10 تامىز كۇنى استانا تەمىر جول ۆوكزالىنان «مەنىڭ قازاقستانىم» اقپاراتتىق-ناسيحات پويىزى سالتاناتتى جاعدايدا جولعا شىقتى.
پويىز 10-20 تامىزدا ەلىمىزدىڭ سولتۇستىك-شىعىس ءوڭىرلەرىن ارالاپ, ودان كەيىن 10-27 قىركۇيەك ارالىعىندا, وڭتۇستىك-باتىس باعىتىمەن ءجۇرىپ وتەتىن بولادى. ال ءۇشىنشى كەزەڭدە, ياعني 15-26 قاراشا كۇندەرى الماتى – استانا باعىتى بويىنشا وتەدى. وسى ۋاقىت ىشىندە شاراعا قاتىسۋشىلاردىڭ ەلدى مەكەندەردە كونتسەرتتەر قويىپ, جەرگىلىكتى جۇرتشىلىقپەن كەزدەسۋلەرى جوسپارلانىپ وتىر.
بۇل ءىس-شارا مادەنيەت مينيسترلىگى مەن «نۇر وتان» حدپ-نىڭ ۇيىمداستىرۋىمەن وتكىزىلمەكشى. ونىڭ ماقساتى – بارلىق ءوڭىر تۇرعىندارىن ەل تاۋەلسىزدىگىنىڭ 20 جىلدىق مەرەكەسىنە اتسالىسۋعا تارتۋ, تاۋەلسىزدىكتىڭ اكەلگەن جەتىستىكتەرىن ءاربىر ازاماتقا جەتكىزۋ, حالىقتار اراسىنداعى بىرلىك پەن ىنتىماقتاستىقتى, سالاماتتى ءومىر سالتى مەن ەلباسىنىڭ قازاقستان حالقىنا جولداۋىن ناسيحاتتاۋ, شالعاي ەلدى مەكەندەردە تۇراتىن ازاماتتارعا اسا ماڭىزدى ماسەلەلەرگە قاتىستى كومەك كورسەتۋ جانە مەملەكەتتىڭ جاڭا الەۋمەتتىك ساياساتىنىڭ ءمانىن ءتۇسىندىرۋ.
بيىلعى اكتسيا ەل تاۋەلسىزدىگىنىڭ 20 جىلدىق مەرەكەلىك شارالارىن ۇيىمداستىرىپ جاتقان مەملەكەتتىك كوميسسيانىڭ شەشىمى بويىنشا ەلىمىزدىڭ الەۋمەتتىك قىزمەتىنىڭ, دەنساۋلىق ساقتاۋ, قارجى سالاسى, مادەنيەت پەن ونەر وكىلدەرىنىڭ قاتىسۋىمەن وتكىزىلۋدە.
سارسەنبى كۇنى استانادان اتتانعان «مەنىڭ قازاقستانىم» اقپاراتتىق-ناسيحات پويىزىن شىعارىپ سالۋ راسىمىنە مادەنيەت مينيسترلىگىنىڭ جاۋاپتى حاتشىسى جاننا قۇرمانعاليەۆا, «نۇر وتان» حدپ حاتشىسى ەرلان قارين, قالا اكىمىنىڭ ورىنباسارى ايدا بالاەۆا مەن سالالىق مينيسترلىكتەردىڭ جاۋاپتى قىزمەتكەرلەرى قاتىسىپ, جولعا شىققان ازاماتتارعا ءسات ساپار تىلەدى. سالتاناتتى راسىمدە «نۇر وتان» حدپ حاتشىسى ەرلان قارين ءبىزدىڭ كەڭ-بايتاق وتانىمىزدىڭ ءار قيىرىنا, ءاربىر شاڭىراققا جىلىلىق پەن قۋانىش, قامقورلىق سىيلاۋ ءۇشىن ۇلكەن جولعا ءبىر توپ ازاماتتاردىڭ اتتانىپ بارا جاتقانىن, وسى پويىز اياسىندا «نۇر وتان» پارتياسىنىڭ قوعامدىق قابىلداۋلارى ءوز ەسىگىن كەلەمىن دەۋشىلەرگە ايقارا اشاتىنىن ايتىپ, اتالعان شارانىڭ ماڭىزىنا توقتالىپ ءوتتى. «بۇل پويىزدى حالىق اسىعا كۇتۋدە, – دەدى ول. – ءويتكەنى, ول ءتاۋەلسىزدىكتىڭ ءمان-ماڭىزىن ءتۇسىندىرىپ, جەرگىلىكتى حالىقتى ەلباسىنىڭ قازاقستان حالقىنا جولداۋىندا بەرگەن تاپسىرمالارىنىڭ ورىندالۋ بارىسىمەن تانىستىرادى. قازىر ۇلكەن جولعا اتتانعالى تۇرعان پويىز دەلەگاتتارى جولدىڭ الىستىعىنا قاراماي بارلىق سىناققا دا, توقتايتىن جەرلەردەگى جۇمىسقا دا ءازىر».
مەرەكەلىك شارا ودان ءارى كونتسەرتتىك باعدارلامامەن جالعاستى. «گۇلدەر» مەملەكەتتىك انسامبلى «سىلقىلداق» ءبيىن ورىنداسا, اتاقتى ءانشى, ءمادەنيەت قايراتكەرى التىنبەك قورازباەۆ پەن حالىقارالىق كونكۋرستاردىڭ لاۋرەاتى ەۆگەني شاحراي ءوز ونەرلەرىن ورتاعا سالدى.
جالپى, «مەنىڭ قازاقستانىم» اقپاراتتىق-ناسيحات پويىزىن ۇيىمداستىرۋدا «نۇر وتان» پارتياسىنىڭ كوپ جۇمىس ىستەگەنىن ايتۋعا بولادى. مۇنداي پويىزدى ۇيىمداستىرۋ ماسەلەسى پارتيا ءتوراعاسىنىڭ ءبىرىنشى ورىنباسارى نۇرلان نىعماتۋليننىڭ پارتيانىڭ وبلىستىق جانە قالالىق فيليالدارىنىڭ جەتەكشىلەرىمەن ءوتكەن كەزدەسۋلەردە كوتەرىلگەن ەدى.
داستان كەنجالين.