ءسايكەسىنشە, باعانى تۇراقتى ۇستاپ تۇرۋ شارالارىنا بايلانىستى قاداعالاۋ جۇرگىزىپ, اپپاراتتىق جيىندا قىزىل ءسوزدىڭ قىرمانىن قىزدىرعان باياندامالاردى وتكىر سىنعا الدى.
وسى جيىندا وبلىس اكىمىنىڭ ورىنباسارى شاگۋراشيد مامالينوۆ جەدەل جانە جۇيەلى سيپاتتاعى شارالار قابىلداۋ جوسپارلانعانىن باياندادى. ايماقارالىق كووپەراتسيا اياسىندا مامىر ايىنىڭ ورتاسىندا وڭتۇستىكتەن جاڭا پىسكەن كوكونىستەردەن العاشقى «جاسىل كەرۋەندەر» كەلەدى دەپ كۇتىلۋدە. ش.مامالينوۆتىڭ ايتۋىنشا, اپتا سايىن كارتوپ, قىرىققابات, ءسابىز, قىزىلشا 5 كولىكتەن كەلەدى. جاڭا پىسكەن كوكونىستەر نەگىزىنەن الەۋمەتتىك پاۆيلوندار اراسىندا ۇلەستىرىلەدى.
ەرلان قوشانوۆ وبلىس ورتالىعىنداعى جانە وبلىستاعى باسقا قالالارداعى سۋپەرماركەتتەردە الەۋمەتتىك سورەلەر جاساۋدى تاپسىردى. بۇل ءماسەلە ساۋدا بيزنەسىنىڭ يەلەرىمەن كەلىسىلىپ جاتىر. مۇنداي جەكە ءسورەلەر ءساۋىر ايىنىڭ سوڭىنا دەيىن پايدا بولۋى كەرەك. بۇدان باسقا, قاراعاندىداعى 23 الەۋمەتتىك پاۆيلون مەن كوممۋنالدىق بازار «سارىارقا» اكك بالانسىنا وتپەك. الداعى ۋاقىتتا الەۋمەتتىك پاۆيلوندار سانى ەكى ەسەگە ارتادى.
اۋىلشارۋاشىلىق كووپەراتسيانى دامىتۋ – نارىقتا جەرگىلىكتى جەردە وسىرىلگەن كوكونىستەر مەن ەتتىڭ ساتىلۋىنا قولايلى جاعداي تۋعىزباق. وتاندىق ونىمدەردى وتكىزۋ ءۇشىن قاراعاندىدا كوتەرمە-تاراتۋ ورتالىعىن قۇرۋ قاراستىرىلعان. قۇرىلىستى بيىل باستاپ, 2018 جىلى ءبىتىرۋ كوزدەلگەن. ايماق باسشىسىنىڭ ايتۋىنشا, ول دۇكەندەردى ارالاپ, باعالاردى ءوز كوزىمەن كورگەن.
– قازىر كورسەتىپ وتىرعان باعالارىڭىز – جەر مەن كوكتەي. ءوز-ءوزىمىزدى الداۋدىڭ قاجەتى جوق. بايانداماڭىز ادەمى. حالىق ءبارىن دە كورىپ وتىر. ناقتى باعانى باقىلاپ وتىراتىن جۇمىس توبى قۇرىلدى, – دەپ ەسكەرتتى اكىم ورىنباسارىنا.
دەرەك بويىنشا, وبلىستا جەرگىلىكتى تاۋار وندىرۋشىلەر ۇن, نان, كارتوپ, قىزىلشا, سيىر مەن قۇس ەتى, ءسۇت ونىمدەرى جانە تاۋىق جۇمىرتقاسى بويىنشا قاجەتتىلىكتى قامتاماسىز ەتىپ وتىر. دەگەنمەن, ءوزىمىزدە شىعارىلاتىن ماكارون ءونىمدەرى, سارى ماي مەن ىرىمشىك, كوكونىستەردەن – قىرىققابات, ءسابىز بەن پيياز جەتكىلىكسىز.
ميراس اسان,
«ەگەمەن قازاقستان»
قاراعاندى وبلىسى