرەكتەر بويىنشا, جاڭا سايلانعان سەنات دەپۋتاتتارىنىڭ ورتاشا جاسى 50-دەن اسادى. ماماندىقتارى بويىنشا 7-ءۋى ينجەنەر, 3-ءى ەكونوميست, 1-ءى زاڭگەر, 5-ءى وزگە ماماندىق يەلەرى. ق.تۇرعانقۇلوۆ ولاردىڭ جەتەۋى قازىرگى دەپۋتاتتار ەكەنىن, بارلىق سايلانعان دەپۋتاتتار «نۇر وتان» حدپ مۇشەلەرى ەكەنىن اتاپ ءوتتى. جاڭادان سايلانعان پارلامەنت سەناتىنىڭ دەپۋتاتتارىنىڭ 6-ى مەملەكەتتىك ورگانداردىڭ قىزمەتكەرلەرى, 2-ءى كوممەرتسيالىق قۇرىلىمداردىڭ وكىلدەرى, ال 1-ءى ۋاقىتشا جۇمىسسىز.
انار تولەۋحانقىزى.