الماتى قالاسى اكىمدىگىنىڭ تىلدەردى دامىتۋ, مۇراعاتتار جانە قۇجاتتاما باسقارماسى, حالىقارالىق «اباي» قورى جانە قازاقستان جازۋشىلار وداعى بىرلەسىپ قازاقتىڭ كەمەڭگەر ۇلى, ويشىل ءھام گۋمانيست, بارشا ادامزاتقا ورتاق تۇلعا اباي قۇنانباەۆتىڭ تۋعان كۇنىنە ارنالعان ءداستۇرلى «اباي وقۋلارىن» وتكىزدى.
مەملەكەتتىك ءتىل سياساتىن جۇرگىزۋ جانە اباي شىعارماشىلىعىن ناسيحاتتاۋ ارقىلى قوعامدىق كەلىسىم مەن رۋحاني بىرلىكتى نىعايتۋ, ءوتانسۇيگىشتىك سەزىمگە تاربيەلەۋ, سونداي-اق قازاقتىڭ ۇلتتىق ءمادەنيەتىنە, ونەرىنە, ادەبيەتىنە دەگەن كوپشىلىكتىڭ ىقىلاسىن ارتتىرۋ نيەتىندە ۇيىمداستىرىلاتىن بۇل شارا بيىل اباي اتىنداعى وپەرا ءجانە بالەت تەاترىنىڭ الدىندا بولدى.
«اباي وقۋلارىنا» زيالى قاۋىم وكىلدەرى, رەسمي قىزمەتكەرلەر, عالىمدار مەن اقىن-جازۋشىلار, ونەر قايراتكەرلەرى, قوعامدىق ۇيىمداردىڭ جەتەكشىلەرى, بۇقارالىق اقپارات قۇرالدارىنىڭ تىلشىلەرى, ستۋدەنت جاستار مەن مەكتەپ وقۋشىلارى قاتىستى. ءىس-شارا قوناقتارى حاكىم ابايدىڭ ادەبي شىعارماشىلىق مۇراسى تۋرالى وي-پىكىر تىڭداپ, اباي ولەڭدەرىن مانەرلەپ وقىعان جاستاردىڭ ونەرلەرىنە, قازاقتىڭ حالىق اندەرى مەن كۇيلەرىنە ءتانتى بولدى.
قانات ەسكەندىر, الماتى.