قىسقا دايىندىق بايىپتى باستالدى
مەملەكەت باسشىسىنىڭ بيىلعى جولداۋىندا تۇرعىن ءۇي-كوممۋنالدىق شارۋاشىلىعىن جاڭعىرتۋ تاپسىرىلسا, ونى جۇزەگە اسىرۋدىڭ تەتىكتەرى ايقىندالىپ, باعدارلاما اياسىندا جۇمىس جالعاسقان. مۇنىڭ ءوزى الداعى قىسقا دايىندىققا دا كوپ كومەگىن تيگىزەتىنى انىق.
2011-2012 جىلدارداعى جىلىتۋ ماۋسىمىنا دايىندىققا بايلانىستى «ەگەمەن قازاقستاننىڭ» الماتى وبلىسىنداعى ءتىلشىسى كۇمىسجان بايجان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باستىعى ىزعاربەك بەكتۇرسىنوۆقا:
– ءسىز بۇعان نە دەيسىز؟
– ءيا, قۇندى قۇجاتتاعى تاپسىرما بارشادان قولداۋ تاپتى, ءتيىستى باعدارلاما جاسالدى. ەندى ونى جۇيەلى جۇزەگە اسىرۋ قاجەت. ال, قىراۋلى قىس ايلارىندا تۇرعىنداردىڭ الەۋمەتتىك جاعدايىنىڭ وڭ شەشىلۋى ءار شاڭىراقتاعى جىلۋ مەن باسقا دا تۇرمىسقا قاجەتتىلىكتەردىڭ تولىق قامتىلۋىنا تىكەلەي تاۋەلدى.
بيىل جىلىتۋ ماۋسىمىنا دايىندىققا 12,7 ملرد. تەڭگە ءبولىندى. قازىردىڭ وزىندە 19,9 مىڭ ليتر ديزەل وتىنى, 8,9 مىڭ توننا مازۋت ازىرلەندى. سونداي-اق جىلىتۋ ماۋسىمىنا 910 ءبىلىم, 839 دەنساۋلىق ساقتاۋ, 292 الەۋمەتتىك نىسانداردى دايىنداۋ قاجەتتىگى كەزەك كۇتىپ تۇر. قاتتى وتىنمەن جاناتىن 33 قازاندىق, 20,5 شاقىرىم جىلۋ تراسساسى, 3 مىڭ شاقىرىمنان استام ەلەكتر جەلىلەرى, 373 شاقىرىم سۋ قۇبىرى مەن كارىزدىك جەلى, 844 تۇرعىن ءۇي جوندەلۋگە جاتاتىنى انىقتالىپ, جۇمىس جالعاسۋدا.
وسى ورايدا اۋدان, قالا اكىمدەرى, وبلىستىق باسقارمالار مەن شارۋاشىلىق جەتەكشىلەرى ءبىرقاتار مىندەتتەردى جۇزەگە اسىرۋى كەرەك. تۇرعىن ءۇي-كوممۋنالدىق شارۋاشىلىقتى جاڭعىرتۋ باعدارلاماسىنا كەلسەك, ءوڭىردەگى 2020 جىلعا دەيىن جاڭعىرتۋدى قاجەت ەتەتىن جۇيەلەردىڭ ۇزىندىعى 22 مىڭ شاقىرىمدى قۇرايدى. جۇرگىزىلەتىن جۇمىستار ارقاسىندا كۇردەلى جوندەۋدى تالاپ ەتەتىن كوندومينيمۋم نىساندارىنىڭ ۇلەسى 73%-دان 22-%-عا تومەندەۋگە ءتيىس. قازىرگى كەزدە تۇرعىن ءۇي قاتىناستارىنىڭ وڭتايلى مودەلىن قۇرۋدى قامتاماسىز ەتەتىن زاڭ اكتىلەرىن قابىلداۋ ويلاستىرىلۋدا.
وڭىردەگى تۇرمىسقا قولايلى تۇرعىن ءۇي قورىنىڭ كوپشىلىگى كۇردەلى نەمەسە اعىمداعى ءجوندەۋدى قاجەت ەتەتىنىن دە ايتقان ءجون. مەملەكەت حالىقارالىق قارجى ينستيتۋتتارى مەن بانكتەردى تارتا وتىرىپ, جەكە ينۆەستورلارعا, كاسىپورىندار مەن ازاماتتارعا تۇرعىن ۇيلەر مەن كوممۋنالدىق نىسانداردى ءجوندەۋ جانە قايتا جاڭارتۋ ءۇشىن قارجىلاندىرۋدىڭ ارنايى تەتىكتەرىن ۇسىنۋدى جوسپارلاعانى بەلگىلى.
وبلىس بويىنشا كوممۋنالدىق ينفراقۇرىلىم جەلىلەرى مەن قۇرىلعىلارىنىڭ تەحنيكالىق جاعدايىنا كەلسەك, ونىڭ كوپ بولىگى جوندەۋ مەن اۋىستىرۋدى تالاپ ەتەدى. كوپ پاتەرلى تۇرعىن ۇيلەردىڭ تەحنيكالىق جاعدايى دا ءماز ەمەس. 2011-2020 جىلدارى كوممۋنالدىق ينفراقۇرىلىمدى جاڭارتۋعا بارلىق قارجىلاندىرۋ كوزدەرىنەن 125,6 ملرد. تەڭگە جۇمسالۋى ءتيىس. كوپ پاتەرلى تۇرعىن ۇيلەردى ءجوندەۋدى ەكى تەتىكپەن جۇزەگە اسىرۋ كوزدەلسە, بۇل جونىندە دە باعدارلاما جاسالىپ, بىرتىندەپ جۇزەگە اسىرىلاتىنىن ايتقان ءجون.
ال, الداعى قىسقا دايىندىقتىڭ تولىق تياناعىن كەلتىرۋگە بايلانىستى جۇمىس قىزۋ باستالدى. وتكەن جىلى تۇرعىنداردان ونشا كوپ وكپە-ناز ايتىلمادى. ەندىگى ماقسات بيىل دا وسىنداي جۇيەلى جۇمىستى جالعاستىرۋ ءۇشىن بار مۇمكىندىكتەردى جۇمىلدىرۋ. جەتىسۋلىقتاردىڭ ءۇيى جىلى, تۇرمىسى قولايلى بولاتىنىنا كۇمان جوق ەكەنىن ايتقان ءجون.