اتالعان فورۋمدا كۋرورت ءىسىنىڭ مەنەدجمەنتى, قازاقستان شيپاجايلارىن اككرەديتاتسيالاۋ, شيپاجاي-كۋرورتتىق ۇيىمداردى دامىتۋ جانە كوبەيتۋ, كۋرورت ءىسى ماماندارىنىڭ كاسىبي ءبىلىمىن ارتتىرۋ سياقتى بىرقاتار ماڭىزدى ماسەلەلەر تالقىلاندى. وندا ەلىمىزدىڭ تۇكپىر-تۇكپىرىنەن جانە شەتەلدەردەن كەلگەن ءىرى عىلىمي-زەرتتەۋ ينستيتۋتتارىنىڭ, مەديتسينالىق وڭالتۋ ورتالىقتارىنىڭ, شيپاجاي-كۋرورتتىق مەكەمەلەرىنىڭ وكىلدەرى ءسوز ءسويلەدى. سونداي-اق, وعان مەديتسينالىق وڭالتۋ, كارديولوگيا, ۋرولوگيا, ونكولوگيا, گينەكولوگيا, كۋرورتولوگيا, فيزيوتەراپيا, ەمدىك دەنە شىنىقتىرۋ جانە ماسساج سالاسىنداعى گەرمانيادان, چەحيادان, يتاليادان, رەسەيدەن كەلگەن جەتەكشى ماماندار قاتىستى. شارانى قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعى ۇلتتىق شيپاجايلار قاۋىمداستىعىمەن بىرلەسە وتىرىپ ۇيىمداستىردى.
پرەزيدەنتتىڭ ءىس باسقارماسىنىڭ مەديتسينالىق ورتالىعى – ەلىمىزدەگى كۋرورتتىق سالانى دامىتۋدى قولعا العان العاشقىلاردىڭ ءبىرى ءارى وسى سالاداعى كوپتەگەن ىستەرگە باستاماشى بولىپ كەلە جاتقان مەكەمە. وسى ورتالىقتىڭ باسشىسى, «شيپاجاي-2017» حالىقارالىق عىلىمي-پراكتيكالىق فورۋمىن ۇيىمداستىرۋ كوميتەتىنىڭ ءتوراعاسى ۆالەري بەنبەريننىڭ ايتۋىنشا, ازاماتتاردىڭ دەنساۋلىعىن نىعايتىپ, سوزىلمالى سىرقاتپەن اۋىرعان جانداردىڭ جانى مەن ءتانىن قالپىن كەلتىرۋدە كۋرورتتىق كەشەندەردىڭ كومەگى كوپ. بۇگىندە بۇل سالا ساۋىقتىرۋدىڭ ەڭ ءتيىمدى ءادىسى رەتىندە الەمدىك پراكتيكادا كەڭىنەن قولدانىلىپ كەلەدى. قازاقستان مەديتسيناسى دا وڭالتۋ شارالارىنا ايرىقشا ماڭىز بەرىپ وتىر. وسى سالانى وركەندەتۋ ىسىنە وزىندىك ۇلەسىن قوسىپ كەلە جاتقان اتالمىش مەديتسينالىق ورتالىقتا قازىرگى تاڭدا 4 مىڭنان استام مامان جۇمىس ىستەيدى. مەديتسينالىق ورتالىقتىڭ شيپاجاي-كۋرورتتىق ۇيىمدارىندا جىل سايىن 25 مىڭنان استام ادام دەمالىپ, ءتيىستى ەم-دومىن الىپ شىعادى ەكەن.
پرەزيدەنتتىڭ ءىس باسقارماسىنىڭ مەديتسينالىق ورتالىعى دەنساۋلىقتى نىعايتۋعا باعىتتالعان شارالاردى ودان ءارى دامىتىپ, جۇرتشىلىققا جوعارى ساپالى قىزمەت كورسەتۋدى كوزدەيدى. وسى ماقساتتا بىلتىردان بەرى «شيپاجاي-2017» عىلىمي-پراكتيكالىق كونفەرەنتسياسىن وتكىزۋدى قولعا العان. وتكەن جىلى مەديتسينالىق ورتالىقتىڭ «الماتى» شيپاجايىندا وتكەن العاشقى جيىندا ەلىمىزدەگى وڭالتۋ ۇيىمدارى مەن شيپاجايلىق-كۋرورتتىق قىزمەتتى ءبىر ورتالىققا بىرىكتىرۋ جونىندە باستاما كوتەرىلىپ, سونىڭ ناتيجەسىندە قازاقستاننىڭ ۇلتتىق كۋرورتتىق اسسوتسياتسياسى قۇرىلعان بولاتىن. ەندى الداعى ۋاقىتتا كۋرورتتىق ىستەردى زەرتتەۋمەن اينالىساتىن عىلىمي ينستيتۋت اشۋ جوسپارلانۋدا.
مالىمەتكە سۇيەنسەك, ءبۇگىندە قازاقستان اۋماعىندا 200-دەن استام شيپاجاي مەن كۋرورت بار. ال ولاردىڭ جۇمىسىن ءبىرىڭعاي باسقارۋ جۇيەسىنە كوشىرۋ, شيپاجايلىق كەشەندەردى دامىتۋدىڭ مەملەكەتتىك ستراتەگياسىن ازىرلەۋ, وسى سالاعا ينۆەستيتسيا تارتۋ قازىرگى مەديتسينا سالاسىنىڭ وزەكتى ماسەلەلەرىنىڭ ءبىرى بولىپ وتىر.
قازاقستاننىڭ ۇلتتىق شيپاجايلار قاۋىمداستىعىنىڭ پرەزيدەنتى ساياگۇل قايىرگەلدينانىڭ ايتۋىنشا, قازاقستان رەسپۋبليكاسىنىڭ شيپاجايلار قورىنىڭ ۇلتتىق ءتىزىلىمىن جاساۋدى اياقتاپ, ونى قازاقستاندىق شيپاجايلار بازاسىندا ساۋىعۋ مۇمكىنشىلىگى تۋرالى قولجەتىمدى اقپاراتتارمەن قامتاماسىز ەتۋ ءۇشىن شىنايى جۇمىس تەتىگىنە اينالدىرۋ قاجەت. سونىمەن قاتار, شيپاجاي نىساندارىنىڭ مىندەتتى جىكتەمەسىن بەكىتىپ, مەديتسينالىق قىزمەت دەڭگەيى مەن ورنالاسۋ جايلىلىعى بويىنشا ساناتتارعا ءبولۋ كەرەك.
جيىنعا قاتىسىپ, ءسوز سويلەگەندەر دەنساۋلىقتى قورعاۋ مەملەكەتتىك ساياساتتىڭ باستى باعىتتارىنىڭ ءبىرى ەكەنىن, سوڭعى جىلدارى دەنساۋلىقتى قالپىنا كەلتىرۋ سالاسىنا ەلىمىزدە باسىمدىق بەرىلىپ وتىرعانىن ايتتى. قازاقتىڭ ۇلان-عايىر جەرى پايدالى تابيعي رەسۋرستارعا باي ەكەندىگىن العا تارتىپ, وسىنداي ەن بايلىعىمىزدى ەمدەۋ-ساۋىقتىرۋ ىسىنە ءتيىمدى پايدالانىپ, بۇل سالانى ءتيىستى دەڭگەيگە جەتكىزۋگە ۇمتىلۋىمىز كەرەكتىگىن تىلگە تيەك ەتتى.
كونفەرەنتسيا قاتىسۋشىلارى سوڭعى جىلدارى قازاقستاننىڭ مەديتسيناسى قارقىندى دامىعانىن ايتادى. اسىرەسە, ەلىمىزدە بۋىن, جۇرەك, باۋىر, بۇيرەك الماستىرۋ سەكىلدى وپەراتسيالار تابىستى جاسالىپ جاتىر. مۇنداي اۋىر وتالاردى باسىنان وتكەرگەن ازاماتتاردىڭ كوبەيۋىنە بايلانىستى وڭالتۋ, قالپىنا كەلتىرۋ شارالارىنا جاڭاشا كوزقاراس پەن تىڭ سەرپىن قاجەت. وسىنداي ماسەلەلەردى العا تارتقان ماماندار عىلىمي پراكتيكالىق-كونفەرەنتسيانىڭ قارارىن قابىلدادى.
باسقوسۋ اياسىندا سونداي-اق, شيپاجاي-كۋرورتتىق ۇيىمداردىڭ جانە فارماتسەۆتيكالىق ءونىم وندىرۋشىلەرىنىڭ كورمەسى ۇيىمداستىرىلدى. «قازاقستان رەسپۋبليكاسىنداعى كۋرورتولوگيا ماسەلەلەرى» اتتى عىلىمي-پراكتيكالىق جانە اقپاراتتىق جۋرنالدىڭ العاشقى ءنومىرى تاراتىلدى.
جالپى, ەكىنشى رەت وتكىزىلىپ وتىرعان حالىقارالىق عىلىمي-پراكتيكالىق فورۋم بيىل پرەزيدەنتتىڭ ءىس باسقارماسى مەديتسينالىق ورتالىعىنىڭ دەمالىس ورىندارىنىڭ ءبىرى – «وقجەتپەس» شيپاجايىنىڭ 50 جىلدىعىنا وراي وتكىزىلدى.
دينارا بىتىكوۆا,
«ەگەمەن قازاقستان»
اقمولا وبلىسى