«ىسكەر» ورتالىعىندا ءتىل كوميتەتى «مەملەكەتتىك ونوماستيكا كوميسسياسىنىڭ جۇمىسىن جەتىلدىرۋ» اتتى دوڭگەلەك ۇستەل وتكىزدى. وندا ونوماستيكا ماسەلەلەرى بويىنشا زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالدى.
دوڭگەلەك ۇستەل بارىسىندا ونوماستيكا سالاسىنداعى نورماتيۆتىك-قۇقىقتىق بازانى جەتىلدىرۋ جايى تالقىلاندى. ونوماستيكالىق جۇمىستىڭ قۇقىقتىق نەگىزدەرىن, قولدانىلۋ تەتىگىن جانە ىسكە اسىرۋ نىساندارىن ازىرلەۋ ماسەلەسى كوتەرىلدى.
دوڭگەلەك ۇستەلگە قاتىسقان مادەنيەت ۆيتسە-ءمينيسترى عازيز تەلەباەۆ كوشە, جەر-سۋ, اۋدان, اۋىل اتتارىن قويۋدا رۋلىق-اتالىق اتاۋلاردىڭ بولماۋىن, ونداي اتاۋ قويۋعا وتە مۇقيات بولۋ كەرەكتىگىن ايتىپ ءوتتى. وبلىستان, جەرگىلىكتى جەرلەردەن كەلگەن ۇسىنىستاردى رەسپۋبليكالىق كوميسسيا قاراۋى كەرەك, دەدى ول.
ال بايلانىس جانە اقپارات مينيسترلىگىنىڭ ۇلتتىق اقپاراتتىق تەحنولوگيالارى كوميتەتىنەن كەلگەن وكىل ەلەكتروندى ۇكىمەت باعدارلاماسى بويىنشا ادرەستىك تىركەلىم تۋرالى ايتىپ ءوتتى. ول ادرەستىك تىركەلىم ءۇشىن اتاۋلاردىڭ بىركەلكىلىگى ماڭىزدى ەكەندىگىن, كەيبىر جەرلەردە 4 ارىپتەن تۇراتىن اباي اتاۋىنىڭ ءوزى 4 ءتۇرلى كەزدەسەتىنىن تىلگە تيەك ەتتى. ءتىپتى كەيبىر جەرلەردە حۋتورلار بار. الايدا. ولاردى اقپاراتتىق جۇيەگە سالعان كەزدە قيىنشىلىق تۋعىزادى. سوڭعى 20 جىل ىشىندە ءار وبلىس ءارتۇرلى اتاۋ مانەرىنە ءتۇسىپ الدى. كەيبىر 50 ادام تۇراتىن اۋىلدار ادرەستىك تىركەلىمگە ەنگىزىلمەي قالدى. بۇل دۇرىس ەمەس. قازاقستاننىڭ دەموگرافياسىن ەسەپتەسەك, كوشى-قون بار, ياعني ادامدار كەيىن قونىستانۋى ارقىلى كوبەيۋى ءمۇمكىن. سوندىقتان ولاردى دا ەسەپكە الىپ, تىركەۋىمىز قاجەت, دەدى ول.
القالى وتىرىستا اقمولا, اقتوبە, جامبىل وبلىستىق ءتىلدەردى دامىتۋ باسقارمالارى ونوماستيكا بولىمدەرى باسشىلارىنىڭ باياندامالارى, سونداي-اق استانا مەن الماتى قالالارى ماماندارىنىڭ پىكىرلەرى تىڭدالدى.
ۆەنەرا تۇگەلباي.