قوستانايدا بۇيرەك اۋرۋىنىڭ زاردابىن شەگىپ جۇرگەندەر از ەمەس. ادامنىڭ تىرشىلىك كەشۋىنىڭ ءبىر كىلتى بولىپ سانالاتىن ءبۇيرەكتىڭ اۋىر سىرقاتىن اسقىندىرىپ العاندار تىرشىلىكتەن قول ءۇزىپ قالماۋ ءۇشىن وبلىستىق اۋرۋحاناداعى ارنايى اپپاراتتان اپتاسىنا ەكى-ءۇش رەت گەمودياليز ەمىن قابىلدايدى. اۋرۋحانادا «جاساندى بۇيرەك» اپپاراتى بەسەۋ عانا. ال ستاتيستيكا وبلىستا ءبۇيرەك اۋرۋىنا شالدىققانداردىڭ سانى ءوسىپ كەلە جاتقانىنان حابار بەرەدى. قازىر وبلىستاعى ءار 800 مىڭ تۇرعىننىڭ اراسىنان جۇزگە تارتا ادام بۇيرەك اۋرۋىمەن اۋىرادى, سوندىقتان ولار وسى گەمودياليز ەمىنە ءزارۋ ەكەن. جاقىندا قوستاناي قالاسىندا اقتوبەدەگى Bios مەديتسينالىق ورتالىعىنىڭ فيليالى اشىلدى. بۇل گەمودياليز ورتالىعى تەك ناۋقاستاردى عانا ەمەس, وبلىس دارىگەرلەرىن دە قۋانتىپ وتىر. وندا سىرقاتى جانىنا باتقان اۋرۋلارعا ەم جاسايتىن زاماناۋي التى اپپارات بار. ەم الۋ كەزىندە اۋرۋلاردىڭ جاعدايىن ءدارىگەر جانە ەكى مەدبيكە باقىلاپ وتىرادى.
– اپپارات ءار ناۋقاستىڭ سىرقاتىنا قاراي بەيىمدەلىپ, ونىڭ جاعدايىن مۇلتىكسىز باقىلايدى. توسەك جانىنا بەكىتىلگەن مونيتوردان ناۋقاستىڭ قان قىسىمى, دەنساۋلىعىنىڭ قالىپتىلىعىن بىلدىرەتىن باسقا دا كورسەتكىشتەر كورىنىپ تۇرادى. ەگەر اۋرۋدىڭ ءحالى ناشارلاپ كەتكەن جاعدايدا جانساقتاۋ پالاتاسى بار. ءبىر اۋرۋ گەمودياليز ەمىن ءتورت ساعات السا, التى اپپاراتقا ءبىر مەزگىلدە التى ادام الامىز. سوندا ءۇش اۋىسىمدا 36 ادام بۇيرەگىنە ەم الادى. ەگەر بۇل از بولىپ جاتسا, قوسىمشا تاعى ەكى اپپارات قويامىز, دەيدى گەمودياليز ورتالىعىنىڭ ديرەكتورى ۆاديم انتونەتس. ونىڭ ءوزى نەفرولوگ جانە توكسيكولوگ دارىگەر ەكەن. سوندىقتان مامان دارىگەردىڭ ناۋقاستارعا بەرەر كەڭەسى دە مول. اقتوبەلىكتەردىڭ ۇسىنىسىنا قوستاناي وبلىستىق دەنساۋلىق ساقتاۋ باسقارماسى دا ىنتا ءبىلدىردى. اۋرۋ ازابىن شەككەندەر ءتىپتى ريزا.
– بۇيرەك اۋرۋىنىڭ وسى اۋىر تۇرىنە شالدىققانداردىڭ كوبى و دۇنيەلىك بولىپ كەتتى. مەن شىبىن جانىم ءۇشىن جىلدا شەت ەلگە باراتىنمىن. مىنا جاڭا ورتالىقتىڭ قىزمەتى ەۋروپالىقتارعا جاقىن ەكەنىنە سەنگىم كەلەدى. ەڭ باستىسى, دارىگەر بىلىكتى بولسىن دەڭىز, دەيدى ناۋقاس نەللي گولچەنكو.
مامانداردىڭ ايتۋىنشا, Bios مەديتسينا ورتالىعىنداعى اپپاراتتار بۇيرەگى جۇمىسىن دۇرىس اتقارمايتىنداردىڭ ءومىرىن 20-25 جىلعا سوزادى. بۇل ءومىر ءۇشىن اجالمەن الىسىپ ءجۇرگەندەرگە از ولجا ەمەس. ناۋقاستار وسىعان شۇكىرشىلىك ەتىپ وتىر.
ءنازيرا جارىمبەتوۆا,
قوستاناي.