شەنەۋنىكتەردىڭ پارامەن ۇستالۋىنا قوستانايلىقتار اسا تاڭقالمايتىن بولدى. بۇل كورىنىسكە جۇرتتىڭ ەتى ءولىپ بارا جاتقانداي ما قالاي. وسىدان از عانا ۋاقىت بۇرىن وبلىس اكىمى اپپاراتىنىڭ جەتەكشىسى ا.تۆەردوحلەبوۆتىڭ اسا ءىرى كولەمدەگى پارامەن ۇستالعاندىعى رەسپۋبليكاعا بەلگىلى بولىپ ەدى. بىراق قوستانايلىق شەنەۋنىكتەردىڭ پارادان اياعىن تارتار ءتۇرى كورىنبەيدى.
ولاي دەيتىنىمىز, قوستاناي قالالىق ءماسليحاتىنىڭ دەپۋتاتى, قالالىق مۇگەدەكتەر قوعامىنىڭ توراعاسى سەرگەي بويكو ءوزىنىڭ ۇستىنەن قىلمىستىق ءىس قوزعاتپاۋعا زاڭسىز شەشىم شىعارىپ بەرۋ ءۇشىن وبلىستىڭ قارجى پوليتسياسى قىزمەتكەرىنە ءبىر ميلليون تەڭگە پارا ۇسىنىپ, سونىڭ جارتىسىن بەرىپ جاتقان ۇستىندە ۇستالدى. سوتتىڭ سانكتسياسىمەن ول تۇتقىندالدى.
قوستاناي قالالىق №2 سوتىندا جۋرناليستەرگە تۇسىندىرگەنىندەي, سەرگەي بويكو لاۋازىم يەسىنە ءىرى كولەمدە پارا بەرگەنى ءۇشىن ايىپتالعان. ەندى قىلمىستىق كودەكستىڭ 312-بابى 4-ءبولىمىنىڭ «ب» تارماعى ونى 7 جىلدان 12 جىلعا دەيىن باس بوستاندىعىنان ايىرىپ, مۇلكىن تاركىلەۋدى كوزدەيدى.
سەرگەي بويكو قالالىق مۇگەدەكتەر قوعامىن ون ءبىر جىل بويى باسقاردى. وسى جىلداردا مەملەكەت قازىناسىنان بولىنگەن ميلليوندار تاعدىردىڭ جازۋىمەن ءمۇمكىنشىلىگى شەكتەۋلى جاندارعا جەتتى مە, الدە توراعانىڭ قالتاسىنا بۇرىلىپ كەتتى مە, ونى قارجى پوليتسياسى مەن ءتيىستى ورىنداردىڭ تەكسەرۋى قوسىمشا انىقتاي جاتادى. جەرگىلىكتى اقپارات كوزدەرىنەن بەلگىلى بولعانىنداي, ءمۇگەدەكتەرگە ارنالعان تاكسي ءجونىندەگى ماسەلەنىڭ باسى اشىلۋعا جاقىن. عارىپ جاندارعا ارناپ قىزمەتتىڭ بۇل تۇرىنە ۋاقىتىسىندا مەملەكەتتەن قارجى ءبولىنگەن, بىراق ونىڭ راحاتىن ءمۇگەدەك جاندار كورمەگەنگە ۇقسايدى. بۇل ءبىر عانا مىسال. ال ەرىكتى قوعامنىڭ 1800-دەن اسا مۇشەسى بار.
ادەتتە, مەملەكەت بولگەن از عانا جاردەم اقشانىڭ بەتىنە قاراعان عارىپ جانداردىڭ نەسىبەسىن ەكى اياق, ەكى قولى ساۋ ءارى مەملەكەت سەنىم ارتقان بويكولار قاعىپ كەتە بەرسە, قايىرىمدىلىق دەگەن ءسوزدەن دە قادىر قاشا ما, قايتەدى... دەگەنمەن, «كوپ اسقانعا ءبىر توسقان». كوپتىڭ نالاسى جىبەرمەدى.
ءنازيرا جارىمبەتوۆا,
قوستاناي.